Menü
Kieler Nachrichten | Ihre Zeitung aus Kiel
Nachrichten auf Platt De Medizinschapp vun'e Buern
Nachrichten auf Platt De Medizinschapp vun'e Buern
Partner im Redaktionsnetzwerk Deutschland
10:24 25.09.2017
Von Heike Thode-Scheel
Lecker: Fleederbeern in'e Harvstsünn. Quelle: th
Anzeige

Wokeen nu nich an den doren Töverkraam glöven will, de weet doch tominnst, datt de Fleederbeerbusch so’n Aart „Medizinschapp“ is för de Minschen. Dat wüss all de antike Dokter Hippokrates över den Holderbusch. „Er ist ein nützlicher Strauch“ steiht in een oles Naturbook schreeven. De Wetenschapler hebbt rutfunnen, datt in nahto alle Deele vun den Fleederbeernbusch „wirksame Inhaltsstoffe“ binn sünd. Vun de Beeren kann een Saft kaken. De hölpt op’t Best, wenn du verköhlt büst un Wehdaag in‘ Hals hest. Denn dor is veel Vitamin C binn un verscheden Mineralien. Dor kümmt man ganz schön in’t Sweeten . . .

 Ut de Blöten warrd Tee maakt gegen Fever, Verköhln, Akne un Blosenentzünden. Un wenn man de witten Blöten opkaken deit, hölpt de as Ümsläge gegen Prellungen un Ohrpien. De Rinde schall good gegen Neuralgien ween un gifft as Tee dat Hart Stütt un Stöhn. Aver Vörsicht: De Bläder, Beeren un Samen sünd giftig, wenn  se roh eten warrd. Dor is nämli Sambunigrin binn – un dor kriggt man Dörchfall vun, man mutt spucken, kriggt Krämpfe un kriggt keen Luft mehr. Dörch’t Kaken zerfallt dat Gift – un denn is dat allerbeste Medizin.

De Fleederbeerbusch höört sogoor mit to de öllsten wilden Heilplanten. Holunderbeerkerne hett man all blangen Pfahlbuten ut’e Steentiet funnen. De olen Germanen hebbt ünner’n Hollerbusch ehr Göttin Holla Opfer bröcht. Un för de Römer weer Fleederbeersaft „göttliches Blut“. Dat würr mit Wien vermengeleert, dormit de schön rood utsehn de.

Aver se hebbt nich blots den Wien mit den Beerensaft farvt, sünnern ok Ledder un sogor ehre Hoor. So plietsch weern unse Vörfohrn. Dor kiekt sik hüüttodaags sogor de dore Lebensmiddelindustrie noch wat vun af: De farvt nich mehr mit künstliche Stoffe, de nehmt nu Fleederbeersaft un haut dat in sööten Slickerkraam rin un in‘ Joghurts un Marmeloden. Mit Fleederbeersaft kannst sogor molen: Uns grooten norddüütschen Moler Emil Nolde harr jo een Farv besünners geern: Rotviolett: „Mit Holunder- und Rotebeetesaft machte ich Malversuche, ich mochte so gern die rotviolette Farbe . . .“

Egol, wat  en all’ns mit Fleederbeern opstellen kann: För mi gifft dat nix beteres as unse sleswig-holsteensche Fleederbeersupp. Mit Fleederbeern frisch ut’n Knick un mit de fienen, suuren Boskopp-Appeln ut’n Goorn! Un mit Grießklümp, de in de düüsterviolette Supp swimmen doot. „Morgen fröh, wenn allens glückt, morgen fröh, denn ward se plückt!“ Dat kannst glöven! Un kaam mi nich in'e Mööt!

Kommentare
Die Debatte geht am Morgen weiter
Die Kommentarfunktion ist zwischen 23:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt "Plattdeutsch ist (k)eine Kunst" - Nieges Book - Grote Kunst op Platt verklaart

Kunst hett veele Sieden – mol schön, mol viegelliensch, mol snaaksch, mol klor un düütli, mol niemoodsch un mol oldbacksch, mol bunt as’n Regenbogen un mol gries as Regenwedder in Sleswig-Holsteen. Un jüst so is dat ok mit uns Mundarten, meent Schrieversmann un Ideensammler Hartmut Ronge: „Dialekte machen großen Spaß, sind originell und reizvoll – Plattdeutsch ist eigenständig und direkt, manchmal deftig, aber immer liebenswert und sehr lebendig“, meent de Experte för Kommunikation un Marketing. Ut Kunst un Dialekt hett he nu wat feines tosamenschoostert: „MundArt“ heet de Reeg mit Böker över Kunst un Mundart. Eens dorvun is wat för Plattschnacker, de för Kunst swögen doot: „Plattdeutsch ist (k)eine Kunst“.

Heike Thode-Scheel 11.09.2017
Nachrichten auf Platt Plattdüütsche Narichten: Vun Afgas-Schandaal bit G20-Krawall - 40 Johr Nieges ut alle Welt

De eerste plattdüütsche Naricht in’t Radio weer man blots veertein Sekunnen kort: „De Tall vun de Arbeitslosigkeit in de Bundesrepublik is in‘ verleeden Maand wieder daal gahn. Se steiht nu op 911 239.“ Dat weer 1977 op de Hansa Welle vun Radio Bremen. Middewiel höört de Platt-Narichten in’t Programm rin as de Bodder op’t Broot. Vun Maandag bit Sünnavend heet dat bi Bremen eins: „De Klock is halvi ölben – de Narichten“. Un dat siet veertig Johr.

Heike Thode-Scheel 07.09.2017
Nachrichten auf Platt Johannes Callsen is de niege Minnerheiten- Beopdragte - Hier sünd de lütten Spraken Chefsaak - ok Platt

„Wenn man Platt schnackt, erleichtert das den Zugang zu den Menschen. Ich selbst habe früher kein Platt geschnackt, meine Eltern haben mit mir Hochdeutsch gesprochen und untereinander Plattdeutsch. Aber meine Oma hat nur Plattdeutsch mit uns geschnackt“, vertellt Johannes Callsen op Hochdüütsch. „Ich hab‘ das noch in den Ohren . . .  ik kann ok Platt schnacken“, smuustert he un denn is de Angliter Jung  ok all an’t Vertellen – op Platt, wech vun’t Hochdüütsche, wat he eegens för offizielle Termine schnacken deit: „Ik bün een heimatverbunnen Minschen“, sineert Johannes Callsen. „Ik leev hüüt noch op uns olen Hoff in Angeln. Dat sünd de Wötteln vun mien Leven un vun miene politische Arbeit.“ De Wötteln, vör allen Dingen de plattdüütschen, de kann he bi sien niege Opgaav op’t Best bruken. Denn Johannes Callsen is de niege „Beauftragte des Ministerpräsidenten in Angelegenheiten nationaler Minderheiten und Volksgruppen, Grenzlandarbeit und Niederdeutsch“. Oder kort un knapp: De niege Minnerheitenbeopdragte.

Heike Thode-Scheel 18.08.2017
Anzeige