3 ° / -6 ° heiter

Navigation:
Een Book för lütte Schieter

Een estnischen Kinnerbook-Bestseller op Platt: Wenn de Fantasie koppheister scheten deit Een Book för lütte Schieter

Pu, de Bär, Sumsemann, de Maikäfer, Lars, de lütte witte Eisbär, Lillifee, de sööte Fee, Theo, dat Schweinchen – ach, wat sünd se zuckersööt. De lüttjen Helden ut’e Kinnerböker. „Genug mit Teddies, Feen und Häschen“, seggt de estnische Schrieversmann Andrus Kivirähk. He kann den Schiet eenfach nich mehr sehn . . . un schrifft los. He will mol wat ganz anners maken. Schiet di wat op all den Smuuskraam. Wat dorbi rutsuert is? De Kinnerbook-Bestseller „Kaka ja Kevad“. Un den gifft dat nu ok op Platt vun Heiko Frese: „De Schiet un dat Fröhjohr“.

Voriger Artikel
Een Book för Leckersnuuten un lütte Pottkiekers
Nächster Artikel
Morrns üm Klock acht: Koffi, Rundstück un "Hör mal 'n beten to"

De Schiethupen verkiekt sik in een Bodderbloom.

Quelle: oh

Dat geiht in siene korten Geschichten üm een Schiethupen, de sik in een Botterbloom verleeven deit, üm twee Socken, de een Ei leggen doot, üm een Heizung, de lütte Kinner freten deit, üm een Spökel, de in‘ Pisspott wahnen deit, üm een Jack, de nich in’t Schapp rin will na’n Winter . . . Holl op, seggst du? Dat löppt op Schiet ut!

Nee. Dat is blots de övergrote Fantasie vun den estnischen Schrieversmann Andrus Kivirähk. He is’n Spijöökenmaker, een Spökenkieker, een Tüdelbüdel, aver vör all‘n Dingen een groot Kinner-Kenner. He süht de Welt mit ehre Ogen. Sien Kinner-Geschichten sünd narrsch, verdreiht, överkandidelt.  Aver so is dat nu mol, wenn de Fantasie koppheister scheeten deit: „Ich habe Geschichten über einen verliebten Hundehaufen geschrieben, über einen hinreißenden Hotdog und eine verrückte Jacke. Was mir an Kinderliteratur so großen Spaß macht, ist: Der Fantasie freien Lauf zu lassen“, verklaart he in een Interview.

Wokeen seggt denn, datt een Schiethupen blots stinkig is un nich ok op‘e grote Leev töven deit? Un wohrraftig: Dat is Fröhjohr un de Botterblom verkiekt sik in em. Sühst mol!   Bi den estnischen Schrieversmann un Journalist dreiht sik de Geschichten üm all den alldäglichen Kraam. Wat Kinner so in’e Mööt kümmt: De Placken op’e Jack warrd miteens lebennig, de Lepel will partout mol Seeröver spelen un jumpt in’e Supp mit’e Fleeschklüten rin un de lütten Furze, de möögt ok nich geern binnen in‘ Buuk blieven.  Echten Kinnerkraam eben.

So richtig schön överkandidelt un spliensch warrd de Geschichten aver eerst in de plattdüütsche Översetten vun Heiko Frese: „De Schiet un dat Fröhjohr“. Andrus Kivikähk, de estnische Schrieversmann, hett em dat andohn: „De sprütt blots so vull Ideen“, swöögt de Schoolmeister ut Neddersassen. „Gefallen doot mi de Geschichten jüst, wieldatt se so wunnerlich sünd, as se sünd. Ik glööv, dor stickt en Barg kindliche Fantasie achter. Un de hett de Autor fuustdick achter de Ohren to sitten“,  dor is sik Heiko Frese wiss. Dat Book vun Andrus Kivirähk hett  in Estland ok inslagen as’n Komet, vertellt de Plattsnacker, de bavento ok noch ganz veel Spaaß an Spraken hett. Un estnisch, dat kann he sowieso – nich blots, wieldatt sien Fru  ut Estland kümmt, sünnern ok, wieldatt  he twee Johr an’e School in Tallinn togang weer.  Översett hett he also nich vun’e hochdüütsche Utgaav, sünnern vun’t Estnische in’t Plattdüütsche. Villicht een Grund, worüm in’e platten  Geschichten so veel Leven binn is.

„Dat gifft wenig Kinnerböker op Platt, de veel Text hebbt. Meist sünd dat Billerböker. Mi güng dat dorüm: Dat schull ok mol Geschichten geven.“ Blots – dor wull partout keen Verlag ran. Mit Schiet Geld maken? Dor hebbt de Verleger nich an glöövt. Aver Heiko Frese is jo nu keen Schietbüx. Optletzt weer de Plaggenhauer-Verlag vun Jan Graf sien Redden. Un nu is de Schiet trech.  Wobi – is jo nu noch lang nich all’ns Schietkraam, wo Schiet opstahn deit. Schietegool, wat de Grooten seggt. För de lütten Schieter is „De Schiet un dat Fröhjohr“ wat to’n Afdüükern.

Andrus Kivirähk/Heiko Frese, „De Schiet un dat Fröhjohr“, Plaggenhauer Verlag, ISBN 978-3-937949-19-2

Voriger Artikel
Nächster Artikel
Mehr aus Nachrichten auf Platt 2/3