Menü
Kieler Nachrichten | Ihre Zeitung aus Kiel
Nachrichten auf Platt En Fru riemelt sik na vöörn
Nachrichten auf Platt En Fru riemelt sik na vöörn
Partner im Redaktionsnetzwerk Deutschland
13:52 07.05.2014
Bärbel Wolfmeier bi'n Poetry-Slam in Husum. Quelle: Ines Barber
Vun Ines Barber

Ik draap ehr bien NDR 1 Welle Nord Platt Poetry Slam in Husum. Se schall slammen, ik modereern. Se is mi upfulln. De mehrsten Slam-Froons hier sünd heel jung, Bärbel Wolfmeier is 48. Se sülvst seggt – meist 50. Se is slank, hett blonde, kotte Locken, drägt ‘n witt T-Shirt un Jeans. Op‘t Shirt is de Kopp vun‘ Lööv oppöönt. Dat passt op’t Best to ehr. Se beluert sik all‘ns ganz sinnig. Is keen beten in Brass, beweegt sik mit Bedacht. Ik spöör ehr Knööf. „Dat is mien eersten plattdütschen Slam“, vertellt se. „Ik heff blots twee grote Texte fardig makt, ik kaam seker sowieso nich bit in‘ne letzt Runn.“ -  Nich? Na, tööv man beter af.

Bärbel Wolfmeier leevt in Dithmarschen in Stelle-Wittenwurth. Vör ‘n poor Joarn hett se de Lyrik to’n tweeten Mol för sik utklamüüstert. Denn al in‘ne School harr se sik verkeeken – to‘n ersten Mol in dat Gedicht „Die Füße im Feuer“ vun Conrad Ferdinand Meyer. Se schrifft ehr Riemels op Hochdütsch un middewiel ok op Platt. Dat kriggt se vun ehrn Schweegervadder biböögt. De schnackt reins Dithmarscher Platt. To‘n Plattdütsch Slammen hett ehr een Plakat an‘ne Straat bröcht. Dat weer vör goot twee Joarn. Dor heet dat: All Dichter mit Moot schulln sik man to‘n Poetry-Slam mellen. Dichter? - Bärbel Wolfmeier smuustert un seggt: „Dor heff ik dormols dacht: Ik bün doch ‘n Dichtersch!“ Un so is all‘ns in‘ne Gang komen.

Anfang April hett se to‘n erst Mol op Sylt een hochdütschen Slam wunnen. „Egentli geiht dat jo nich so üm‘t Gewinnen“, vertellt se, „man, all froogt se mi jümmers: „Na, hest al wat wunnen – hest al?“ Tjo, nu kann se eerst Mol de Fööt hooch leggen un nickköppen: „Jo, ik heff al mol wat wunnen.“

Blots in Husum, dor hett se sik doch düchtig verrekent. Vunwegen: „Ik kaam sowieso nich so wiet – is mol för‘n Emmer . . .“  Ehr Texte riet all de Lüüd mit. Se is anners. Se schnackt mit Bedacht, sinnig, achtersinnig, deepdinkern. Se is sexy un de Lüüd markt: Dor steiht een, de weet wovun se schnacken deit. Een, de dat Leven kennen deit, een mit Hart un mit lyrische Power. Un rumms is Bärbel Wolfmeier in‘e tweete Runn. Ik kiek ehr kott an, jo, achter dat sachtmöödige Gesicht luert nu een Bevern. Un süh mol an: Bärbel Wolfmeier kümmt noch een Runn wieder un steiht nu in’t Finale bi‘n Platt Poetry Slam in Husum. Sogor de „olen“ erfohrn Woortdüvels as Sven Kamin, Jan Graf, Helge Albrecht oder Bleu Broode sünd al lang rutflogen. So’n Schiet! Wat nu? Se hett jo keen langen drütten Text in‘ne Tasch  . . .

Ehr Gegner in‘t Finale is de dröge Slam-Künner Jan Ladiges. He is op Droht un hett natürli ok noch‘n drüttet As in‘ Ärmel. Bärbel Wolfmeier kraamt to’n Glück noch twee lütte Riemels op Platt ut‘n Kopp rut un föhrt een kotte Luudmaleree mit Bewegen vör  – een Mann raseert sik. Dat begeistert un gifft veel Bifall. Liekers - dat Rennen makt dütmol de plietsche Jan Ladiges. Sott hatt.

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!