2 ° / -6 ° wolkig

Navigation:
Bi ehr geiht dat to Saak

Birgit Pauls schrifft scharpe Saken op Platt Bi ehr geiht dat to Saak

Fototermin an‘e Obereider in Rendsborg. De Erotik- un Krimi-Autorin Birgit Pauls alias Lilly Block is op‘n Koffi to‘n Platt-Schnack komen. Dat Licht an‘ fröhen Namiddag is goot, de Wind puust – also los. Wieldess ik de Kamera kloor maak, tüdelt Birgit Pauls flott ehrn överlangen Zopp op un schüddelt routineert een Waterfall ut ehr meterlang bruun Hoor daal. Wow. Een eensome Spazeergänger luert verwunndert na uns röver . . . Wat wi beiden Froons nu woll sien Phantasie in‘e Gang sett hebbt?

Voriger Artikel
Morrns üm Klock acht: Koffi, Rundstück un "Hör mal 'n beten to"
Nächster Artikel
Utopie oder Tokunft bi uns?

Birgit Pauls schrifft erootsche Vertellen.

Quelle: Ines Barber

Vun Ines Barber. As „IT-Expertin“, also as Fachfro för Informatschionstechnik, is Birgit Pauls veele Johr lang krüüz un quer dörch't Land suust. Oftins ok dörch ferne Länner. De Fro hett'n Barg beleevt un dat hett ehr Phantasie düchtig ünner Füer sett. Uns Themen sünd denn ok hitt un swatt.

 Jüst so as sik dat för‘n goden Koffi höört - un för Erotik un Krimis erst recht.

Birgit Pauls is 1963 in Husum to Welt komen. Un dor arbeit de studeerte Mathematikerin ok hüüt wedder. Schrifft Böker över‘n Datenschutz un coacht Firmen. Opwussen is se in Tönn un Kotzenbüll. Een Landschopp, de di nich unbedingt stracks op'n erootschen Padd bringt. Man 2008 kümmt denn ehr erst lütt erootsche Roman rut: „Herrenbegleitung“. Noch op hochdüütsch. Birgit Pauls verwannelt sik för düsse hitte Literatur in „Lilly Block“, ehr Pseudonym för scharpe Saken.

 De Froons in ehr Vertelln sünd driest, neegierig un beleevt – ik segg mol so: sexuelle Aventüer in dusend Variatschoonen. Un de maalt Lilly Block ok dütlicher as dütlich ut. Ik heff woll'n Barg Froogtekens in't Gesicht to bummeln un‘ rosig Farv bavento . . . Birgit Pauls lacht sik een  un gifft nipp un nau to: „Einiges hab ich so selbst erlebt. Im Nachtzug. Wenn ich alleine unterwegs war.“ De Rest is Phantasie. Wat „Fifty Shades of Grey“, de  skandalümwittert Bestseller ut Amerika schafft, dat kann se all lang. Ok op Platt.

„Schweinkram ist das!“ Op‘n private plattdüütsche Erotik-Lesung is de jüngste Gast, een Fro üm‘e veertig, empört rutlopen, as de Schrieversfro mit de dore Saak un mit’e Spraak rutkeem. Se weer as Överraschungsgast inlaadt. Man dat maakt ehr nix ut. De erootschen Vertelln un Phantasien vun Fruunsminschen koomt goot an, dat weet se vun ehr Publikum.

Op de Idee komen is se dörch een Vördrag över de plattdüütsche Spraak. As se höör, wat Platt fröher mol bedüüt hett, wo wichtig dat in‘e Tiet vun‘e Hanse weer un – so de Spreker dormols – „datt een op Platt doch hüüt bitteschön ok över all‘ns schrieven un schnacken schull.“  Un dor hett se sik hensett un ehr erootsche hochdüütsche Vertelln op Platt överdragen.

Hüüt hett se dree Erotik-Böker op`n Markt. De Vertelln sünd op‘e een Siet op Platt un op‘e anner Siet op Hochdütsch. „Das mögen die Touristen besonders!“, hett se mitkreegen un sik dorna denn plietsch utricht.

Lilly Block hett Fans in't Erotik-Genre -  aver de Krimifans kennt ehr as Birgit Pauls. Denn – de tweete Leidenschopp vun ehr sünd Mord un Doodslag! Korte Krimis ut Tönn un Kotzenbüll, ehr Heimat. De Lüüd – geern nimmt se beestige Toreiste op’t Koorn - warrt op snaaksche Ort üm‘e Eck bröcht. Birgit Pauls hett'n swatten Humor.

Inspiratschoon holt se si direkt vun‘e Lüüd, de se mol in‘ Kroog, mol in't Café, in‘e Inkoopsstraat oder an‘e See beluert. Un denn warrt dat opschreven. Wokeen nu meent, de Computer- un IT-Fachfro schrifft ehr Vertelln mit‘n Computer, de is op’n Holtwech. Se schrifft noch mit‘e Hand: „Die Gedanken fließen direkt in den Schwung meines Füllers.“ De Laptop maakt ehr toveel Druck, seggt se. Se is’n t  Westküstenkind un sitt geern mit Block  un Bliestift direkt an‘e See un fabuleert. Hett se eerst Mol den Titel un den eersten Satz funnen, denn „löppt dat“, so de patente Schrieversfro.

Un wenn dat mol nich löppt, denn seilt se tosomen mit‘n goode Fründ oder: Se strickt. Socken! Bunt, mit Striepens. Wat de Phantasie so hergeven deit. Ok hüüt hett se ehrn Knüttbüdel mitbröcht. Op‘e Togfohrt trüch na Husum will se wiederknütten. Een harmlos Anblick för de annern Minschen üm ehr rüm. Man - ik bün seker, wieldess se Reeg för Reeg de Socken knütt, kiekt se af un an heemli na links un rechts un spinnt al dat neegste scharpe Aventüer oder plaant so ganz bilütten een gräsigen Mord an’e Nordsee . . .

 

Infos: www.erotik-op-platt.de und www.birgitpauls.de

Felicitas erotische Vertellen“, Candela-Verlag, 9,90 Euro, ISBN 978 3 942635 18 9

Voriger Artikel
Nächster Artikel
Mehr aus Nachrichten auf Platt 2/3