Menü
Kieler Nachrichten | Ihre Zeitung aus Kiel
Nachrichten auf Platt Oolt warrn is fein - oolt ween nich
Nachrichten auf Platt Oolt warrn is fein - oolt ween nich
Partner im Redaktionsnetzwerk Deutschland
08:18 10.10.2016
Von Heike Thode-Scheel
Grootkind Tilda (Farina Giesmann) mit Opa Amandus (Joachim Bliese). Quelle: Ohnsorg-Theoter
Anzeige

Dat is een plattdüütsche Erstopführen. Översett un inszeneert vun Frank Gruppe, de all männigeen sworen hochdüütschen Stoff op’e plattdüütsche Theoterbühn hoolt hett.  Dat Stück is nämli de Bühnenversion vun Til Schweigers  Kino-Hit „Honig im Kopf“. Över söven Millionen Lüüd hebbt den Film sehn – un ok de plattdüütsche Theoter-Premiere weer glieks een övergroten Erfolg. Minutenlang hebbt de Tokiekers applaudeert. Keen Wunner – denn de groote Schauspeler Joachim Bliese  speelt Opa Amandus.  He is een olen Haas mit siene 81 Johr. Nahto 57 Johr steiht he nu all op’e Bühn. Een echten Charakterkopp – fienföhlig, taag, mol rappelig, denn wedder ganz liesen, mol opsternaatsch, denn wedder verbiestert.  De Plattschnacker is in Kiel born un hett all den Faust op Platt speelt, den ingebildeten Kranken vun Molierère un veele anner groote Charakter-Rullen – all’ns op Plattdüütsch, versteiht sik. Wobi he jüst so goot ok op Hochdüütsch spelen kann. Un dat nich blots op’e Bühn, sünnern ok in’t Fernsehn.

Em to Siet steiht Farina Violetta Giesmann as sien Grootkind Tilda. Jüst dat Gegendeel vun Bliese: 21 Johr jung, frisch vun’e Schauspeel-School in Stuttgart, kandidel, driest, een lütt Wippsteert mit‘ Talent to’t Drama – so neiht se as Kind vun ölben Johr  in ehr Latzbüx un mit weihen Hoor över de Bühn. Platt müss de Deern ut Nordfreesland eerst liern – aver dat hett se mit links maakt: „Ich bin immer am Brennen für große Herausforderungen und neue Sachen“, smuustert se.

De Beiden tosamen sünd een Gedicht. De Lütte rückt mit Opa eenfach ut. Denn ehr Öllern (speelt vun Oskar Ketelhut un Birte Kretschmer) wüllt em eenfach in’t Heim steeken. De narrsche Ole passt eenfach nich in ehr niemoodsche, fein utstaffeerte Karrierewelt. Tilda weet: Alzheimer-Patienten  kann een Stütt un Stöhn geven, wenn een se an Orte bringen deit, wo se sik utkennen doot. Wo se wat ganz besünneres beleevt hebbt. De Beiden maakt sik op’n Wech na Venedig. De ganze Reis warrd mit een  Video-Projekschoon vun Kolja Malik as Bühnenbild wiest. Amandus un Tilda staht op een Dreihbühn un beleevt so verscheeden Aventüür. Se liert ünnerwegens Minschen kennen, de se ünner de Arms griepen doot un Opa Amandus kann sik noch eenmol op sien Leven un sien Glück besinnen.

Mit dorbi sünd all de bekannten Ohnsorg-Lieblinge as Sandra Keck, Horst Arenthold, Birte Kretschmer un Oskar Ketelhut. De maakt de Saak rund – ok wenn een dat Lachen förwiss in‘ Hals steken blieven deit. Denn mit Opa warrd dat jümmers slimmer – toletzt kennt he sogor sien Grootdochter Tilda nich mehr.

 Dat kümmt as dat kamen mutt – aver bit dorhin is dat een ganz besünners Stück twüschen Weenen un Lachen, twüschen Komik un Tragik – un jümmers ganz dicht an de Minschen dran. Dat maakt de plattdüütsche Spraak, de so veele passen Wöör-Biller to Hand hett. Un de sik nich verbögen lett, wenn dat üm de Wohrheit geiht. Un wohr is: „Oolt warrn is fein – Oolt ween is nich schön“.

Kommentare
Die Debatte geht am Morgen weiter
Die Kommentarfunktion ist zwischen 23:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt Henning Kothe is Tenor, Dokter un noch veel mehr - Düsse Dokter singt Arien op Platt

„Wann künnt wi denn mol een beten schnacken“, fraag ik Henning Kothe. „Mmh, jo, also hüüt is dat slecht. Morrn villicht. Nee, dor passt dat ok nich . . . doch. Also bit halvi söss heff ik Proov un denn mutt ik na Berlin. Ik roop se denn so üm Klock söss ut‘ Auto an . . .“ De Mann hett echt Hummeln in‘ Mors. „Jo, dat is een beten veel mankmol. Op’e een Siet bün ik Dokter. Maandags, Dingsdag un Middeweken. Un denn maak ik de anner halve Week Musik. Dat sünd de twee groten „M“s in mien Leven: Medizin un Musik.“

Heike Thode-Scheel 26.09.2016
Nachrichten auf Platt Heel erfolgreiche Speeltiet - Schnack mit Wolfgang Börnsen - "Dat Platt-Theoter hett 'n hogen Stellenwert"

Na de groote Sommerpaus heet dat wedder: Wi haut een Slag rin bi de plattdüütschen Bühnen in't Land. Wolfgang Börnsen, de Böverste vun' Nedderdüütschen Bühnenbund in Sleswig-Holsteen, vertellt uns Blatt nich blots, wat in'e niege Speeltiet los is, sünnern ok, wat to doon is, üm dat Platt-Theoter in'e Tokunft to stüern. Wolfgang Börnsen över de Bilanz vun't Nedderdüütsche Theoter in uns Land: "Kloor is doch: Qualität sett sik jümmers dörch. De Bilanz wiest ut, datt Platt-Theoter hett middewiel een hogen Stellenwert. Un wi hebbt een vun’e erfolgreichsten Speeltieden achter uns."

Heike Thode-Scheel 14.09.2016
Nachrichten auf Platt Nu gifft dat den Häwelmann endli ok op Platt - "Mudder, ik will föhrn"

 „Mudder,“ reep de lütte Häwelmann, „ik will föhrn!“ Un de Mudder reck in’n Slaap mit den Arm ut dat Bett un rull de lütte Bettsteed hen un her, un wenn ehr de Arm mööd warrn schull, so reep de lütte Häwelmann: „Mehr, mehr!“ Dat wunnerbore Kinner-Märken vun den lütten drallen Häwelmann, de partout nich inslapen will, hett de grote norddüütsche Dichtersmann Theodor Storm 1849 schreven. Op Hochdüütsch allerdings. Dat is een echten Kinnerbook-Klassiker wurrn mit de söten Biller vun Else Wenz-Vietor. Nu gifft dat de lütte snaaksche Geschicht üm den Buttjer, de bit an’t Enn vun’e Welt merrn dörch de Steerns in‘ Heven suusen deit mit sien Rullenbett, endli ok op Platt.: „De lütte Häwelmann“ – op Platt överdragen vun Paster un Plattschnacker Ulrich Gradert. Rutbröcht vun‘ Vitolibro Verlag.

16.08.2016
Anzeige