27 ° / 11 ° heiter

Navigation:
Platt-Theoter entert de School

Dat Projekt "Theater und Schule" - en Schwerpunkt is Plattdüütsch Platt-Theoter entert de School

Een Tusch, dat is‘n luuden Akkord vun’e Blaaskapell. Denn passeert meist wat Besünneres. So wat Besünneres is ook TuSCH – de  Tosamenarbeit twüschen  „Theater und Schule“. Een Projekt, dat nu all söbentein Johr op’n Buckel hett. De Idee, de dor achter steeken deit, is ganz eenfach: Dat Theoter bringt Kunst un Kultur in de Schoolen rin un to de Kinner un Jugendlichen hin  – un nimmt vun’e Schölers wedder veele niege Impulse för’t Theoter mit. In Berlin hett dat anfungen – middewiel gifft dat all TUSCH-Projekte in söven groote Städte. Dorto höört ook Hamborg mit föfftein Theoter un twintig Schoolen. Dat Besünnere: Dat Ohnsorg-Theoter is mit‘n Schwerpunkt Plattdüütsch mit vun’e Partie. Un twaars över twee Schooljohr.

Voriger Artikel
Platt, modern un nich oldbacksch
Nächster Artikel
He kiekt in' plattdüütsche Seel rin

Junge Lüüd speelt Theoter in' Jugendclub vun'e Ohnsorg Studio-Bühn.

Quelle: Sinje Hasheider

„Warm di op“ – dat weer de Slogan vun Cornelia Ehlers. Se is Dramaturgin un Leiterin vun’e Ohnsorg-Studio Bühn. Verleeden Johr hett se tosamen mit de Schölers vun’e Katharinenschool in de Hafen City een Warksteed op de Been stellt, üm sik so peu à peu an de plattdüütsche Spraak rantofummeln. De Schoolmeester müssen toeerst  de wichtigsten plattdüütschen Wöör liern. Denn hebbt sik twölf Klassen vun’e School dat Stück „Die große Wörterfabrik – Wöör mit Kulöör“ op de  Ohnsorg-Studio Bühn ankeeken. Un weern glieks Füer un Flamm – nich blots för dat Theoterstück, sünnern ook för de plattdüütsche Spraak. Vör allen Dingen de Tungenbreeker-Wettbewarb „Germanys next Tungenknieper“ weer’n grooten Erfolg.

In‘ April steiht nu een Projektwuch op’t Programm. Dat Thema: Hamborg, Theoter un Platt. Dor gifft dat verscheeden Projekte: In dat Piraten-Projekt geiht dat üm Störtebeker un Co. De Kinner wüllt dat Maritime Museum in Hamborg besööken un korte Speelszenen prooven. Denn gifft dat noch een Grupp, de tosamen mit‘n ehemoligen Hafenarbeiter, den sonöömten Hafensenior,  över ole Berufe snacken will, de mit’e Seefohrt to doon hebbt. Ut de Hamborger Originole Zitroonjette un Lütt-Erna schall een anner Grupp een lütt Theoterstück tosamenschoostern. Hamborger Straatennamen un Denkmole staht ook op’t Projekt-Programm. De Kinner schüllt sik klook maaken, wat achter de Naams steeken deit. Wat för Minschen un wat för Leevensgeschichten. Un wenn all’ns in‘ drööge Döker is, denn wüllt se alle Arbeiten in een Fotoprojekt vörstellen.

Dat Besünnere an TUSCH in’t Ohnsorg-Theoter: Hier rückt nich blots Theoter un School enger tosamen, sünnern Theoter, School un Plattdüütsch. „De Idee vun TUSCH is ganz eenfach: Wi bringt dat Theoter in de Schoolen rin un nehmt sotoseggen den künstlerischen Input wedder mit trüch. Dat Spezielle för’t Ohnsorg-Theoter is: Plattdüütsch entert nu ook de School“, swöögt de Theoterfru. „Jede Schülerin und jeder Schüler in Hamburg soll die Chance haben, Theaterkunst zu erleben und selbst Theater zu spielen“, heet dat in’t TUSCH-Porträt. „TUSCH weckt Neugier auf fremde Welten und Erlebnisse und motiviert damit zur Auseinandersetzung und zum eigenen Ausprobieren neuer Theaterformate und Stilmittel.“

Bit Ohnsorg-Theoter is dat also nich blots een frömde Welt, de de Jungs un Deerns to sehn kriegt, se kriegt ook noch so ganz blangenbi een för se „frömde“ Spraak mit. Un liert bavento, datt een düsse Spraak ook wunnerbor för’t Theoter bruuken kann. Dorüm is Cornelia Ehlers ook Füer un Flamm för dat Projekt. Ganz besünners gefallt ehr, datt beiden Sieden wat to geeven hebbt – dat Theoter un ook de School. Dor kaamt een Barg Kompetenzen tosamen. In’e Wirtschap nöömt sik sowat een „win-win-Situation“. Oder op Platt: Dat is een Geeven un Nehmen. Een Togewinn för beide Sieden.

TUSCH is in Hamborg ook längs nich mehr blots een Projekt – dat höört nu mit to dat Programm för kulturelle Kinder- und Jugendbildung. Tostännig is dorför de Behörde för Schule und Bildung. Mit in’t Boot sitt noch de BürgerStiften, de Stiften Mercator un de Hamborger Kulturbehörde. Un natürli de Schöler, de Schoolen, de Schoolmeester, de Theoterlüüd, Schauspeeler un Öllern. Se alle staht tosamen, üm dat Theoter un de Kultur nieg optorüüschen. Üm niege Wege to gahn. Ook op Platt.

Voriger Artikel
Nächster Artikel