Menü
Kieler Nachrichten | Ihre Zeitung aus Kiel
Schleswig-Holstein "Schrieven is jümmer Arbeit"
Nachrichten Schleswig-Holstein "Schrieven is jümmer Arbeit"
Partner im Redaktionsnetzwerk Deutschland
12:00 01.11.2018
Von Heike Thode-Scheel
"Bolko Bullerdiek sien Buddelbreven" - so heet dat niege Book, wat jüst in' Qucikborn-Verlag rutkamen is. Quelle: th

Herr Bullerdiek, mit welke Wöör würrn se sik sölben op Platt beschrieven?

Ick bün nadenkern, ehrder unseker; man nu, wo ick den gröttsten Deel von mien Leven achter mi heff, kummt dor ook en nee’e Lichtigkeit in mien Leven. Ick hööp, dat mi de gegen all de pienliche Öllerhaftigkeit hölpt. 

Wokeen hett se Platt bipuult?

Ick bün twors in Tansania op de Welt kamen, man in Bookholzberg, en Dörp twüschen Ollborg un Bremen, opwussen. Domals hebbt de Dörpslüüd Platt snackt; man mit de Kinner hebbt meist all Hochdüütsch snackt. De glöven, denn harrn de Kinner dat in de School lichter. Hochdüütsch hebbt natürlich ook all de Flüchtlinge snackt. Platt heff ick also jümmer höört un verstahn, man nie nich snackt. Ick harr mi domals ook nich vörstellen kunnt, dat disse Spraak för mi en Bedüden hebben kunn.

Un wat bedüüt de Spraak hüüt för se? Wann sünd se anfungen, op Platt to schrieven un sik Gedanken to maken?

Ick bün en Schoolmester. Man de mehrsten Johren von mien Berufsleven weer ick Fortbildner för Düütschlehrer, heff also Düütschlehrer Anregungen vermiddelt för ehrn Ünnerricht. Dorbi hebbt wi ook veel kreativ Schrieven maakt. Dat bedüüd, ick heff mi Schrievanlässe utdacht; wi hebbt all schreven un uns de Texten vörleest un diskereert. Jichtenswenn – ick weer al Midde veertig – harr ick op Hochdüütsch en Reeg lütte lyrische Texte un heff överleggt, woans de op Platt klingen wöörn. Man mien Platt hett nich langt un woans man disse Spraak schrieven kunn, wüss ick nich. So heff ick mi Hölp söcht un ut disse Texten is denn at Book „Blangenbi und doch weit weg“ rutkamen. Denn heff ick anfugen, Platt to lesen: Hinrich Kruse, Ivo Braak, Hermann Claudius, Johann D. Bellmann, Wolfgang Sieg; bün to de Bevensen-Dagfohrt föhrt; heff bi den Quickborn-Vereen in de Redaktion mitarbeidt.

Wat maakt de plattdüütsche Spraak ut ehr Gedichten? Künnt se Geföhle anners beschrieven?

De Lüüd seggt, Platt wöör gemütlicher klingen. Dat is richtig, man hangt nich an de Spraak, man doran, dat se de Tweetspraak in Norddüütschland is. Wöörn all Juristen un Politiker un Wetenschopler Platt snacken, weer dat mit de Gemütlichkeit gau vörbi. En Spraak transporteert „Konnotationen“, Geföhle. Un de hangt af von de Situationen, in de se meist bruukt warrt. Un Plattdüütsch warrt ehrder bruukt in de Familie, mank Navers, also dor, wo man sick kennt. Dorüm löst de plattdüütsche Variante von en Gedicht meist anner Geföhle ut as de hochdüütsche. Natürlich is Platt för mi besünners wichtig – man al wenn ick mit mien Kinner oder Enkel snack, maak ick dat op Hochdüütsch. (As Plattdüütsch för mi wichtig wöör, weern mien Döchter al ut’n Huus).

Wenn se Platt mit en Minschen schnacken doot, verännert sik dor wat?

Kloor, wenn ick mit anner Lüüd Platt snack, ännert sick wat. Man wat is dat? Wi hebbt en besünnern Draht. Liekers kann dat angahn, dat wi uns stried.

Un wenn se Gedichte schrieven - dinkt se ehr Gedanken denn ok op Platt?

Wenn ick op Platt schriev, denn denk ick ook Platt, eendoon, wat ick jüst en Gedicht oder Geschicht schriev.

Wat is Platt för se? Hobby, Leidenschaft, Arbeit . . . ?

Schrieven is jümmer Arbeit. Un wenn ick en Hobby eernsthaftig bedriev, denn is dat Hobby ook Arbeit. Ick weer vör miene Plattdüütsch-Tied Marathon-Löper. Wat meent Se, wat ick mi bi dit Hobby quäält heff.

Wo kaamt de Themen för ehr Gedichte un Vertellen her?

En Idee för en Gedicht oder en Geschicht – dat is en Glücksfall. Un af un an hett man Glück . . . Ansonsten mutt man Ogen un Ohren open holen un Infäll gau noteern.

Weer de Schrieverie jümmers all ehr Droom?

In de Pubertät weer dat en Droom von mi un ick heff dor ook vör mi henriemelt. Man ick weer övertüügt, dat kunn nicks warrn – wegen mien Probleme mit dat Rechtschrieven.

Ehr Texte sünd deepdinkern, truri, vigelliensch, kritisch, modern un so gor nich lustig, as veele Lüüd sik dat wünschen doot.

Ach, ick heff faken en beten afgünstig op de fidele Konkurrenz keken. Man dat hölpt nich. Jeedeen driggt dat to Markt, wat he levern kann. Un Witz is ook en Gottsgaav. Wenn Platt avers blots noch för lachhafte Plattitüden dögen schall, denn nimmt dat de Spraak ehrn Weert.

Gifft dat Dichter, Schrieverslüüd, de se geern leest ?

De Autoren, an de ick mi toeerst orienteert heff, sünd mi jümmer noch wichtig. Dorto höört ook de junge Spiekermann, de „Mien halve Fro“ schreven hett. Von de jüngeren sünd mi Birgit Lemmermann wichtig, Jürgen Kropp, Rainer Prüss.

As Schoolmeester hebbt se jo all fröh mit Platt in'e School anfungen. Wat hett sik all'ns na ehr Meen in'e School doon, wat Platt angeiht?

Ick weer jo an dat Hamborger Lannesinstitut för Lehrerbildung Fortbildner för Düütsch. Blangenbi müssen wi twee bit veer Stünnen Ünnerricht in jichtenseen Hamborger School maken. Ick heff denn anfungen, in de gymnasiale Oberstufe „Grundkurse Niederdeutsch“ antobeden. Ick heff mit de Schölers plattdüütsche Texte leest; de Schölers hebbt hochdüütsch över plattdüütsche Texte Klausuren schreven. De Punkte sünd so as bi all Oberstufenkurse in dat Abitur ingahn. Erst an’t Enn von mien reguläre Arbeitstied un ook na mien Pensionerung heff ick op Finkwarder in de Westerschool Platt in de Grundschool maakt. Hamborg hett denn anfungen, Niederdeutsch as ordentliches Fack in de Grundschool antobeden. Man in Hamborg maakt dat bloß wenig Scholen. Veel wieder is dor nu Schleswig-Holsteen.

Un wat würrn se noch geern mol op Platt maken?

In mienen Computer heff ick en Reeg korte Texte över snaaksche Arbeitslüüd. Un ick kenn en Künstler, de dor mit en genialen Streek Teeknungen to maken will. Wöör mi freien, wenn wi dat noch op’n Markt bringt.

Wat wünscht se sik för de plattdüütsche Spraak?

Kloor: dat’ ehr goot geiht, dat de Kinner in de Spraak snackt un singt. Man ut de Tied, wo dat Wünschen noch hulpen hett, sünd wi leider rut. Op de anner Sied: Ick maak an de Hamburger Universität Plattdüütsch-Seminare för Lehramtsstudenten. De köönt ook wat anners beleggen. Mi fallt op, dat ick jümmer överproportional veel Studenten un Studentinnen ut Migrationsfamilien heff. För de is uns Region nicht sülfstverständlich. De wüllt hier dorto höörn. Un woans köönt se dat beter wiesen as mit de Regionalspraak. Also, villicht redd de plietschen Migrantenkinner uns Heimotspraak.

 

 

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!

Die Ankündigung von Vonovia, dass 200 BUWOG-Mitarbeiter in Schleswig-Holstein gekündigt werden, hat auch bei Mietern der 17.000 BUWOG-Wohnungen im Land Verunsicherung ausgelöst. Ein Vonovia-Sprecher versicherte am Dienstag: „Für die Mieter ändert sich nichts.“ Beim Mieterverein sieht man das anders.

Heike Stüben 01.11.2018

Physiotherapeuten, Ergotherapeuten, Logopäden, Podologen und Diätassistenten sind gesucht. Doch wer einen dieser Berufe ergreifen will, muss meist 14000 bis 20000 Euro Schulgeld aufbringen. Am 1. November wollen deshalb über 400 Betroffene in Kiel das sofortige Ende des Schulgeldes fordern.

Heike Stüben 01.11.2018

In Schleswig-Holstein fühlen sich Menschen immer häufiger durch Kameras gestört und überwacht. Sie hängen an Straßenzügen, in Restaurants, Bussen oder an Haustüren und Carports: Überwachungskameras. Auch wegen Drohnen steigt die Zahl der Beschwerden im Unabhängigen Landeszentrum für Datenschutz.

Bastian Modrow 01.11.2018