20 ° / 8 ° heiter

Navigation:
De Stüerfru is endi an Bord

Lännerzentrum Nedderdüütsch maakt sik an'e Arbeit De Stüerfru is endi an Bord

„Neue Chefin für Niederdeutsches Länderzentrum – Christianne Nölting warrt Baas vun’t Lännerzentrum in Bremen un Hamborg, Neddersassen  un Schleswig-Holsteen sitt mit in’t Boot“ -  quiddert de Pressesteed vun‘ Bremer Senat. Siet 1. März hett dat niege Lännerzentrum för Nedderdüütsch (LZN) nu also en Geschäftsführerin. Knapp dree Maande is dat nämli  all her, datt de Länner Bremen, Sleswig-Holsteen, Hamborg un Neddersassen dat niege Platt-Zentrum op’e Been stellt hebbt. Stütt un Stöhn kriggt dat LZN vun’e veer norddüütschen Länner. Un twaars 271 000 Euro: Neddersassen övernimmt mit 117 000 Euro den gröttsten Deel, Bremen stüert 80 000 Euro dorto, Sleswig-Holsteen 42 000 un Hamborg 30 000 Euro. Dat is jüst dat Geld, wat de Länner över veertig Johr lang dat Institut för Nedderdüütsche Spraak (INS) in Bremen tostüert hebbt.

Voriger Artikel
Platt in' Kopp un in't Hart

De Utbillen vun Schoolmeister an'e Uni höört to de Opgaven vun't LZN.

Quelle: pae

INS un LZN

Liekers:  „Dat INS leevt“ – verseekert dorgegen INS-Mitarbeiter op ehr Internetsiet as  Levensteken. Denn in‘ Mai 2016 hebbt de veer Bunneslänner de Tosamenarbeit mit dat INS opkünnigt  – na 44 Johr. An‘ 31. Dezember 2017 weer denn Sluss mit’e Fördergelder för’t INS. Dat schull denn jo wat ganz Nieges geven: Dat „Länderzentrum Niederdeutsch“:  „Um die wichtige Arbeit zum Erhalt des Niederdeutschen fortzusetzen, werden wir gemeinsam eine neue leistungsstarke und länderübergreifende Koordinierungs- und Netzwerkstelle einrichten“, hett uns Kulturministerin Karin Prien verleden Johr in en Pressekonferenz seggt. De gemeennützige GmbH schull an‘ 1. Januor mit’e Arbeit anfangen. Man schiet di wat. Dat geev keen Adress, keen Telefonnummer, dat geev keen Zentrum un dat geev ok keen Mitarbeiter, as dat niege Johr dor weer: „Der Blick ins Nichts“ stünn opsternaatsch in groote Bookstaven in’e „Taz“ binn. Tominnst düüker an‘ 9. Januor endli en Internetsiet op.

Christianne Nölting övernimmt

Man nu schall dat frischen Wind geven. Mit Christianne Nölting. De Plattschnackerin, Schrieversfru un Redakteurin hett en groot Hupen an Arbeit vör sik. Denn dat gifft jümmers noch keen Büro un keen Mitarbeiter. De mutt se nu eerst Mol söken. De Saak mit dat Büro süht se ganz locker op de Pressekunferenz un amüseert sik: „Ich werde reisen und mich sehr stark in den Ländern zeigen . . .  Ich werde in meinem Auto wohnen“. Dat kann lang duern mit dat Auto, denn Dr. Andreas  Mackeben vun‘  LZN-Opsichtsraat is sik seker: „In den ersten 100 Tagen wird sich Frau Nölting . . . den administrativen Dingen widmen. Dazu gehören die Klärung der barrierefreien Räumlichkeiten, die Besetzung von zwei weiteren Stellen (wissenschaftliche Mitarbeit und Assistenz) und der nachhaltige Aufbau eines Internetportals mit starkem Servicecharakter und Lehrangebot".

De Opgaven vun’t niege LZN

„Im Fokus der Arbeit werden der Schutz, der Erhalt und die Weiterentwicklung der niederdeutschen Sprache stehen“, so steiht dat in‘e Pressemitdeelen vun’n Bremer Senat. Wat dat heet? Dat LZN schall eng mit Verbänne, mit de Wetenschap un all de Ehrenamtlichen tosamen arbeiten. Un natürli mit’e Politik un de Maaten vun‘ Bunnesraat för Nedderdüütsch. Bildung un Kultur staht ganz baven in’t Programm, aver dat Zentrum schall sik ok „in übergreifende Themen und das öffentliche Leben einbringen, wenn niederdeutsche Themen berührt sind“. So steiht dat böös vigeliensch in’t Papeer binn. De  plattdüütsche Spraak schall also op moderne Aart un Wies an’e Lüüd bröcht warrn. Un natürli an‘e Scholen un Kinnergoorns. Dorbi hett dat LZN de Opgaav, dat, wat ut‘e Wetenschap rutsuern deit, ok „anwendungsorientiert“ wiedertogeven.

Swore Kost also – man Christianne Nölting is nich bang: „Mein Ziel ist es, eine engere Verzahnung . . . zwischen den beteiligten Ländern zu erreichen“, meent se wiss. Dat geiht ehr dorbi besünners üm‘e Kinner un üm‘e olen Lüüd. „Plattdüütsch bit to’n Abi“ – dat will se unbedingt op’n Wech bringen. Un Plattdüütsch noch mehr in’e Pleeg rintrecken. Kloor is: Se will nich blots bi de Theorie blieven – de Praxis is ehr heel wichtig. 

Duppelt höllt beter?

All dat, wat dat LZN nu op’n Zeddel stahn hett, dat maakt dat INS nu all siet Johr un Dag. Un will sik ok wiederhen as Vereen dorför insetten. Ok ahn staatliche Middel. Liekers verseekert Dr. Annette Schwandner vun’t  Ministerium för Wetenschap un Kultur in Neddersassen: „Doppelstrukturen machen überhaupt keinen Sinn“. Dat is ganz eenfach, meent se: Dat niege LZN is mehr „für das operative Geschäft und die Vernetzung zuständig“, bi‘t INS „liegt der Fokus stärker auf dem Bereich der Wisssenschaft.“ Se wünscht sik, datt beide Platt-Institute miteenanner tosamenarbeiten doot un sik gegensiedig Stütt un Stöhn geevt.

Wat is mit’e Kooperaschoon?

Op de Internetsiet vun uns Land düükert dat INS nich mehr op. Dorbi schall dat doch egens en Kooperaschoon geven twüschen dat LZN un dat INS. Verwunnert kann en ok op düsse Regen kieken: „Auch die Begleitung von wissenschaftlichen Arbeiten in diesem Bereich steht ganz oben auf der Agenda des Länderzentrums“. Komisch – denn  Annette Schwadner vun’t Kultusministerium in Neddersassen hett noch verleden Week in en Interview mit’e Kreiszeitung Bremen seggt, se wullen sik de Opgaven deelen – un datt se sik mit dat INS eens wurrn sünd. Vunwegen: Dat LZN maakt dat „vernetzende, praktische Geschäft“ un dat INS sorgt för Wetenschap.

Wokeen is nu för uns Plattdüütschen tostännig?

De bange Fraag is jo nu ok: Wat is mit uns Plattdüütschen? Mit de Vereene, mit de Verbänne un Krinks bi all dat Dörcheenanner mit de Tostännigkeit? Aver ok de Unis, de Scholen un de Kinnergoorns? All düsse Instituschoonen, de nu graad dorbi sünd, so richtig in Saken Platt lostoleggen, hangt siet Januor sotoseggen in’e Luft. Un dat warrd noch bit to’n Sommer duern, bit dat LZN so richtig Fohrt opnehmen kann. De Stüerfru is nu an Bord – man alle, de dor nu tosamen so fidel in’t Boot sitten doot, de mööt sik böös in’e Remen leggen, dormit dat nu endli ok mol vöran gahn deit mit dat LZN.

Voriger Artikel
Mehr aus Nachrichten auf Platt 2/3