Menü
Kieler Nachrichten | Ihre Zeitung aus Kiel
Nachrichten auf Platt Oh Dannenboom, oh Dannenboom
Nachrichten auf Platt Oh Dannenboom, oh Dannenboom
Partner im Redaktionsnetzwerk Deutschland
12:00 04.12.2017
Von Heike Thode-Scheel
Yared Dibaba un "De Schlickrutscher" op Tour. Quelle: Lars Berg

„Shanties sünd norddüütsche Kultur un Tradischoon“, verklaart mi de plattdüütsche Jung ut Äthiopien, „de hebbt so’n egen Kraft un Energie, wenn een Keerl de singen deit. Un wenn wi tosamen singt mit dat Publikum – dat schwingt noch mol anners“, dorvun is he övertüügt. De olen Seemannsleeder un Gassenhauer hebbt se „utbuddelt“ un denn niege Texte dorto maakt, hebbt de  Melodien `n beten oprüüscht, mol Reggae mit rin oder ok mol wat vun Hip-Hop – un jümmer so, datt de Lüüd „dat all’ns mitgröölen künnt“. Un de sünd Füer un Flamm för de Musik vun Yared Dibaba un sien Schlickrutschers: „Ik heff dor mol so’n Aha-Beleevnis hatt. Dor hett een to mi seggt: Dat is‘n groten Schatz, wat du dor maakst, Yared.“

 Dor is de Plattschnacker to Recht stolt op. „Tradischoon kennt jo keene Grenzen“, seggt Yared Dibaba mit groot Övertüügen. Un dat finndt he wunnerbor. „Dat is wat, wo wi uns an fastholln künnt. Ik bün jo mit twee Kulturen opwussen un dat is so’n Mix mit de Tradischoonen, wat Wiehnachten angeiht: Norddüütsch gemütli un schlicht un mit so’n beten wat ut miene Heimat Äthiopien. Mien Fru (kümmt ut Portugal) stüert ok noch wat Portugisisches dorto un denn kiekt wi, datt dat passen deit.“

Yared Dibaba is in Oromya in Äthiopien born un 1973 to’n eersten Mol mit sien Öllern na Düütschland kamen, wieldatt sien Vadder hier studeert hett. Dor weer he veer Johr. As de lütte Buttjer söven weer, sünd se denn na Äthiopien trüchgahn -  müssen aver 1979 vör’n Börgerkrieg na Düütschland flüchten. De lütte Yared kunn dor nich blots Düütsch schnacken, sünnern ok sien Modderspraak Oromo, de Lannesspraak Amharisch, en beten Swahili un Engelsch. In sien niege düütsche Heimat in dat lütt Dörp Falkenborg hett he bi de Buern bavento noch Platt liert: „Ik heff dor mit mien Broder tosamen in‘ plattdüütschen Kinnerchor sungen“, besinnt sik de Fernsehmoderator un höögt sik een. Bi’t Singen is dat aver nich bleven: He hett noch dree Johr de Schauspeelschool in Bremen besöcht, kann modereern, Geschichten schrieven, Radio maken un Platt schnacken: „Wenn dat Spaaß maakt, denn erfüllt een dat ok“, seggt de Entertainer, de mit siene Talente nich op’e Welt kamen is: „Ik heff dorför hart arbeiten müss.“

Man dat is för Yared Dibaba keen Problem, denn: „Ik kenn keen Grenzen – ik bün jümmers niegeerig“. Un dat wiest sik ok in sien Musik. Dor warrd flietig mixt, tohoop röhrt, vermengeleert un nieg utprobeert: „Mien Band is total modern un internaschoonal un de hebbt ok all mit de dullsten Lüüd tosamen speelt. Mien Slagtugspeler hett all mit Sammy Deluxe speelt, de Keyborder mit Ina Müller, mit Roger Cicero un Otto Waalkes un de Bassist mit Steve Wonder“, swöögt de Dusendsassa. „Dat is en groot Geschenk, mit solke Musiker tosamen to spelen.“

 „Bunt un internaschonaal“ -  so schall dat ok op sien Wiehnachts-Tournee togahn: „Shanties, Schlager, Reggae, Beach Boys, Hip-Hop – dat is de Mix. Ik stah för Veelfalt. Dat is en groten Schatz“, sineert de fidele Moderator un Schrieversmann. Tradischoon un Moderne – dat will he tosamen bringen un denn noch en groten Hupen ut verscheden Kulturen. „Ik will ok vertellen, wie de Lüüd Wiehnachten in’e Welt fiert un denn wüllt wi Wiehnachten op Platt rocken“, swöögt he. „Dat fangt suutje an un denn geiht dat gauer un gauer“, jubileert Yared Dibaba vull Vörfreud: „Oh Dannenboom, oh Dannenboom . . . ik mach di to geern lieden . . .“

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt Plattdüütscher Film över Wind, veel Geld un plietsche Fruuns - En windigen Fall för Landfruuns

Fief Fruunslüüd sitt an‘ Sofadisch un wunnerwarkt vör’n Klapprekner: „Dor mutt doch wat in’t Internet dorto stahn . . . dat is jo komisch. Dor mutt doch wat to finnen sien!“ Un denn finndt se optletzt doch noch wat un klickt dor enfach mol op. Un nu nimmt dat Schicksol sien verdammigten Loop. Dat geiht üm sluusohrig Investoren, de achter dat Geld vun ehr Keerls her sünd, üm den Börger Windt Park Jüksdörp, üm windige Geschäfte un en groot Geheemnis. Dor düükert sogor noch een Liek op in den plattdüütschen Krimi „Landfrauen – Do wat du wullt, de Lüüd schnackt doch“. Dat is all de tweete Film vun den Dithmarscher Filmemaker Mathias Schulz. Un natürli all’ns wedder op Platt.

Heike Thode-Scheel 16.11.2017
Nachrichten auf Platt Keno Veith dreiht Video op Platt in'e Klei - Vun' Maiskutscher to'n Internetstar

Dat weern man blots 59 Sekunnen. Un een Mallöör bavento. Aver de hebbt sien Leven nipp un nau op’n Kopp stellt. Ut Keno Veith, den Maiskutscher, is Keno Veith, de Internetstar wurrn. Un dat blots, wieldatt he mit sien Gespann op’e Maiskoppel in‘  Klackermatsch steken bleven is. Vör luder Langewiel hett de ostfreesche Jung denn mit sien Handy en lütt Video dreiht un hett dat bi facebook rinstellt. „Wieder geiht nich, du. Oder anners seggt: Wi sünd mit’n Kopp in, näch? Mitten in‘e Klei. Nu sitt ik hier mit dat dicke Beest.“ Dat dicke Beest is sien Trecker un wat schall he doon? „Tja, nu mööt wi hier luern. Luern, luern. Bit en kümmt un uns ruttrecken deit.“ Nu schnackt de Star ut Ostfreesland aver nich blots Platt, de süht ok noch wat besünners ut: Swatt as de Nacht (ik dörf dat schrieven hett he seggt), groot un stevig, üm‘ Hals veer grote sülverne Keden as de Rapper in Ameriko, `n Irokesen-Hoorsnitt as Bosco ut dat „A-Team“ un jümmers en breed Lachen in’t Gesicht. Dat is Keno, de niege plattdüütsche Internetstar.

Heike Thode-Scheel 02.11.2017
Nachrichten auf Platt 20 Johr Plattdüütsche Bökermess in Hamborg - Kieken, lüstern, smökern

Wi schrievt dat Johr 2005. In Hamborg geev dat twee ganz groote Belevnisse un de heele Stadt weer op‘e Been: De Passageerdamper „Queen Mary 2“ kümmt to Besöök in‘ Haben un in Finkwarder lanndt to glieke Tiet de gröttste Fleger vun’e Welt, de A380. Dat weer een Spektokel! Man för Helmut Kujawa, Schrieversmann vun’t Hamborger Avendblatt, geev dat domols een ganz anner Superlative. Un twaars de Plattdüütsche Bökermess in‘ Lichtwarksaal vun’e Carl-Toepfer-Stiften: „Uns persönlich Highlight aver weer, as mien Leevste un ik von Reimer Bull persönlich mit Handslag begröt worrn. Vergnöögt fraag he uns: „Dörv ik jümehr Kledaasch afnehmen?“ Un dennso hung he uns Mäntel an de Gardrov un sä: „Dat is de Verehrung vun den Autor gegenöver siene Lesers!“ Un nu frag ik di: „Wat sünd de Queen oder een Fleger gegen son Beleevnis?“ Middewiel hett de dore Plattdüütsche Bökermess sogor Jubiläum: To’n 20. Mol kaamt an‘ 4. un 5. November üm un bi 40 lütte un groote Verloge un Schrieverslüüd ut ganz Norddüütschland na Hamborg, üm ehrn plattdüütschen Kraam vörtostellen. Un twaars in den Lichtwarksaal vun’e „Carl-Toepfer-Stiften“ .

Heike Thode-Scheel 20.10.2017