2 ° / -1 ° Schneeregen

Navigation:
Hier sünd de lütten Spraken Chefsaak - ok Platt

Johannes Callsen is de niege Minnerheiten- Beopdragte Hier sünd de lütten Spraken Chefsaak - ok Platt

„Wenn man Platt schnackt, erleichtert das den Zugang zu den Menschen. Ich selbst habe früher kein Platt geschnackt, meine Eltern haben mit mir Hochdeutsch gesprochen und untereinander Plattdeutsch. Aber meine Oma hat nur Plattdeutsch mit uns geschnackt“, vertellt Johannes Callsen op Hochdüütsch. „Ich hab‘ das noch in den Ohren . . .  ik kann ok Platt schnacken“, smuustert he un denn is de Angliter Jung  ok all an’t Vertellen – op Platt, wech vun’t Hochdüütsche, wat he eegens för offizielle Termine schnacken deit: „Ik bün een heimatverbunnen Minschen“, sineert Johannes Callsen. „Ik leev hüüt noch op uns olen Hoff in Angeln. Dat sünd de Wötteln vun mien Leven un vun miene politische Arbeit.“ De Wötteln, vör allen Dingen de plattdüütschen, de kann he bi sien niege Opgaav op’t Best bruken. Denn Johannes Callsen is de niege „Beauftragte des Ministerpräsidenten in Angelegenheiten nationaler Minderheiten und Volksgruppen, Grenzlandarbeit und Niederdeutsch“. Oder kort un knapp: De niege Minnerheitenbeopdragte.

Voriger Artikel
Plattdüütscher Film över't Leven in't Kaschott
Nächster Artikel
40 Johr Nieges ut alle Welt

Johannes Callsen is de niege Minnerheiten-Beopdragte.

Quelle: Claudia Kunkel CDU-SH

Den Posten gifft dat nu all siet nahto dörtig Johr. 1988 hett de domolige Ministerpräsident Björn Engholm dat Ehrenamt op’e Been stellt. Un sietdem sünd de Fresen, de Sinti un Roma, de däänsche Minnerheit in‘ Lannesdeel Sleswig, de düütsche Minnerheit in’t däänsche Nordsleswig un natürli de Plattdüütschen „Chefsache“. In’e Staatskanzlei mit Blick op’e Föörd, dor liggt sein lütt Büro.  In’e letzte Legislaturperiod weer Renate Schnack tostännig, nu rückt Johannes Callsen na. Un de freut sik op sien niege Opgaven in de verscheeden Rebeete: „De weten dor alle, wat se wüllt un dat sünd all’ns nette Minschen, de sik för dat insetten doot, wovun se övertüügt sünd.“  Datt he as Lanndagsafgeordnete vun’e CDU villicht mankeen Mol twüschen de Stöhl sitten  warrd, dor lett he sik keen graue Hoor wassen: „Ik bün een Minsch, de utglieken kann.“ Wichtig is för em aver ok, datt sik de Parteien in‘ Lanndag to dat Thema Minnerheiten un Plattdüütsch alle eens sünd. Dat hölpt. Datt he Togang to de annern Parteien hett, „dat kann ok een groten Gewinn ween“, sineert Callsen.

Kloor is em ok, datt „de Politik keen Wunner vullbringen kann.“ Liekers: „Dat is wichtig, datt de Wünsche vun’e Minnerheiten opnohmen warrd, datt se transporteert warrd un datt een sik denn ok dorför insetten deit.“  De Tiet för de Arbeit mit’e verscheden Minnerheiten, Volksgruppen un Plattdüütschen, de hett he, denn de Lanndagsafgeordnete maakt  bewusst keen Fachpolitik mehr: „Ik heff noch mien Wahlkreis to betüdeln, aver ut dat typische Speel twüschen Regeern un Opposition, dor versöök ik ruttokamen. Ik bün nu so’n beten de Vermittler.“

De eersten Antritts-Besuche hett de niege Minnerheitenbeopdragte all achter sik. Un Johannes Callsen is Füer un Flamm för sien Amt. Mit’e Lüüd schnacken, dat kennt he nich blots vun‘e Arbeit ut sien Wahlkreis Sleswig, dat kennt he ok vun tohuus. Vun’n Buernhoff in Langdeel in Angeln – wo he groot wurrn is un wo he ok hüüt noch leven deit: „Heimat is för mi dor, wo ik mi wohlföhl, wo ik to Roh kaam“, meent de Buernsöhn deepdinkern, „un wenn ik avends na Huus kaam op’n Hoff, denn weet ik: Hier höörst du hin. Un dat is de Basis för mien politische Arbeit.“

Dor kümmt ok dat Verständnis för sien Heimatregion her, för de vielfältig Kultur, de verscheden Spraken un för de lange Geschicht. All’ns Saken, för de he sotoseggen brennen deit: „Dat spornt mi jedeen Dag wedder an. Dat to erholln, wat Sleswig-Holsteen utmaken deit.“ Dorto höört ok Plattdüütsch, Däänsch Freesch un Romanes: „Unse Spraken – dat is een kulturelle Veelfalt. Un deswegen will ik mi dor ok för insetten“, swöögt de Plattschnacker. För Plattdüütsch is in’e letzten Johrn „en Masse maakt wurrn. Dat is’n Erfolg“, gifft he ahn wenn un aver to un verseekert: „Dor wüllt wi ok so wiedermaken.“ Liekers: „Man kann as Land veele Angebote maken. Aver de Spraak mutt ok vun’e Lüüd schnackt warrn.“ He will de Lüüd för Platt begeistern: „Dat is een vun’e wichtigsten Opgaven.“

Un dor will Johannes Callsen op daal gahn.  Bang is he nich för de Arbeit in’e verscheden Rebeete, mit de verscheden Richten, denn „man kriggt ok veel trüch vun’e Minschen, wenn man wat för de Region deit.“ Un Stütt un Stöhn vun’e Vereene, Verbänne un Maaten, de warrd he kriegen, dor is he sik wiss: „Denn de Minnerheiten warrd wertschätzt vun uns Öffentlichkeit un vun’e Politik. Se leven aver vör allen Dingen dörch de Lüüd in’t Ehrenamt, de sik ümmer för se insetten doot. Dat is ok een Teken vun Toleranz in uns Gesellschap.“

Voriger Artikel
Nächster Artikel
Mehr aus Nachrichten auf Platt 2/3