16 ° / 10 ° Regenschauer

Navigation:
"Dat Platt-Theoter hett 'n hogen Stellenwert"

Heel erfolgreiche Speeltiet - Schnack mit Wolfgang Börnsen "Dat Platt-Theoter hett 'n hogen Stellenwert"

Na de groote Sommerpaus heet dat wedder: Wi haut een Slag rin bi de plattdüütschen Bühnen in't Land. Wolfgang Börnsen, de Böverste vun' Nedderdüütschen Bühnenbund in Sleswig-Holsteen, vertellt uns Blatt nich blots, wat in'e niege Speeltiet los is, sünnern ok, wat to doon is, üm dat Platt-Theoter in'e Tokunft to stüern. Wolfgang Börnsen över de Bilanz vun't Nedderdüütsche Theoter in uns Land: "Kloor is doch: Qualität sett sik jümmers dörch. De Bilanz wiest ut, datt Platt-Theoter hett middewiel een hogen Stellenwert. Un wi hebbt een vun’e erfolgreichsten Speeltieden achter uns."

Voriger Artikel
"Mudder, ik will föhrn"
Nächster Artikel
Düsse Dokter singt Arien op Platt

"Machos op Ies" weer een övergroten Erfolg vun'e Nedderdüütsche Bühn Kiel.

Hett de gode Bilanz ok wat mit de Anerkennen as Immaterielles Kulturerbe to doon. Vör twee Johr is dat Nedderdüütsche Theoterspeel vun’e UNESCO as „besonders schützenswert“ instuft wurrn.

De Anerkennen as Kulturerbe wirken na buten un na binnen. Na buten meent: Datt ok de Plattdüütschen een Kulturtradischoon un Kulturqualität hebben. Un na binnen: De Theoterlüüd hebbt markt: Wat wi maken, dat warrd anerkannt. Wi Theoterschauspeler sünd Deel vun’t Kulturerbe. Un denn is dat ok wat.

Wat bedüüd dat för de plattdüütschen Amateur-Bühnen in Sleswig-Holsteen?

Dat Weltkulturerbe, dat is een ganz düütliche Opwertung. Un vör allen Dingen een beten mehr Respekt för’t plattdüütsche Theoter. Dat sünd nich blots een poor verrückte Lüüd dor op’e Bühn. De Unesco seggt: Dat sünd Minschen, de schafft Identität.

Dat is wiss ok nödig. Denn över Plattdüütsches Theoter warrd jo oftins lacht. Dat hett bi veele den Status vunwegen „Klamauk op Platt“.

Platt-Theoter warrd vun bestimmte Lüüd ümmer noch ingruppeert as Beschäftigung vun Amateur-Schauspeler. Aver dat stimmt nich. Wat de Bühnen dor maakt, dat is profeschonelles Theoter. To’n Bispill bi ju in Kiel: De maakt acht niege Stücke in een Saison. Dat is een Leistung.

Liekers fehlt de Anerkennen, de dat Hochdüütsche Theoter kriggt.

Jo, dat stimmt. Plattdüütsches Theoter warrd jümmer noch so’n beten scheef ankeeken. Denn de arbeit to’n groten Deel jo mit Komödien. Aver dor steekt ok een Philosophie achter: De Lüüd mööt sik ok mol amüseern. In‘ Kiekkassen gifft dat överall blots Problemstücke. Aver de Minsch hett ok een Anrecht sik to freun. Dat Problem is blots – dat schüllt nich blots Komödien ween bit Platt-Theoter. De Mischen maakt dat. Dat mutt eben ok Stücke geven, de ut‘ Leven grepen sünd.

Meent se denn, datt de Lüüd solke Stücke sehn wüllt?

Unse Erfohren bi de Plattdüütschen Theoterdaag in Molfsee sünd: Dat Interesse för Problemstücke is dor. Un dat gifft sogor junge Autoren un junge Tokiekers.

Wie künnt se de Toschauer tofaat kriegen?

Man mutt de Toschauers niegeerig maken. De Plattdüütschen mööt oppassen, datt se de Breitschaft för’t Experimenteern nich verleeren doot. Op de anner Siet hett man aver ok een Verantworten för de Speeler, de Fördergelder willst du wiederhin hebben un över de Runn mutt man jo ok kamen. De Spagat is gor nich so eenfach.

Wo wi grad bi Fördergelder sünd. Woveel kriegt de Bühnen denn ut den groten Pott?

Dat mutt man sik mol kloor maken: Dat Hochdüütsche Theoter kriggt 700 Millionen Euro an Förderung. De plattdüütschen Amateurbühnen, de kriegt man graad mol een Perzent vun’e Fördergeller. De mööt sik jümmers na de Deek strecken.

Wat för Stücke mutt dat Platt-Theoter denn bringen un wat för Themen?

Bi de Stücke muttst du dat opnehmen, wat graad diskuteert warrd. Dat plattdüütsche Theoter dörft keen olet Volksschauspeel ween. De mööt moderne Themen opnehmen. Dat gifft twaars veele Autoren, de hochdüütsche Stücke översetten doot – aver wo wi mehr vun hebben künnt, dat sünd Autoren, de wat Nieges schrieven doot.

Siet twee Johr gifft dat den Konrad-Hansen-Pries för Stücke-Schriever. Wat is dorbi rutsuert?

Veel. Dorüm hebbt wi den Konrad-Hansen-Pries jo op’n Wech bröcht. 40 Insendungen hett dat geven. Dat wiest doch, datt dor junge Autoren sünd, de Stücke schrieven doot. Ok Problemstücke. Un denn maakt wi achterran jo noch so’n Autoren-Warksteed. Wi beden Autoren, de mitmaakt hebbt: Kaamt in’e Theoterwarksteed. De fehlt jo blots dat letzte Theoterwarktüüch. Dat geevt wi se mit. Denn ahn Stücke hest du keen Theoter.

Se sölben schrievt jo ok plattdüütsche Stücke. Mehr wat to’n Lachen oder mehr wat ut’e Geschicht oder Problemstücke?

Ik heff nu graad een nieges Stück schreven „Lüüd, Luther un de Düvel“. De jüngste Deern, de dor mitspelen deit is acht, de öllsten sünd 86. Un dortwüschen tummeln sik noch ganz veele. Dat is een gewaltig Experiment. Aver man mutt ok mol wat anners maken. De Plattdüütschen dörft sik dor nich drücken.

Dat heet: Ran an’e Kinner – Wat löppt dor denn för Kinner in’t Platt-Theoter?

Platt-Theoter mutt Generaschoonen-Theoter ween. Un dat löppt. Wi hebbt dat nu all tweemol bi dat Kinnertheoterfestival in Molfsee sehn. Dor weern jedeen Johr tein Gruppen mit dorbi un 250 Kinner, de mitmaakt hebbt.

Hett de Lannesplan Niederdeutsch vun’e Lannesregeern dorbi holpen – de is jo nu all twee Johr in’e Gang?

Jo, kloor. Dor sünd nu all veele Kinner in unse Jugendgruppen mit dorbi, de vun de doren Projektscholen Plattdüütsch kaamt. Ahn dat Programm weern wi nich so wiet kamen. Aver ok de Theoter-Warksteeden op’n Scheersbarg speelt een grote Rull. De gifft dat nu all 25 Johr. Un wi arbeit mit den Heimatbund tosamen, mit de beiden Platt-Zentren.

Wat hett de Bühnenbund noch vör, dormit dat Plattdüütsche Theoter een Tokunft hett?

Wichtig is nu noch: Wi bruken junge Regisseure för unse Tokunft. Uns schweevt dor so’n Ort Meisterkurs vör. Oder wi schickt de Lüüd as Praktikant mit Profi-Regisseure los. Op jedeen Fall warrd dat een Regie-Warksteed geven.

So’n Theoterstück kust jo veel Geld. De Kulissen, de Regiseure, de Kostüme . . .

Genau - Wi mööt mehr koopereern. Ok mit de hochdüütschen Bühnen oder mit de groten Bühnen as dat Ohnsorg-Theoter. Wi mööt dat Theoter un de Technik vun’e Hochdüütschen nutzen. Üm een Stück Innovaschoon to kriegen.

Siet twee Johr hebbt se ok Botschafter för’t Platt-Theoter. Woto schall dat good ween?

Wi mööt ok för’t Plattdüütsche Theoter warben. Dorför hebbt wi uns plattdüütsche Botschafter. Verleden Johr weer dat Peter Brix, düt Johr is dat Sabine Kaack. De Lüüd schüllt sehn: Dat gifft een hochdüütsche Kulturszene, de ehr Wutteln in’t Plattdüütsche hett.

Künnt de Medien dor nich ok mithölpen? Wat wünscht se sik?

Vun’e Zeitung wünsch ik mi, datt wi vun’t Plattdüütsche Theoter nich jümmer ünner „ferner liefen“ staht. In  Kiel maakt se profeschonell godes Theoter. De hebbt 150 Vörstellen un 14 800 Toschauers. Dat mutt man den Chefredakteur mol verpuuln, woveele Lüüd dor Interesse an hebbt. Denn schall de dat ok mol na vöörn bringen. Dat is wiss exootsch – aver worüm denn nich?

Voriger Artikel
Nächster Artikel
Mehr aus Nachrichten auf Platt 2/3