Menü
Kieler Nachrichten | Ihre Zeitung aus Kiel
Nachrichten auf Platt Dat is en Premiere op Platt
Nachrichten auf Platt Dat is en Premiere op Platt
Partner im Redaktionsnetzwerk Deutschland
12:00 21.09.2018
Von Heike Thode-Scheel
Anna Brodersen an ehrn kommodigen Arbeitsdisch in Flensborg. Quelle: th

Egens harr se also mit plattdüütsche Schrievregeln so gor nix an‘ Hoot: „Dor heff ik mi ok gor keen Kopp över maakt. In’t Seminar heff ik mol `ne Mitschrift maakt op Platt. Een Woort so un een so. Ik heff enfach na Gehöör schreven“, vertellt de Deern vun‘ Buernhoff, de tohuus mit ehr Öllern, mit ehr Broder un Swestern un mit Oma bloots Platt schnacken deit. Schnacken is eens – aver Schrieven? Se winkt aff: „Dat weer Kruut un Röven vörher.“ Schrievregeln? Wat schall dat denn? „Worüm bruuk ik dat?“,  weer ehr Meen. „Ik harr doch de hochdüütsche Schrievregeln in’e School liert“, vertellt de Studentin „worüm schull ik dat denn noch mol op Platt maken?“

Un so is se ok an ehr Arbeit rangahn: „De eersten beiden Sieden sünd kumplett so schreven, as ik Lust harr“, smuustert se. Man dat hett sik gau ännert. So steiht dat ok in ehr Bachelor-Arbeit binn: „Vun hier op an warrd na de Sass‘schen Regeln schreven. Worüm, warrd dütlich maakt . . .“  Un dat weer nich blots, wieldatt ehr Mama böös lacht hett över ehrn viegellienschen Schrievstil. Anna Brodersen verklookfidelt dat: „Ik heff eenfach markt: Wenn jeder so schrifft, as he Bock hett, warrd dat nix mit Platt in’e School.“

Bi ehr weer dat so, datt se eerst schnacken liert hett – un denn dat Schrieven. Platt schnacken is bi ehr Tohuus nämli ganz normol. Hochdüütsch is op’n Buernhoff vun ehr Familie in Hattstedt-Feld i Husum en Fremdspraak. „Wi sünd sowat vun Plattdüütsch!“, meent ehr Vadder Thomas Brodersen „Wi schnacken blots Platt mit’e Kinner.“ Un denn weer dor noch de Saak mit den Kinnergoorn: „Dor kümmt Anna na Huus un hett uns wat op Hochdüütsch fraagt. Dor hebbt wi gor nich op reageert. Un denn weer goot. Denn hett se ok wedder Platt schnackt“, lacht Thomas Brodersen.

Egens is Anna Brodersen dormit jo sotoseggen mit „Idealbedingungen“ groot wurrn. Wo gifft dat hüüt noch sowat, datt de Familie kumplett Platt schnacken deit? Ümso wichtiger is ehr, datt se de Spraak wiedergeven kann: „För mi is dat wat Besünneres, datt ik Platt studeern kann. Un dat maakt mi ok so’n Spaaß“, jubileert de Buerndeern. „Ik kaam echt goot dörch’t Studium. Aver ik bün nich dejenige, de sik achter Böker klemmen deit“, winkt se af. So ganz stimmt dat nich. Denn för ehr Arbeit hett Anna Brodersen meist twee Weken in’e Bökerie vun’t Institut för Nedderdüütsche Spraak in Bremen (INS) tobröcht: „Ik bün dor regelrecht introcken“, lacht se, „boah, un wat ik dor för Böker in‘e Hand harr! Sass -  noch in Fraktur. Urole Extra-Utgaven. Un op eenmol weer dat so spannend“, swöögt se. Denn: „Ik lees nix, wat mi nich intresseern deit. Dat hett `n anner Stellenwert, wenn du dor Lust op hest“, dor is sik de Lehramts-Studentin seker. „Un denn künnt sogor Rechtschriev-Regeln spannend ween“, smüüstert se.

Stütt un Stöhn geev dat aver nich blots vun ehr Familie un vun’t INS, sünnern vör allen Dingen ok  vun Robert Langhanke. He is an’e Europa-Uni Flensborg för den Studiengang Nedderdüütsch tostännig. „Ik schriev de Arbeit op Platt, heff ik em seggt“, vertellt Anna Brodersen. So ganz glöövt hett he ehr dat wull nich toeerst, aver: „He hett mi denn ermutigt, ik schull dat man maken. Un he hett mi wunnerbor begleitet“, swöögt de Studentin. „Wi ünnerhoolt uns denn ok op Platt un ik schriev em ok plattdüütsche mails. Un he antwurt ok plattdüütsch.“   Ok Perfesser Dr. Willy Diercks weer mit vun’e Partie. He weer de Tweet-Korrektor. Dat mit dat Korrektur-Lesen is jo ok so’n Saak. Dat kann natürli ok lang nich jedeen. Dor hett se Glück hatt mit de beiden Platt-Experten.

 Un wat is dor nu bi rutsuert? Vunwegen richtig schrieven oder nich? „Wi bruken de Richtlinien. Wi künnt de Schoolkinner nich Platt bibringen, wenn wi keen Rechtschrieven hebbt.“ Dat weet Anna Brodersen intwischen nipp un nau. Dat hett se op 37 Sieden fastholln. In de eerste Bachelor-Arbeit op Platt in Sleswig-Holsteen. Un dorför hett de Plattschnackerin een glatte 1 kregen.

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!

Twintig Johr Stütt un Stöhn för uns Regionol- un Minnerheitenspraken

Dat is dat Johr 1993. Dor lanndt en Groot Anfraag an‘ Bunnesdag op’n Disch vun‘e domolige Bunnesdagspräsidentin Rita Süßmuth. Op Hoch- un op Plattdüütsch. Dat verstött domols noch gegen de Geschäftsordnung vun‘ Bunnesdag:  „Wo liggt dat an, dat de Bundesregeern dat Nedderdütsche bet nu hento nich anmellt hett för de Charta? Hett se vör un will dat noch anmellen? Wenn nich, wat höllt ehr trüüch?“, hett de Bunnesdags-Afgeordnete Wolfgang Börnsen driest fraagt. Un dor weern noch veele annere Afgeordnete vun’e CDU/CSU, vun’e SPD, de FDP un de Grönen mit vun’e Partie. An‘ 19. Mai 1994 hett de Bunnesdag denn endli uns Moderspraak mit in Deel II vun’e Charta rinsett., üm „die Schutz- und Förderwürdigkeit dieser Sprache auch im internationalen Rahmen des Europarates zu dokumentieren.“ Veer Johr later, an’ 13. September 1998 is de „Europäische Charta der Regional- und Minderheitensprachen“ vun Düütschland ratifizeert wurrn.

Heike Thode-Scheel 06.09.2018
Nachrichten auf Platt „Tweemal in’t Johr swet de Buer: bie de Aust un bi de Austkost“ - „Dat letzte Foder is nu vull"

„Dat letzte Foder is nu vull, de Haverkoppel rein, bald geiht dat werrer an för dull mit Plögen, Eggen, Sei 'n, - De Aarnkranz bummelt an de Stang . . . Hüül Bruun un Bleßvoß, forsche Gang! To't Juuchföhr paßt keen Alldaagsschritt . . ." riemelt de Dichtersmann Klaus Witt in sien Aarn-Gedicht „Juuchföhr". Een Juuchföhr, dat weer de letzte Föhr in de Aarn. De „Jubelfuhre" sotoseggen. Denn weern de Buern endli trech mit de Aarn. Wat weer dat anno dunnemol för’n Aggewars: „Wat hett dat vele Arbeit köst, wat hebbt se faken sweten müßt . . .“, riemelt Lüder Woort in sien Gedicht „De Aarn“. Dat weer eben all’ns noch Handarbeit: „De Grootknecht meiht vöran; sin Swad nimt ut de Grotmagd, binnet dat. Denn folgt en Meiher achter er un denn en Binnersch achterher“, so heet dor in’t Gedicht wieder. Vun morrns, wenn de Sünn opgeiht, bit avends, wenn’t düüster warrd – dat is de Töörn bi de Aarn. Optletzt weern de Arbeitslüüd  „poggenmööd, schachmatt oder möd as’n Kater“. Oder: „Hüüt hebben wi uns ornlich de Knaken mör makt.“

Man nu stünn endli dat letzte Foder in’e groot Deel. Nu weer’t sowiet: Tiet för’t Fiern.

Heike Thode-Scheel 22.08.2018
Nachrichten auf Platt Mit roden Teppich un all de plattdüütschen Stars - Platt-Gala in't Opernhuus

Dat hett dat noch nienich geven in Kiel: En groot Platt-Gala in’t Opernhuus mit all de berühmten Platt-Stars, mit’n roden Teppich, en Aftershow-Party un all den Tüdelüüt, de to so’n Event passen deit. An‘ 8. September heet dat för uns Plattdüütsche: Schapptüüch rutholen,   fein anplünnen, de Hoor op Schick bringen, de Schoh wienern un denn man los – af to Stadt.  Üm Klock acht is dat sowiet. Denn heet dat: Vörhang op för Platt. Mit Theoter, Comedy, Musik, Poetry-Slam un Vertellen. Mit all’ns, wat de Platt-Stars künnt: Op een Gala, an een Avend, op een Bühn. 

17.08.2018