4 ° / -4 ° wolkig

Navigation:
Platt-Krawall in't All

Aluköpp lanndt in Preetz un maakt Theoter vun Platt-Krawall in't All

„Maak de Rakete kloor! Erde, wi kaamt“, roopt de Aliens mit den Alukopp. Un denn stiegt se in ehr Rakeet rin, dat ruckelt, dat wackelt un rumoort un denn gifft dat  optletzt noch so‘n blauen Nevel un schwupps – sünd se op de Eer in Preetz lanndt. Dor wo de Musik herkümmt. Sowat kennt se op ehrn Alien-Planeten gor nich. Dor gifft dat blots Müll un sünst nix. Bi de Minschen op’e Eer, dor is all’ns so püük un schier. Un denn düsse wunnerbore Musik! Schaad blots - de Minschen künnt de Aliens gor nich verstahn: „Du schnackst ja auch diese komische Sprache“, wunnerwarkt DJ Piratos, de Musikmaker. Düsse komische Spraak, dat is Plattdüütsch.  Un de is jo ganz eenfach, meent tominnst de Aliens. Naja – de sösstein Jungs un Deerns vun‘e Jugendbühn Preetz, de hebbt dat jo ok kinkregen mit dat Platt liern. Rutsuert is dorbi sotoseggen „Theoter vun een annern Steern“: Dat plattdüütsche Stück „Krawall in’t All“.

Voriger Artikel
Beten Platt för lütte Klabauter
Nächster Artikel
"Mudder, ik will föhrn"

De Aluköpp lanndt in Preetz.

Quelle: Thode-Scheel

„Mannomann – sösstein ünner een Hoot to kriegen, dat is swoor“, smuustert Claudia Siemsen. De Schoolmeestersche hett de Leit vun’t Platt-Theoter. „En mutt to’n Trummeln, een to’n Drakenbootrennen, een mutt fröher na Huus . . . wi hebbt villicht twee oder dree Prooven hatt, wo würkli alle dor weern.“

De Generalproov is denn ok schöön dorneven gahn: „Dor seten keen Aliens in’e Rakete binn.“ Dorför hett denn in echt bi de twee Opführen in’e Preetzer Friedrich-Ebert-School all’ns op’t Best klappt. Sogor de Saak mit den plattdüütschen Text. Dat is nämli gor nich so eenfach för de Kinner, vertellt Claudia Siemsen: „Wieldatt se in‘n Fremdspraak spelen doot, künnt de nich mol so eenfach improviseern un cool wat anners seggen. Denn sünst schnackt se de Spraak jo nich.“

De jüngste ut ehrn Trupp is tein, de öllste veertein – se kaamt ut’e Grundschool, ut’e Gemeenschapsschool un ut‘ Gymnasium. För de Schoolmeestersche is dat‘n Glücksfall: „Se fangt alle an‘e glieke Steed an. Egool, wo old du büst, egool, wo klook du büst – hier kümmt dat op wat ganz anners an: Op de plattdüütsche Spraak.“ Un de mööt se eben alle tosamen öven – offschoonst de meisten jo all mol mit dat Stück „De Papparazzi kaamt“ op’e plattdüütsche Bühn stahn hebbt.

Dor is denn ok een Barg in’e doren  Aluköpp hangen bleven. To’n Glück. De jungen Plattschnacker wulln sogor eerst ehr eegen Stück schrieven -  aver na‘t Seminar mit Autor, Schauspeler un  Regisseur Stefan Greve is se fix kloor wurrn: Dat is gor nich so eenfach! Un denn harr de Theotermaker doch wohrrafti noch een wunnerbor amüsantes Stück in’e Schuuvlaad liggen. Mit Butenirdsche un Planeten. „Alien Rock“ heet dat. De Kinner hebbt dor denn noch so’n beten na ehr Dünken an rümklüüternt: „De hebbt so veele Ideen hatt un hebbt  sik soveel utdacht“, swöögt Plattschnackerin Claudia Siemsen. „Middewiel is dat so as ehr egen Stück“.

De Schoolmeestersche hett denn dat hochdüütsche Stück op Platt översett: „Krawall in’t All“ nöömt sik dat nu. Un örnli Krawall un Puhee, dat geev dat op’e Bühn to sehn. De Toschauers weern Füer un Flamm. „Star wars war gestern“,  amüseert sik Claudia Siemsen över een Zeitungsartike un nickköpptl. Tja, un hüüt, dor schnackt sogor de Aliens in’t All Plattdüütsch: „In de moderne Welt is dat de Spraak vun’e Tokunft“, seggt een lütt Alukopp ganz wiss.

Voriger Artikel
Nächster Artikel
Mehr aus Nachrichten auf Platt 2/3