Menü
Kieler Nachrichten | Ihre Zeitung aus Kiel
Nachrichten auf Platt Düsse Dokter singt Arien op Platt
Nachrichten auf Platt Düsse Dokter singt Arien op Platt
Partner im Redaktionsnetzwerk Deutschland
09:01 26.09.2016
Von Heike Thode-Scheel
Se maakt all'ns Platt: Tenor henning Kothe, Verteller Gerd Spiekermann un Grootmuulpopp Herr Momsen. Quelle: oh
Anzeige

Dr. Henning Kothe is eegentli Lungendokter mit‘n egen Praxis in Hamborg-Altona. De halve Week. De anner halve Week lang is he Tenor. Utbilldt, versteiht sik: „Ik heff Medizin un Musik studeert. In Lübeck. Ik bün den ganzen Dag op’e Ratzeborger Allee vun een Uni an’e anner fohrt“, smuustert de Bremer Jung. Bavento is Henning Kothe  Orgelspeler, Kabarettist, Klaveerspeler, Komponist un Schauspeler. Un Plattschnacker: „Mien Grootöllern, de kaamt alle vun‘ Hoff. Mien Vadder is Musiker, mien Modder Schoolmester. De hebbt tosamen Platt schnackt. Blots nich mit mi. Ik schull anständig Hochdüütsch schnacken.“

Liekers is de plattdüütsche Spraak in sien Ohr hangen bleven. Un jichtenswenn hett he denn mol mit Werner Momsen (den kennt he noch ut’e Schooltiet) un sien Klappmuulpopp tosamen een Optritt hatt . . . „un denn keem Spieki (Spiekermann) noch dorto un de hett denn seggt: Un nu maakt wi all’ns op Platt. So is dat ween. Un nu sing ik all mol in’t berühmte Ohnsorg-Theoter un Heidi Kabel kiekt mi vun’e Wand an un ik dink: Is dien Platt ok goot nuch?“

Kloor is sien Platt goot nuch. Wenn he tosamen mit Werner Momsen op’e Bühn steiht, denn sünd de Lüüd böös verbaast. Denn miteens singt he Arien as nix un sett sik an’t Klaveer un speelt mol so blangenbi Mozart un Beethoven: „Du muttst eenmol wiesen, datt du dat kannst. Denn künnt de Lüüd ok lachen.“ Vör allen Dingen, wenn de Tenor in sien Frack ok noch Platt schnacken kann.

„Du hest negentig Sekunnen Tiet. Wenn du de Lüüd denn nich hest, wenn du nich nich andock hest, denn is dat vörbi. Dat is op de Bühn so un bi miene Patienten ok.“

Henning Kothe is mit sik in‘ Reinen. Mit siene Musik un mit siene Medizin. Dat weer nich jümmers so un dat weer ok nich licht vör em. In sien Kinnertied hebbt de annern Jungs Football speelt un he hett Klaveer un Orgel speelt. „Mit 15 heff ik de Klassikplatten vun mien Öllern höört un de annern hebbt Pop un Rock höört. De hebbt blots mit’n Kopp schüddelt“, vertellt de Dokter. Ok later as Medizin- un Musik-Student harr he böös Malesche: „De hebbt mi jümmers fraagt: Büst du nu Künstler oder Mediziner? Büst du dat oder dat?“ Un denn hett he antert: „Ik bün dat eene un dat annere.“ Vundaag is all’ns goot. „Wenn ik dat eene nich maaken würr, den weer dat anner nich goot. Denn weer de Druck to hooch. Dat weer mi to wenig för’n Kopp. Dor föhl ik mi denn as so’n rechtsdrehenden Joghurt“, amüseert he sik.

 Sien plattdüütsche Klassik, de kümmt op de Bühn wunnerbor an. Un datt de Lüüd em mol fraagt hebbt vunwegen de Arien: „Un siet wann hest du dat? Gifft dat dor Pillen gegen?“ – dat is hüüt blots noch een Spaaß, den he geern mol to Anfang maken deit. „Kinners, wat ik hier maak, dat is keen Krankeit. Dat is Musik“, verklaart de plattdüütsche Tenor. Un miteens passt dat as de Deckel op’n Pott: Platt un Klassik un düsse viegelliensche Mischen ut Spaaß un Ernst. Ut Komedie un Musik. „Klassiker op Platt – dat klingt so schön. Dat hett so’n besünnere Farv“, swöögt de Jung vun’t Land.

Dorüm schnackt he ok mit siene Patienten Platt: „De freut sik. Un denn geiht in se ehr Gesicht `n Sünn op. Dat hett veel mehr Geföhl. Ik mach dat.“  Platt - dat sünd sotoseggen sien Wutteln, meent de Mann, de nienich to Roh kümmt. Denn blangenbi hett he verleden Johr ok noch so’n lüttje Praxis för Flüchtlinge in Niemünster op’e Been stellt un de Lüüd behannelt, hett een Spennengala organiseert un een Forschungsprojekt in Afrika maakt. Ach, nicht o vergeten: De Kinneroper in Lübeck un denn schrifft he ok noch een egen Oper. Drachenreiter von Cornelia Funke is  un de im Fröhjoar 2018 in Theater Lübeck Premiere  Stillstahn? Klappt nich. Oder? „Doch. Wenn ik mol so richtig platt bün un mi dat nich goot geiht, denn gah ik över de Wieschen – aver ik kann mi nich ännern. Wenn’t löppt, denn geiht mi dat goot.“ Un dat löppt bi den Mann mit de twee groten „M“s – Musik un Medizin.

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt Heel erfolgreiche Speeltiet - Schnack mit Wolfgang Börnsen - "Dat Platt-Theoter hett 'n hogen Stellenwert"

Na de groote Sommerpaus heet dat wedder: Wi haut een Slag rin bi de plattdüütschen Bühnen in't Land. Wolfgang Börnsen, de Böverste vun' Nedderdüütschen Bühnenbund in Sleswig-Holsteen, vertellt uns Blatt nich blots, wat in'e niege Speeltiet los is, sünnern ok, wat to doon is, üm dat Platt-Theoter in'e Tokunft to stüern. Wolfgang Börnsen över de Bilanz vun't Nedderdüütsche Theoter in uns Land: "Kloor is doch: Qualität sett sik jümmers dörch. De Bilanz wiest ut, datt Platt-Theoter hett middewiel een hogen Stellenwert. Un wi hebbt een vun’e erfolgreichsten Speeltieden achter uns."

Heike Thode-Scheel 14.09.2016
Nachrichten auf Platt Nu gifft dat den Häwelmann endli ok op Platt - "Mudder, ik will föhrn"

 „Mudder,“ reep de lütte Häwelmann, „ik will föhrn!“ Un de Mudder reck in’n Slaap mit den Arm ut dat Bett un rull de lütte Bettsteed hen un her, un wenn ehr de Arm mööd warrn schull, so reep de lütte Häwelmann: „Mehr, mehr!“ Dat wunnerbore Kinner-Märken vun den lütten drallen Häwelmann, de partout nich inslapen will, hett de grote norddüütsche Dichtersmann Theodor Storm 1849 schreven. Op Hochdüütsch allerdings. Dat is een echten Kinnerbook-Klassiker wurrn mit de söten Biller vun Else Wenz-Vietor. Nu gifft dat de lütte snaaksche Geschicht üm den Buttjer, de bit an’t Enn vun’e Welt merrn dörch de Steerns in‘ Heven suusen deit mit sien Rullenbett, endli ok op Platt.: „De lütte Häwelmann“ – op Platt överdragen vun Paster un Plattschnacker Ulrich Gradert. Rutbröcht vun‘ Vitolibro Verlag.

16.08.2016
Nachrichten auf Platt Aluköpp lanndt in Preetz un maakt Theoter vun - Platt-Krawall in't All

„Maak de Rakete kloor! Erde, wi kaamt“, roopt de Aliens mit den Alukopp. Un denn stiegt se in ehr Rakeet rin, dat ruckelt, dat wackelt un rumoort un denn gifft dat  optletzt noch so‘n blauen Nevel un schwupps – sünd se op de Eer in Preetz lanndt. Dor wo de Musik herkümmt. Sowat kennt se op ehrn Alien-Planeten gor nich. Dor gifft dat blots Müll un sünst nix. Bi de Minschen op’e Eer, dor is all’ns so püük un schier. Un denn düsse wunnerbore Musik! Schaad blots - de Minschen künnt de Aliens gor nich verstahn: „Du schnackst ja auch diese komische Sprache“, wunnerwarkt DJ Piratos, de Musikmaker. Düsse komische Spraak, dat is Plattdüütsch.  Un de is jo ganz eenfach, meent tominnst de Aliens. Naja – de sösstein Jungs un Deerns vun‘e Jugendbühn Preetz, de hebbt dat jo ok kinkregen mit dat Platt liern. Rutsuert is dorbi sotoseggen „Theoter vun een annern Steern“: Dat plattdüütsche Stück „Krawall in’t All“.

Heike Thode-Scheel 27.07.2016
Anzeige