Menü
Kieler Nachrichten | Ihre Zeitung aus Kiel
Nachrichten auf Platt Dat löppt för Jacqueline
Nachrichten auf Platt Dat löppt för Jacqueline
Partner im Redaktionsnetzwerk Deutschland
06:00 20.09.2015
Se hett veele Talente: Jacqueline Lindemeyer Quelle: Ines Barber

Liekers - wat weer dat för ehr opregend, de plattdüütsche Poetry Slam vun NDR 1 Welle Nord in`t Kieler Lanneshuus in`t Fröhjohr. Dat eerst Mol mit all de „olen“ Hasen . . . un denn glieks mit Livestream-Kameras, Radioreporter un alln’s, wat een kribbelig un hibbelig maakt. Man dat leep allerbest.

 

Se fallt op. Se is jung un keck. Un in de Platt-Poetry-Slam-Gemeende de Jüngste

 mit ehr twintig Johr. De Flensborger Deern hett Platt vun ehr Modder mitkregen. Un denn keem, as för so veele junge Lüüd, de Wettbewarv „Schölers leest Platt“, so güng dat los. Se weer glieks Füer un Flamm. Un natürlich hett se för ehrn Opa an hoge Fierdaag wat op Platt to‘n Besten geven. 2014 harr se ehr Abi in‘e Tasch, denn noch fix een FSJ in Schleswig bi de Stadtbökerie  achterran un nu warrt studeert. Dat löppt bi de junge Plattsnackerin!

Jüst so as op de Bühn. Dor löppt dat bi ehr ok graad richtig good. De Slam-Texte fallt ehr spontan in. Dor sünd lustige Themen bi – aver ok ernsthaftige. Man de, so Jacqueline Lindemeyer, de schrifft se eegens lever op Hochdütsch. Dat dreiht sik ok geern mol üm Bio un Chemie.To‘n Bispeel in den Text:

„He is weller dor oder ok: Schon wedder scheef gahn“. Dor kümmt Einstein wedder ut sien Kist rut un dröppt Elvis, de sik graad een Putt Ravioli in’e Mikrowell warm maken will. Un denn galoppeert de snaaksche Geschicht los . . .

Dat Publikum freit sik över düsse splienigen Texte un de frische Deern op de Bühn. Gifft jümmers`n Barg  Applaus.

 

Plattdütsche Vörbiller, de hett Jacqueline Lindemeyer ok: De Stars ut Büttenwarder, also Peter Heinrich Brix un Jan Fedder, de kann se besünners goot lieden. Se is eben ok een echte norddütsche Plant – so as de beiden Fernseh-Stars. Wohl föhlt se sik an‘e Nordsee, op Sylt. Dor, wo nich soveel Rummel is. Dor hoolt se deep Luft un kümmt wedder op niege, viegelliensche Ideen.  De sabbelt se fix an Ort un Stell in`t Handy rin oder kliert se ok mol op‘e Zeitung rop. Blots keen gode Idee vertüdeln. Richtig rein un akuraat schreven warrt denn eerst tohuus an‘ PC. Un wenn se denn erstmol een gode Gedanke hett, denn flutscht dat, denn schrifft se dat in eens rünner, vertellt de plietsche Deern mit‘n Smuustern.

 

Jüst hett se ok mitmaakt bi‘n plattdüütschen Poetry Slam op‘e Nordart in Büdelsdörp. Twaars höörte se nich to de eersten dree – aver dat speelt keen Rull. Dat is wedder een Schritt vöran. Se mach dat Slammen to geern un strohlt all wedder mit‘e Sünn üm’e Wett. Dat löppt. Op‘e Bühn mit Platt un all de „olen“ Hasen as Jan Graf, Gerd Spiekermann oder Slam-Meister Sven Kamin. Un an‘e Uni mit Bio un Chemie. Sowieso.

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt De niege Matthias Stührwoldt:Fienföhlig un week - "Vadder un ik, wi harrn dat nich eenfach miteenanner"

„Den ganzen Winter güng mi de Kraam dörch’n Kopp –aver ik heff dat liekers nich opschreeven. Dat duerte noch – dor bruukte ik noch Tiet to. Tatsächli bün ik denn in‘ Fröhjohr eerst Mol Silo fohrt un heff Heu maakt. Un denn, twee Weeken vörher, beför mien Verleger dat hebben wull, dor keem dat so in eene Welle rut ut mi. Tein Daag heff ik schreeven . . .“ Wat dorbi rutsuert is, dat sünd nich de typischen kandidel Vertellen vun Biobuer un Schrieversmann Matthias Stührwoldt, dat is ok keen Roman un keen Sülbst-Biographie, dat is „keen Book blots to’n Lachen, aver dat is ok keen Book blots to’n Blarrn“ (so Stührwoldt): „Vun Vadder un mi“ is vun all’ns wat – vör allen Dingen aver över Geföhle un Befindlichkeiten.

Heike Thode-Scheel 04.09.2015
Nachrichten auf Platt Fröher güng dat mit de Lee los - hüüt sitt man in' Skyline-Kabin - Aarn: En suer Stück Arbeit

„Dat Korn is tidig, intoaarn;

 „Man to! De Lee her, glik ant haarn!“

So seggt de Bur to sine Knecht.

De Knechte makt de Lee torecht;

Se slat de Sticken in de Eer

Un leggt de Lee darawer her

Un hamert jümmer: pick! Pick! Pick! . . .

 

Un denn geiht dat los mit de Aarn anno 1850. De plattdüütsche Schrieversmann Lüder Woort (Johann Diedrich Plate) hett dat in sien Gedicht „De Aarn“ wunnerbor fastholln: Woans de Knechte de Lee eerst mit’n Hammer scharp maken doot. Un denn:

Heike Thode-Scheel 21.08.2015
Nachrichten auf Platt "De Spökenkieker" - De niege Asterix op Platt is dor - Düsse Keerl is'n Windbüdel

Miraculix un Asterix sünd sik eens: Düsse vermaledeite Sluderfix, düsse Spökenkieker, de bi Nacht un Nevel, Blitz un Dunner miteens bi se in’e Döör stünn, de is nix wieder as‘n Heiopei, `n Lurendreiher, Lögenpeter, Glattsnacker un vör allen Dingen: En ganz groten Windbüdel! Wenn man blots de annern op se höörn wulln. Aver de sünd jo Füer un Flamm för den Frömden, de se den Heven op’e Eer vörutseggen deit. Un pücke Kleedaasch, dat schöönste Huus, een Barg Juwelen un natürli Riekdom un Schönheit . . . „Ok wenn Asterix dor nix op gifft: All de annern Minschen in de olen Tieden  wüllt geern vörher weten, wat op jüm tokümmt . . .“ so steiht dat schreven in den niegen plattdüütschen Asterix Band Nr. 5: „De Spökenkieker“.

Heike Thode-Scheel 10.08.2015