Menü
Kieler Nachrichten | Ihre Zeitung aus Kiel
Schleswig-Holstein Plattkinner: Hier speelt de Musik
Nachrichten Schleswig-Holstein Plattkinner: Hier speelt de Musik
Partner im Redaktionsnetzwerk Deutschland
12:00 18.10.2018
Von Heike Thode-Scheel
"Plattkinner": So süht en Duppelsiet ut. Quelle: oh

„Ik kaam jo vun‘ Buernhoff un heff dree öllere Bröder. Ik bün so bangenbi groot wurrn“, lacht se sik en. In ehr Kindheit weer nix vunwegen op’n Speelplatz gahn oder mol fix to en Fründin röverjumpen. Dorför hett se wat ganz anners maakt: „Ik heff mi ganz veel Dummtüüch utdacht“, smüüstert de Deern ut de Neegde vun Lüttenborg. „Wat heff ik för’n Quatsch maakt“, wunnerwarkt se, „un ik heff mien Deerten hatt, mien Hund, mien Katten. Un de Ostsee is mien Hart“, swöögt de Modder vun en lütt Söhn noch wieder. Liekers hett se as Kind all vun‘e Stadt dröömt.  Un dor wahnt se nu ok: Merrn in’e Grootstadt Hamborg. Mit ehr lütt Söhn Enno geiht se jedeen Nameddag op’n Speelplatz. „Jo, ik bün op anner Aart un Wies groot wurrn.“ Aver dat bitt sik jo nich: „Dat Stadtleven is goot – aver ik mutt ok jümmers wedder hin op’t Land“, gifft de Hamborgerin to. Wobi – so ganz anners is dat dor, wo se nu wahnt ok nich: „De Michel is mien Kark. Jüst so as in Lüttenborg. Ik gah geern op’n Marktplatz. Den gifft dat in Lüttenborg ok un ik kenn hier veele Lüüd un schnack ok mit se. Dat is hier so’n beten as’n Dörp in’e Stadt.“

Jüst dor op’n Speelplatz in’e Stadt hett se ok den Musiker Hardy  Kayser wedderdrapen: „Den kenn ik ut Gadendörp vun tohuus un de wahnt hier nu glieks üm’e Eck“, freut sik Wiebke Colmorgen över den glücklichen Tofall. De Idee to dat Leederbook is de Beiden op’n Speelplatz kamen. Eerst wullen se öllere Kinnerleeder en‘ nieges, modernet Kleed övertrecken. Aver dat weer ehr nich nuch: „Ik warr ganz dull vun mien Arbeit mit’e Kinner inspireert. Dor is mi noch ganz veel infullen.“ Wiebke Colmorgen maakt nämli Spraakfördern in‘ Kinnergoorn un dorbi kriggt se een Barg mit „woans Kinner Spraak liert un wo wichtig dat is, dat een sien egen Moderspraak wertschätzen deit.“ Dorbi geiht dat nu nich blots üm Platt – bi ehr in‘ Kinnergoorn schnackt de Lütten ok Türkisch oder Russisch oder Franzöösch. För Wiebke Colmorgen is dat mit’e verscheden Spraken ganz eenfach: „Se hebbt ehr Spraak, ik heff mien Moderspraak un gemeensam hebbt wi Hochdüütsch.“ Platt is för ehr as so’n Brüch twüschen all de Spraken.  Un dat kümmt denn ganz vun alleen rut. „Wenn ik de Kinner beobachten do oder wenn de ok mol Dummtüüch maakt – denn kaam ik in ehr lütte Welt rin, wo noch ganz veel Fantasie is“, swöögt se.

Vun de Idee op’n Speelplatz weer dat‘n langen Wech hin  na dat feine Leederbook. Dree Johr hett dat duert. Eerst schull dat man blots een CD warrn, man „dat hett mi noch nich so richtig övertüügt. Ik wull ok so’n Instieg in’t Plattdüütsche geven.“ För ehr stünn fast: Dat mutt en Book warrn mit Ledertexte op Hoch un Platt, mit bunte Biller un en CD to’n Nasingen. En Verlag finnen? Dat weer gor nich so swoor: „De Junius-Verlag hett dor en ganz dulles Book ut maakt“, swöögt de Musikerin, „mit en Super-Illustratorin, de de Biller in‘ Comic-Stil maakt hett.“ Mit de Hamborger Grafikerin Tanja Esch hett se denn ok eng tosamen arbeit, se weer bi ehr in’t Atelier un hett sik all’ns nipp un nau ankeken.

Ok mit den Musiker un Rietfiedel-Speeler  Hardy Kayser weer dat en Glücksfall. De is nämli sölben vun’t Land, is in Gadendörp groot wurrn, kann Platt schnacken un maakt eegens Musik mit so bekannte Stars as Ina Müller, Annett Louisan un Rocko Schamoni. „De Leeder sünd flott entstahn – de eerste weer „Makkaroni“, dat weet ik noch. Dat weer in‘ September 2015.“ Un denn güng dat „as so’n Ping-Pong hin un her“. Wiebke Colmorgen hett Hardy Kayser ehr Idee schickt un den eersten Reim, „he hett mi Musik torüchschickt un denn heff ik riemelt. Dat kümmt eenfach so ut mi rut“, vertellt se.

Liekers geev dat noch veel blangenbi to organiseern – denn op de CD sünd ok Kinner to höörn. Un Wiebke Colmorgen müss en Barg in’e Bökerie vun’e Carl-Toepfer-Stiften rechercheer. Denn in’t Book verklaart se ok verscheden Wöör, Begriffe oder Schnacks, de in’e Leeder vörkamen doot: „Ik will jo ok de groten Lüüd mit in’t Boot holen. Dat schall en schönes, runnes Book ween. Ik seh dat as Familien-Book.“ Un dat is dor ok nipp un nau bi rutsuert: En wunnerbores Leederbook mit bunte, fidele Biller, mit plietsche Texte un flotte Musik to’n Mitsingen: „Parlez-vous Platt? Mien Droom – ik heff em noch  nüms vertellt –  is, dat all Kinner op de Welt ganz luut roopt: Jo!,  wenn ik se mal fragen do: Parlez-vous Platt?“

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!

Eine Weichenstörung in Hamburg-Wandsbek zwischen Hamburg und Lübeck hat am Donnerstag für Einschränkungen im Bahnverkehr gesorgt - vor allem Pendler waren betroffen. Einfach zu beheben war der Sachaden offenbar nicht.

18.10.2018

zum sechsten Mal sind die Schleswig-Holsteiner im alljährlichen "Glücksatlas" der Post an der Spitze – vor Hamburg und Hessen. Der Kieler Glücksforscher Professor Uwe Jensen von der Kieler Universität erklärt im Interview, warum das so ist.

Heike Stüben 19.10.2018

Ritter Trenk mutt ok in de Plattdüütsche Welt masse Aventüern bestahn - denn in norddeutschen Kinos startet jetzt „Ritter Trenk op Platt“. Auch „Tatort“-Star Axel Prahl machte bei der Neuauflage mit. In Schleswig-Holstein läuft der Kino-Film u.a. in Kiel, Rendsburg und Plön.

17.10.2018