Menü
Kieler Nachrichten | Ihre Zeitung aus Kiel
Nachrichten auf Platt Een Book för Leckersnuuten un lütte Pottkiekers
Nachrichten auf Platt Een Book för Leckersnuuten un lütte Pottkiekers
Partner im Redaktionsnetzwerk Deutschland
06:34 04.03.2016
Von Heike Thode-Scheel
Geschenkbook mit Kookrezepte un allerlei mehr. Quelle: th
Anzeige

In dat Geschenkbook  steekt vun all‘ns ´n beten wat binn. Dööntjes, ole norddüütsche Rezepte, Schnacks, Riemels un de Levens-Geschicht vun Schietbüdel. De Spezialität vun Lütt Stina (dat is ehr Ökelnaam): Krickelakrack-Minschen teeken. Dat sünd Strich-Minschen, de överall in ehr lütt Book rümjachtern doot. Keen Wunner – dor gifft dat jo ok to üm to leckere Rezepte binn: Appeln un Kartüffeln, Melksupp, Rode Grütt, Pannkoken, Flederbeersupp . . . Wat för sleswig-holsteensche Leckertähn.  Un wokeen denn endli pappensatt is, de kann sik ankieken, woans Schietbüdel groot warrd – Christiane Schmidt hett sien Leven in plattdüütsche Riemels kleed.  Un so geiht dat vun’e Geburt över de grote Leev bit in‘ Heven rin. Een Book to’n Schenken, to’n Smüüstern, to’n Koken, to’n Amüseern un to’n Platt liern. För Hochdüütsche un Plattdüütsche. För Leckersnuuten un Pottkiekers. Un wenn du noch mehr vun Lütt Stina sehn willst, denn gah man mol in ehrn plattdüütschen Kooploden rin. th

Dat lütte Kookbook gifft dat ok bi uns in‘ KN-Loden to köpen.

www.luettstina.de, Tüdelkram, Christiane Schmidt, Quickborn-Verlag, 9,80 Euro, ISBN 978-3-87651-425-3

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt Volker Butenschön: 40 norddüütsche Rezepte as Book - Wat de Buer nich kennt, dat fritt he ok nich . . .

Wat de Buer nich kennt, dat fritt he nich“ heet dat bi uns in‘ Norden. Worüm schall he ok över‘n Töllerrand kieken? Gifft doch so veele schöne leckere Saken bi uns to Eten. Veertig Rezepte hett de Grafiker un Schrieversmann Volker Butenschön  nu in sien Book „Plattdüütsch kökern“ tosamenröhrt.

Wat dor binn is? Hier kaamt de Zutaten: Een övergroten Suppenkell vull mit ole norddüütsche Rezepte, twee Pund Platt, twee Pund Hochdüütsch, twee vulle Eetlepel schöne Biller, twee Koffilepel vull lütte narrsche Geschichten, een lütten Lepel Riemels,  een groote Portschoon Fantasie, een Kilo Bookstaven, een halv Kilo bunte Farven, 400 Gramm Smüüsterwater, een groot Stück Wetens-Pulver, twee Kilo Künnen un een Handvull frische Ideen. Un denn is dat trech. Een echten Hochgenuss – nich blots för’n Maag. Ok för’t Oog. Volker Butenschön, de Jung ut Innien bi Aukrug,  kann mit jedeen 5-Sterne-Koch mitholln – dat steiht fast. Sien Gericht „Plattdüütsch kökern“, dat smeckt allerbest.

Heike Thode-Scheel 07.03.2016
Nachrichten auf Platt De Sporkass maakt TV-Spots op Platt, Bairisch un Sächsisch - Werbung: Heimat op'e Tung

„Go’n Dag“, seggt de Fru un kiekt den Berader vun’e Sporkass wiss an: „Bitto heff ik all’ns hier in’e Reeg bröcht – man se weet jo. De Knee un dat warrd jo nich beter . . .“ Nu kiekt de junge Keerl doch wat verbaast. Aver de Kundin is noch nich fardig: „Also, mien Grootkind seggt, dor geiht jo ok’n Barg in’t Nett mit sien Blick-Bregen un dor heff ik dacht: Ik fohr mol na se hin.“ Un denn lehnt sik de junge Keerl vertruunsvull na vöörn un fangt an: „Jo, dor hett ehr Grootkind ok heel recht.“  Dat sünd man blots twintig Sekunnen merrn in de Werbung – aver de hoolt mi sotoseggen ut’n Slaap. Ik weer doch meist so’n beten indüüselt bi’t Fernsehnkieken. Platt in’t Fernsehn? Avends üm Klock tein? In’e beste Werbetiet. Ik kunn dat kuum glöven – aver de Sporkass hett een niege Imagekampagne op’n Wech bröcht: „Verstehen ist einfach – wenn der Finanzpartner aus der Region kommt.“ Den Werbespot gifft dat ok noch op Bairisch un op Sächsisch.

Heike Thode-Scheel 18.02.2016
Nachrichten auf Platt Jugendtheoter-Projekt Preetz speelt Dornröschen op Platt - Prinzessin ut' Koma wachküsst

Weet se all dat Niegeste? Nee? Na, dat gifft dor so een Geschicht vun een Prinzessin, de all över hunnert Johr slapen deit. In dat dore Dornenslott, wat de Verleger Axel Hüpper graad köfft hett. Tja, un nich to glöven: De schöne Prinzessin is nu vun so’n Schrieverling vun’e Zeitung wachküsst wurrn. Woans stünn dat noch as Titelstory in‘e „BALD“-Zeitung binn: „Prinzessin ut‘ Koma waak küsst. Königsfamilie na hunnert Johr wedder dor!“ Aver dor schall dat jo nu togahn op dat Slott!  Angebli is de Königsfamilie jo nu obdachlos un de suupt ok as dull un knutscht mit ehre Deener rüm. Jo, dat hebbt de Paparazzi nipp un nau sehn!

Heike Thode-Scheel 06.02.2016
Anzeige