21 ° / 12 ° wolkig

Navigation:
Nu schnackt Gott Plattdüütsch

De Losungen: Gottes Woort för jedeen Dag - nu ok op Platt Nu schnackt Gott Plattdüütsch

Man kann sik dat kuum vörstellen – aver dat is wohr: Bi över eene Million Lüüd in Düütschland liegt se morrns op’n Fröhstücksdisch - Bismarck hett se leest, Graf Zeppelin, Dietrich Bonnhöfer, De „Losungen“ vun’e Herrnhuter Gemeene. Dat is sowat as de dääglich Schnacks op’t Kalennerblatt.  Blots datt de Schnacks hier ut’e Bibel kaamt. Sotoseggen „Gottes Woord för jedeen Dag“. Un dat all siet 286 Johr. De doren  Losungen sünd aver nich blots bi uns een Bestseller. Se slaagt Brüchen to verscheden Religionen, verscheden Kontinente, verscheden Kulturen un to ganz verscheden Minschen. Denn De Herrnhuter Gemeene hett se vun ehre Missionare in de Welt bröcht. Een kann se in 35 Länner op fief Kontinente finnen. Dat lüerlütte Book mit de Bibelschnacks is middewiel in 61 Spraken översett wurrn.   Vun Afrikaans bit Zulu - un nu endli ok „up Platt“. 

Voriger Artikel
"Hui, dat Füür güng hooch . . ."
Nächster Artikel
Düsse Veer rappt all'ns platt

Jedeen Dag een Bibelvers op Platt: Dat sünd de Losungen.

Quelle: th

„Plattdüütsch hölpt, datt man kloor kriggt, wat Gott uns toseggt un wat he vun uns will“, meent Pastorin Anita Christians-Albrecht. Se hett de „Losungen auf platt“ rutgeven. Kloortext schnacken sotoseggen. Denn bi de plattdüütsche Översetten vun’e Bibelverse kann een sik eben nich achter de Karkenspraak versteken.

De Losungen sünd Verse ut‘ Ole Testament mit‘n Lehrtext ut‘ Niege Testament. „9.1.2016 - Psalm 9: De HERR  is een Schuul för de arm Lüüd, eer Schuul för Tieden in Noot  - 2. Korinther 12:  Paulus schrifft: Dör Christus hebb ik goden Mood, wenn ik schwack bün, wenn ik quält ward, wenn ik in Nood bün, wenn se achter mi to sünd un wenn ik bang bün.“ . . .  düsse Losung för den 9. Januor is een wunnerbor Bispeel dorför, wie menschli, wie normaal un aktuell dat is, wat in’e Bibel binnen stahn deit. Vör allen Dingen op Platt.  Dat kann sotoseggen süchtig maken, düsse Oort „Orakel“ för den Dag.

 De Herrnhuter Lüüd, de weern jedenfalls Füer un Flamm, as Nikolaus Ludwig Graf von Zinzendorf  se de eerste Losung an‘ 3. Mai 1728 mit op’n Wech geven hett – för den tokamen Dag: „Liebe hat in hergetrieben, Liebe riss ihn  von dem Thron, und wir sollten ihn nicht lieben?“ De Minschen  funnen dat jedenfalls so goot, datt se op de Losungen nu nich mehr verzichten wulln. Jedeen Dag hebbt se dat denn vun Mund to Mund in de 32 Hüüser vun Herrnhut rindragen. De Losungen schullen „ins Gemüt und ins Herz“ gahn, schreev de Graf. Un twaars „in kleinen appetitlichen Stückchen zur Nahrung meines Volkes“.

Dree Johr later, 1731, is denn dat eerste lütte „Loosbuch“ druckt wurrn. Acht Johr later geev dat den Bestseller all in 37 Orte in 23 Länner op veer Kontinente. Denn de Herrnhuter Gemeene harrn ehr Missionare in alle Welt. För düsse Gemeenschap ut ganz verscheden Minschen un ganz verscheden Globen op ganz verscheden Kontinente weern de Losungen Stütt un Stöhn för jedeen niegen Dag. 

Bit to sien Dood hett de Graf  de Losungen sölben utsöcht – un denn wurrn se utloost. 1824 nummereerte lütte Zeddels liegt noch hüüttodaags in een grote sülverne Kumm binn. Eenmol in’t Johr sitt  de Mitarbeiter an‘ Disch tosamen un treckt de Losungen. Aver nich för’t tokamen Johr, sünnern för dree Johr in‘ Vörrut – düsse Tiet bruukt se, üm all de Översetten, den Papeerkraam un all de niemoodschen Utgaven in’e Reeg to kriegen. Denn de Losungen, de gifft dat nich blots as Book: Dat  gifft een App för Smartphones, een extra Internetsiet in vele verscheden Spraken, een Newsletter, sogor een Utgaav för Blinne un för Gehörlose un nu ok noch de Losungen „up Platt“. Mi hett besünners de Losung vun‘ 22. September 2015 deep anröhrt un nadenkli maakt. Denn dor heet dat: „Die im Elend ohne Obdach sind, führt in mein Haus“ . . . Matthäus 25. Dat weer jüst de Tiet, as de Flüchtingswelle losleep.  Komisch, oder?

Voriger Artikel
Nächster Artikel
Mehr aus Nachrichten auf Platt 2/3