14 ° / 8 ° Regenschauer

Navigation:
He puult de Bayern Plattdüütsch bi

Nordlicht will Plattdüütsch-Grupp in München op de Been stellen He puult de Bayern Plattdüütsch bi

„Mia gfrein uns üba sprachliche Vielfalt – und do is uns ganz wos Exotisches üban Weg glaffa. Ehrlich wohr: Bei uns in Minga gibt’s an Freundeskreis fia Plattdeitsch!“, so stünn dat annerletzt in de TZ München binn. Heel un deel op Bairisch. „Minga“ is München un dor hett dat Nordlicht, „da Sauerbrey Wolfhard“ (Wolfhard Sauerbrey), een „Freundeskreis für Plattdeutsch“ op de Been stellt. För Nordlichter in‘ Süden. 85 Lüüd hebbt sik wohrrafti  all bi em melldt un wüllt blots eens: Platt snacken, Platt liern un Platt höörn. Aver dat sünd nich blots Nordlichter – ook de Bayern wüllt unbedingt mitsnacken: „An‘ eersten Dag weern dat föfftig bit achtig Telefonate. Ik bün gor nich mehr ut mien Stuuv rutkaamen“, wunnerwarkt Dr. Wolfhard Sauerbrey.

Voriger Artikel
Groot Risiko, een lütt Budget un ganz veel Fantasie
Nächster Artikel
Een groote Hamborger Deern

De TZ München hett groot över Wolfhard Sauerbrey un sien plattdüütschen Freundeskreis schreeven - op Bayrisch.

Quelle: Privat

Siet mehr as veertig Johr wahnt he nu all in München – aver sien norddüütsche Heimaat, de hett de Huutdokter nienich vergeeten. Vör allen Dingen nich sien Spraak, dat Plattdüütsche. Born is he nämli in Celle: „Halv doot, halv lebennig . . . Modder Griepsch hett all seggt: Dat warrd wull nix . . . es sei denn, he kümmt op’n Buernhoff,“ vertellt de Plattsnacker un smuustergrient. „Een Peerd, een Koh, een Swien, `n poor Göös un barfoot vun Februor bit Martini. Un alle snacken blots Platt. Ik ook.“ Dat weer sien Kinnertiet in Groß-Helen.  Denn Abitur, denn Bunneswehr. Un dat bi uns in‘ hohen Norden bi de Kampfschwimmer in Eckernföör. Achterran keem sien Medizinstudium. Eerst in Kiel, denn in Göttingen. Jümmers noch in‘ Norden.

Sien eerste Stell kreeg he aver denn doch in‘ Süden. In München. De Bayern hebbt den „Preiß“ mankeen Mol ganz schöön oploopen laaten mit ehr Bayrisch. Wenn Wolfhard Sauerbrey gor nix mehr verstahn kunn, hett he sik kort entschulligt, is gau rünnerloopen na’n Afteeker, hett sik dat op Hochdüütsch verklaarn  laaten, is wedder hooch na sien Patienten hin un hett op Platt Antwurt geeven. Dorno harr he geef dat keen Malesche mehr mit de Ur-Bayern. Un tohuus föhlen, dat deit he sik ook in München. Bayrisch kann he liekers  noch nich. He mach de Spraak aver, wieldatt se so kort un knapp is as Platt: „Man kennt 20-30 Sätze. Die bringt man mal zufällig aus Jux. Un denn switch ik wedder vun een Spraak na de anner rin.“

Dat mit de Spraaken, dat fallt em licht. Un dorüm will de Münchner Plattsnacker dat nu ook geern an anner Lüüd wiedergeeven: „Denn will ik versööken, Plattdüütsche un Nich-Plattdüütsche tohoop to bringen. An een‘ Disch. Jedeen eerste Manndag den Maand wüllt wi uns buten München draapen in‘ lütten Gasthoff. Dor sünd ook Bayern mit dorbi“, verseekert de Dokter. Snacken, dat is em wichtig – dor sündi de mehrsten Lüüd nämli bang vöör: „Verstahn doot se dat all. De truut sik avers nich. De dinkt, jedeen Woort mutt richtig ween. As wenn man een Afkaat is un all’ns richtg maaken mutt.“ Miteenanner snacken, vörlesen, plattdüütsche Norichten, plattdüütsche Musik höörn, villicht een Theoteravend: „Ik bün dorbi. De Lüüd mööt blots de Vörsläge maaken“, dorop freut sik Wolfhard Sauerbrey all. Wenn dat all’ns so klappen deit, denn schall dat ook noch een plattdüütschen Spraak-Kurs geeven – för ümsünst. He hett een Barg vör.

Aver he hett ook Hölp kreegen. Sien Swiegerdochter Julia Sauerbrey will em ünner de Arms griepen. De Bökerhökersch hett een eegen Bökerloden in Gräfelfing bi München. Se snackt twaars keen Platt, vertellt Wolfhard Sauerbrey, aver se is liekers Füer un Flamm för sien Idee: „Ik bring de Lüüd tohoop – un de plattdüütschen Böker, de künnt se bi di köpen“. Wenn man bi ehr op de Internetsiet vun‘ Bökerloden „Wort-Schatz“ ünner „Plattdeutsch“ smöökern deit, denn kaamt dor wiss un wohrrafti 510 Treffer to’n Vörschien. Vun Rudl Kinau bit Matthias Stührwoldt, vun Sass bit hin to weentenschapli Böker un plattdüütsche Vertellen. Een kann sogoor in ehrn Loden in Gräfelfing bi München plattdüütsche Böker un CDs köpen: „Dat Regool dor is grötter as jichtenswo in Norddüütschland“, swöögt ehr Swiegervadder. Tja, un wokeen weet dat all -  villicht kümmt uns Plattdüütsch jo noch ganz groot rut in München un ümbi: „Dass ma ois Bayer Spaß dro hot, Plattdeitsch z hern.“ (TZ München: Dat een as Bayern Spaaß dor an hett, Plattdüütsch to höörn) . . .

Wokeen wat bistüern will oder mitmaaken will: Wolfhard Sauerbrey, wolfhard.sauerbrey@t-online.de, Tel. 0171 6718115

Voriger Artikel
Nächster Artikel