12 ° / 8 ° Regen

Navigation:
Dat löppt för Jacqueline

Platt, Poetry-Slam, Bio, Chemie: En Deern mit veele Talente Dat löppt för Jacqueline

De junge Fro mit de brunen korten Hoor strohlt. Kannst seggen: Dat löppt för Jacqueline Lindemeyer. Ehr gröttste Wunsch düt Johr weer jo een Studienplatz in Kiel för Bio un Chemie. Hett klappt. Düssen Harvst geiht` dat los. Un nevenbi wart slammt. Also, de Deern ut Groß Jörl steiht mol mit hochdütsche Texte un bannig geern mit plattdütsche Texte op Poetry Slam – Bühnen in`t Land. Dat bedüüt, se mutt tosomen mit anner plietsche un fixe Schnackers in een Aart Dichter-Wettstriet.  In verscheden Runnen performt se ehre Texte gegen anner  Lüüd – so seggt se hüüt, also se mutt se mit Hannen un Fööt un Stimm un Mimik allerbest vördrägen. Se wuppt dat.

Voriger Artikel
"Vadder un ik, wi harrn dat nich eenfach miteenanner"
Nächster Artikel
Heimat is keen Placken Eer

Se hett veele Talente: Jacqueline Lindemeyer

Quelle: Ines Barber

Liekers - wat weer dat för ehr opregend, de plattdüütsche Poetry Slam vun NDR 1 Welle Nord in`t Kieler Lanneshuus in`t Fröhjohr. Dat eerst Mol mit all de „olen“ Hasen . . . un denn glieks mit Livestream-Kameras, Radioreporter un alln’s, wat een kribbelig un hibbelig maakt. Man dat leep allerbest.

 

Se fallt op. Se is jung un keck. Un in de Platt-Poetry-Slam-Gemeende de Jüngste

 mit ehr twintig Johr. De Flensborger Deern hett Platt vun ehr Modder mitkregen. Un denn keem, as för so veele junge Lüüd, de Wettbewarv „Schölers leest Platt“, so güng dat los. Se weer glieks Füer un Flamm. Un natürlich hett se för ehrn Opa an hoge Fierdaag wat op Platt to‘n Besten geven. 2014 harr se ehr Abi in‘e Tasch, denn noch fix een FSJ in Schleswig bi de Stadtbökerie  achterran un nu warrt studeert. Dat löppt bi de junge Plattsnackerin!

Jüst so as op de Bühn. Dor löppt dat bi ehr ok graad richtig good. De Slam-Texte fallt ehr spontan in. Dor sünd lustige Themen bi – aver ok ernsthaftige. Man de, so Jacqueline Lindemeyer, de schrifft se eegens lever op Hochdütsch. Dat dreiht sik ok geern mol üm Bio un Chemie.To‘n Bispeel in den Text:

„He is weller dor oder ok: Schon wedder scheef gahn“. Dor kümmt Einstein wedder ut sien Kist rut un dröppt Elvis, de sik graad een Putt Ravioli in’e Mikrowell warm maken will. Un denn galoppeert de snaaksche Geschicht los . . .

Dat Publikum freit sik över düsse splienigen Texte un de frische Deern op de Bühn. Gifft jümmers`n Barg  Applaus.

 

Plattdütsche Vörbiller, de hett Jacqueline Lindemeyer ok: De Stars ut Büttenwarder, also Peter Heinrich Brix un Jan Fedder, de kann se besünners goot lieden. Se is eben ok een echte norddütsche Plant – so as de beiden Fernseh-Stars. Wohl föhlt se sik an‘e Nordsee, op Sylt. Dor, wo nich soveel Rummel is. Dor hoolt se deep Luft un kümmt wedder op niege, viegelliensche Ideen.  De sabbelt se fix an Ort un Stell in`t Handy rin oder kliert se ok mol op‘e Zeitung rop. Blots keen gode Idee vertüdeln. Richtig rein un akuraat schreven warrt denn eerst tohuus an‘ PC. Un wenn se denn erstmol een gode Gedanke hett, denn flutscht dat, denn schrifft se dat in eens rünner, vertellt de plietsche Deern mit‘n Smuustern.

 

Jüst hett se ok mitmaakt bi‘n plattdüütschen Poetry Slam op‘e Nordart in Büdelsdörp. Twaars höörte se nich to de eersten dree – aver dat speelt keen Rull. Dat is wedder een Schritt vöran. Se mach dat Slammen to geern un strohlt all wedder mit‘e Sünn üm’e Wett. Dat löppt. Op‘e Bühn mit Platt un all de „olen“ Hasen as Jan Graf, Gerd Spiekermann oder Slam-Meister Sven Kamin. Un an‘e Uni mit Bio un Chemie. Sowieso.

Voriger Artikel
Nächster Artikel
Mehr aus Nachrichten auf Platt 2/3