Menü
Kieler Nachrichten | Ihre Zeitung aus Kiel
Nachrichten auf Platt "Moin Moin leve Lüüd . . ."
Nachrichten auf Platt "Moin Moin leve Lüüd . . ."
Partner im Redaktionsnetzwerk Deutschland
14:23 27.07.2015
Von Heike Thode-Scheel
Plattdüütsch an' fröhen Morrn in Preetz Quelle: thode-scheel
Anzeige

Miteens flüggt de Döör op un de beiden letzten Buttjers trudelt in. „Ji sünd aver `n beten to laat“, meent Claudia Siemsen un kiekt op ehr Klock: „Na, denn sett ju man glieks daal.“  Un denn geiht dat los: „Moin, moin, leve Lüüd, wi snackt Plattdüütsch   hüüt,   wi   wüllt   dat   probeern,   denn   Platt   snackt   wi   geern“, singt de lütten Jungs un Deerns luuthals as Begröten. So as jedeen Maandag, Mittwuch un Fridag. Denn de Grundschool in Preetz is een vun’e 27 Modellscholen in’t Land, wo de Kinner ut’e eerste Klass ok Plattdüütsch liert. Friewillig kaamt se jümmers morrns üm halvi acht in’e School. Noch vör ehrn eegentlichen Ünnerricht. Un dat all siet een Johr.Vun de dree eersten Klassen in Preetz sünd nahto alle Kinner mit dorbi: „Aus der Klasse von Frau Siemsen machen, glaube ich, alle mit“, swöögt Anke Tobies. Se is de tweete Platt-Expertin an düsse School un maakt ok Ünnerricht mit de Lüttsten.  Dat is een echtes Erfolgsmodell dor in Preetz. Nich blots, datt dor veer Schoolmeester sünd, de Platt snacken künnt, Nee, vun de 65 Schöler ut de eersten Klassen maakt föfftig Jungs un Deerns  bi’n Plattdüütsch-Ünnerricht mit. Dat sünd 77 Perzent! Un de maakt nich blots mit, „de sünd ok bannig motiveert“, freut sik Anke Tobies.

„Eenmol bunt dörch, dat is uns Programm“, vertellt Claudia Siemsen, „beten Bewegung, `n beten Spaaß, beten Singen.“

„So, nu kümmt uns Speel. Good oppassen: Hannen op’n Hocker. Un nu de Fööt op’n Hocker.  Un nu . . .  den Dassel op’n Hocker . . .“ Een Juuchen geiht dörch de Reegen. Keen, de dor keen Lust to hett. Denn pröövt se noch kort ehr Programm. Riemels, Sketche, Singen . . .  Denn an‘ letzten Schooldag, dor is dat Fernsehn to Besöök dor west. De lütten Plattsnacker sünd all richtige Stars – mol führt se wat för de Politiker in’t Lanneshuus op, mol bi’t Theaterdrapen in Molfsee, mol för‘t Fernsehn.

 „Kleine Happen Plattdeutsch“, smuustert Anke Tobies. Aver de klappt ganz wunnerbor. Hüüt is  de Kleedaasch an’e Reeg: „Johann, kümmst du mol na vöörn. So, Kinner, wat hett Johann denn an?“, fraagt Claudia Siemsen. „Eine schwarze Hose“, röppt een vun achtern. „Ja, aver wi heet dat op Plattdüütsch?“ Een lütten Buttjer ut’e drütte Reeg weet Bescheed: „Een swatte Büx“. „Genau“, löövt Claudia Siemsen un  denn geiht de Modenschau wieder.

„In de Stünn warrd blots Platt snackt“, vertellt de Schoolmeestersche, de vun tohuus ut keen Plattsnackerin is: „Dat heff ik vör dörtig Johr bi de Nedderdüütsche Bühne in Preetz liert. Ik kunn keen Woort Platt. Ik heff an‘ Anfang all’ns utwennig liern müss. Aver ik heff een Spraken-Ohr, glööv ik“, smuustert se un denn geiht dat wieder mit Platt: „So, nu tellt wi mol vun een bit tein . . .“

 Gor keen Problem för de Lütten. Und at, offschoonst bi de Meisten tohuus gor keen Platt snackt warrd. „Dor sünd een poor Kinner dorbi, de vertellt, datt ehr Oma un Opa Platt snacken doot. Un dree Kinner, de künnt richtig toll snacken. De sünd entweder sprachbegabt oder hebbt Öllern, de dat noch künnt“, vertellt Claudia Siemsen. Mätje to’n Bispill: „Opa redet Platt mit mir. Und der bringt mir auch Platt bei“, meent de lütt Deern mit de langen bruunen Hoor. Bi Paula snackt se in de Familie sogor noch Platt. Un bi Anna-Lena un Fabian Oma un Opa. Robin kann sogor all’ns verstahn, wenn Opa un Oma tosamen Platt snacken doot. „Ich rede manchmal mit meinen Freunden Platt“, gifft Leon to, „was redest du denn da, fragen die mich dann“.  Griechisch, Hochdüütsch un Plattdüütsch – op düsse Spraken is  Spiros ganz stolt. De kann he nämli all dree snacken. Platt noch nich so good as de annern twee – aver he is jo ok eerst een Johr mit dorbi. Een Sprakengenie is ok de lütte Alyssa. „Ich kann Spanisch, Deutsch und Plattdeutsch ein bisschen“, freut se sik as dull.

„So, Kinners, nu rüümt ji de Hocker noch wech . . . un denn gaht ji bitte ganz liesen in june Klass rin. Un vergeet nich de Jacken“, röppt Claudia Siemsen luud achterran un lacht sik een: „Die sind immer so fröhlich und lernen richtig schnell. Dat maakt so’n Spaaß !“

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt „Ein echtes Plus für unsere Minderheiten im Land“ - Lokalradio: En Chance för de lütten Spraken?

Mehr Sprakenveelfalt un mehr lokale Informaschonen – dat schall bi de fief niegen lokalen Radiosenner rutsuern, de dat tokünftig geven schall. In‘ Januor hett de Lannesregeern den niegen Medienstaatsverdrag HSH (Hamborg/Sleswig-Holsteen) op’n Wech bröcht. Dat, wat in anner Bunneslänner all lang in’e Gang is, schall nu endli ok in Sleswig-Holsteen mögli ween: Lokales Radio.  Dat Land will aver noch een Schritt wieder gahn:   De Lokalradios schüllt nich blots Informaschonen ut‘e Region bringen, de mööt luud Verdrag tokünfti ok de Spraak un Kultur vun’e Minnerheiten in’t Programm rin bringen.

Heike Thode-Scheel 01.07.2015
Nachrichten auf Platt För de Kieler Wuch: Meislahn staffert ehr Finster norddüütsch ut - Kiekfinster heel un deel op Platt

 „Platt kommt wieder – und da haben wir uns gedacht: Das passt doch perfekt zur Kieler Woche. Das hat einfach so einen Spaß gemacht, die Schaufenster zu entwickeln und zu dekorieren“, swöögt Valeska Wehleit. Se is bi Meislahn in de Holstenstraat för de Dekoraschoon un för’t Marketing tostännig. Un wieldatt se Plattdüütsch so „sympathisch“ finnen deit, sünd nu alle Kiekfinster bi den Tradischoonsloden mit plattdüütsche Schnacks utstaffeert.

Heike Thode-Scheel 16.06.2015
Nachrichten auf Platt "Suutje, mucksch un füünsch" - dat Book över Platt-Geföhle - He kiekt in' plattdüütsche Seel rin

Dat is halvi negen morrns. Volker Butenschön höört sik noch böös verslaapen an: „Jo . . . ik bün wull noch so’n beten mööd . . .“ sineert he un snackt wat suutje wieder: „ . . . un villicht ok noch so’n lütt beten gnadderig . . .“ Ohauaha – „einen gnadderigen Fischkopp sollte man am besten nicht ansprechen“, steiht in sien nieges Book binn, Dat heet „suutje, mucksch un füünsch. Platt-Gefühle zwischen Wehmut und Wahnsinn“. „ . . . Am besten einfach abwarten, der Zustand gibt sich im Regelfall nach drei Tagen . . .“ heet dat dor wieder in dat dore Book. Dree Daag kann ik nu aver nich töven – un bang bün ik ok nich. Also heff ik mi dacht: „Ümmer suutje“ – „beharrlich und entschlossen kommt die norddeutsche Schnecke ans Ziel . . .(steiht so in sien Book binn)“ Un so hett mi de Grafik-Designer, Plattsnacker un norddüütsche Jung doch noch een Interview geven.

02.06.2015
Anzeige