8 ° / 3 ° Regenschauer

Navigation:
Kieken, lüstern, smökern

20 Johr Plattdüütsche Bökermess in Hamborg Kieken, lüstern, smökern

Wi schrievt dat Johr 2005. In Hamborg geev dat twee ganz groote Belevnisse un de heele Stadt weer op‘e Been: De Passageerdamper „Queen Mary 2“ kümmt to Besöök in‘ Haben un in Finkwarder lanndt to glieke Tiet de gröttste Fleger vun’e Welt, de A380. Dat weer een Spektokel! Man för Helmut Kujawa, Schrieversmann vun’t Hamborger Avendblatt, geev dat domols een ganz anner Superlative. Un twaars de Plattdüütsche Bökermess in‘ Lichtwarksaal vun’e Carl-Toepfer-Stiften: „Uns persönlich Highlight aver weer, as mien Leevste un ik von Reimer Bull persönlich mit Handslag begröt worrn. Vergnöögt fraag he uns: „Dörv ik jümehr Kledaasch afnehmen?“ Un dennso hung he uns Mäntel an de Gardrov un sä: „Dat is de Verehrung vun den Autor gegenöver siene Lesers!“ Un nu frag ik di: „Wat sünd de Queen oder een Fleger gegen son Beleevnis?“ Middewiel hett de dore Plattdüütsche Bökermess sogor Jubiläum: To’n 20. Mol kaamt an‘ 4. un 5. November üm un bi 40 lütte un groote Verloge un Schrieverslüüd ut ganz Norddüütschland na Hamborg, üm ehrn plattdüütschen Kraam vörtostellen. Un twaars in den Lichtwarksaal vun’e „Carl-Toepfer-Stiften“ .

Voriger Artikel
Wokeen will wull dicke Pött' kieken in'e Sailing City?
Nächster Artikel
Vun' Maiskutscher to'n Internetstar

Plattdüütsche Böker för jedeen Geschmack gifft dat op de Plattdüütsche Bökermesse in Hamborg.

Quelle: th/Montage F.Scheel

Bi’n Start 1998 weern blots söben Verloge mit vun’e Partie. Liekers meent dat Avendblatt in sien Utgaav vun‘ 21. November 1998: „Darüber hätte sich Alfred Toepfer sicher gefreut: Hamburg erlebt an diesem Wochenende seine erste plattdeutsche Buchmesse.“ Alfred Toepfer weer Ehrenbürger vun’e Stadt Hamborg, Koopmann un Mäzen un een groot Fründ vun’e plattdüütsche Spraak. He wull sien Modderspraak Stütt un Stöhn geven. Un dorüm hett he ok de „Carl-Toepfer-Stiften“ (nöömt na sien Vadder Carl) op’e Been stellt. Mit söven Verloge füng domols all’ns an - bi de föffte Messe weern dat denn all üm un bi twintig. Un dat weer „durchgehend drängelig“, so stünn dat domols in‘t Avendblatt: „So viele waren es noch nie“, swöögt dat Blatt 2008 över de teinte Platt-Bökermess. Mehr as dörtig Verlage ut ganz Norddüütschland hebbt so üm un bi 500 Bücher  un CDs utsstellt.  „So hat Hamburg mit der Plattdeutschen Buchmesse seit 10 Jahren jeweils im November einen festen Ankerplatz für plattdeutsche Literatur“, swöögt Avendblatt-Redakteur Lutz Wedler. Den sülvigen Artikel hebbt se sogor extra op Platt översetten laten un hebbt de Lüüd wohrschaut: „Plattdüütsche Böker künnt afhängig moken!“

Schients stimmt dat, denn 2012 warrd de Platz in den Lichtwarksaal na 15 Johr böös knapp för all de groten, lütten un lüerlütten Verloge: „Premiere!“, is de Överschrift in’t Avendblatt, „De Plattdüütsche Bökermess treckt üm“. Un twaars ut den lütten Lichtwarksaal rin na’t grote Foyer vun’t niege Ohnsorg-Theoter an‘ Hauptbahnhoff. Op twee Etaagen künnt de Lüüd nu in’e Böker smüüstern, künnt tolüüstern un sik ümkieken un op‘e Studiobühn is nu nuch Roh un Platz för de Lesungen. De Carl-Toepfer-Stiften nöömt düsse veer Johr „Ausflug ins Ohnsorg-Theater“. Denn ok wenn de domolige Ohnsorg-Intendant Christian Seeler vör veer Johr swöögt hett: „Die Besucherzahl hat sich verdoppelt. Das macht unser neuer Standort am Hauptbahnhof. Der ist durch nichts zu ersetzen“ – liekers is de Bökermess verleden Johr wedder dor hin trüch, wo se mol anfungen hett: In‘ Lichtwarksaal.

Un so as de Saal, so hett ok dat  Programm vun’e twee Daag in‘ November all lang Tradischoon: An‘ Sünnavend vörmiddag is de Fier för dat „Plattdeutsche Buch des Jahres“. Dat warrd siet 2005 utlöövt. Middags geiht dat denn wieder mit Lesungen. To jedeen vulle Stünn sünd Schrieverslüüd to Gast. Se leest ut ehr niegen Böker vör un signeert se ok glieks. Twüschendörch künnt sik de Lüüd ümkieken un mit de Verleger schnacken un natürli inköpen. De Sünndag fangt mit‘n plattdüütschen Gottesdeenst in‘ Michel an. Denn geiht dat in‘ Lichtwarksaal wieder mit Schnüüstern un luustern, mit schnacken un diskuteern. To’n Afsluss speelt jümmers  een plattdüütsche Band.

Dat löppt also siet twintig Johr – un mol sehn – villicht is jo de 20. Plattdüütsche Bökermess wedder so’n Highlight as 2008. Ik meen – dat warrd swoor. Denn ji warrd dat nich glöven: An‘ 3. November is de dore „Queen Mary 2“ wedder to Besöök in Hamborg. Jüst so as vör twölf Johr. Man: „Wat is de Queen gegen so‘n Beleevnis?“

Voriger Artikel
Nächster Artikel
Mehr aus Nachrichten auf Platt 2/3