Menü
Kieler Nachrichten | Ihre Zeitung aus Kiel
Nachrichten auf Platt Prinzessin ut' Koma wachküsst
Nachrichten auf Platt Prinzessin ut' Koma wachküsst
Partner im Redaktionsnetzwerk Deutschland
06:00 06.02.2016
Von Heike Thode-Scheel
Paparrazzi-Foto vun'e Königsfamilie. Quelle: Thode-Scheel

Dat glöövst du nich? Na, dat heff ik doch mit egen Ogen sehn. In dat plattdüütsche Stück „De Paparazzi kaamt! Oder: Dornröschen – wat is passeert“. In Preetz. Speelt vun föfftein Jungs un Deerns twüschen negen un dörtein Johr. Op Plattdüütsch. Se höört alle to dat Jugendprojekttheoter Preetz un staht nich to’n eersten Mol mit een plattdüütsches Stück op’e Bühn. Füer un Flamm is ok Claudia Siemsen. De Schoolmeestersche hett de Leit vun’t Projekt un hett nich blots dat Stück op Platt översett – nee, se hett de Kinner ok Platt bipuult. Un de künnt intwüschen richtig goot snacken.

Dorbi hebbt de mehrsten vun se mit Platt noch gor nix an‘ Hoot hatt: „Twee vun’e Feen sünd eerst in‘ Dezember bi mi ankamen un hebbt fraagt: Können wir auch noch mitmachen“, smuustert Claudia Siemsen, de in Preetz ok Platt ünnerrichten deit. Un twaars in een vun’e 29 Modellscholen in’t Land.  Se freut sik richtig över dat groote Engagement vun’e Kinner: „De sünd jümmers na de School noch för twee Stünnen extra herkamen. Un denn hebbt wi ok noch twee Workshops maakt. En mit’n Maskenbildnerin – de hett uns denn de Saak mit dat richtige Schminken bibröcht un denn noch een mit‘n Schauspelerin. Vunwegen Stimme un Präsens. Dat weer noch mol wichtig för uns“, sineert de Plattsnackerin. Twüschendörch hebbt de jungen Schauspeler rümprobeert:  Emoschoonen, Blicke, Gesten – „all’ns, wat een för’t  Theoter bruukt“. Un denn güng dat Platt öven los: „De hebbt vörleest un ik heff denn korrigeert.“ Aver dat geiht ehr nich blots üm den richtigen Text un dat richtige Platt: „De mööt ok Geföhle transporteern“, verklaart Claudia Siemsen. „De mööt in’t Hart un in’e Seel gahn. De mööt weten, woans dat utsüht, wenn een füünsch is. Oder verleevt.“

Ohauaha – „mit dat Küssen weer dat wat“, smuustert se . . . aver so is dat nu mol bi so‘n wunnerschöne Leevsgeschicht. Enfach märkenhaft. Offschoonst – vun’t Märken Dornröschen is bi düt Stück nich alltoveel nableven. Stell di mol vör: De König is keen König mehr – dor regeert nu een Bunneskanzlerin: „Dat geiht ja gor nich“, meent he. De Prinzessin hett sik in een Azubi verleevt: „En Fotograf? So en kannst du op keen Fall heiraten, mien Kind!“ seggt Königin-Modder. Dat Slott is verköfft an den Medienmogul Axel Hüpper: „Nu, denn warr ik dat wedder trüch köpen. Ik bün ja‘n rieken Mann!“ glöövt König-Vadder. De eische Fee Narzissa sinnt op Rache: „Dat mit de Paparazzi hett beter klappt, as ik dacht heff.“ De Paparazzi jiepelt na een gräsig-schöön-suure Titelstory: „Aha, he denkt, he is‘n König. Bestimmt hett he een op’e Luuk!“ Un de dree nüüdlichen Feen, de wüllt all’ns wedder in’e Reeg bringen: „Düsse driesten Keerls schüllt nu en flotten Otto kriegen!“

Wat för’n niemoodschen Slamassel! Un de snackt ok alle so’ne snaaksche Spraak. De lütten Schauspelers jedenfalls gefallt dat. Dat Stück un de Spraak: „Ich wollte von Anfang an die Rolle haben. Das ist so eine süße Rolle. Und das Kleid finde ich auch so toll“, swöögt (Prinzessin) Nina Lange. Un mit Platt, dor hett se gor keene Probleme. Ümmerhin is se Siegerin in‘ verleden Vörlese-Wettbewarb west. De eische Fee, ehrn achtertückschen Gegenpart, speelt Nathalie Tomanetz mit grote Övertüügen: „Das war total schön, die neuen Wörter kennenzulernen. Auch wenn das so eine böse Rolle ist“, grient se.

Aver dat Beste kümmt to’n Sluss. (Nee, nich: „Und wenn se nich storven sünd, denn leevt se noch hüüt . . .“): „De mehrsten wüllt wieder maken vun’e Kinner. De hebbt jo een Droom: De wüllt ehr eegen Stück schrieven. Un dor sünd een poor dorbi, de hebbt echt veel Fantasie. Aver dat is noch Tokunftsmusik“, swiestert Claudia Siemsen stolt. 

Wat ut’e sööte Prinzessin un ehr Azubi Sven wurrn is, wüllt ji weten? Na, is doch kloor: Dornröschen hett ehrn Sven fraagt: „Willst du mi heiroden?“ Un Sven weer reinwech ut’e Tüüt: „Wow, jo, Dornröschen, dat will ik wull.“ Ut dat ole Slott hebbt se‘n Hotel maakt, wo du Urlaub maken kannst as vör hunnert Johr. De Paparazzi sitt noch jümmers op’t Klo un de eische Fee hett sik Axelchen Hüpper snappt.

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt Matthew un Michael Youlden künnt twintig Spraken - un nu hebbt se ok noch ok Plattdüütsch liert - Füer un Flamm för Spraken

„Das war uns sehr wichtig mit Platt und wir wollen auch unbedingt weitermachen“, verseekert mi Michael un Matthew Youlden, „aber heute, so am Telefon und für die Zeitung, da schnacken wir erst mal Hochdeutsch. Und nachher künnt wi ok Platt snacken“, smuustert Matthew. Uns Plattdüütsch hebbt de Beiden nämli eerst vör een poor Weken liert. In söven Daag. Gor keen Problem för de Youlden-Tweeschen ut Manchester. Dat is jo man blots een vun’e twintig Spraken, de se tosamen snacken künnt . . . negen fließend, fief op’n hogen Level un de annern ümmerhin so, datt dat för’n Alldag recken deit. „Wir könnten jede Sprache der Welt lernen“, dor sünd sik de Tweeschen eens. Groote as ok lütte Spraken. Un nu ok noch Plattdüütsch.

Heike Thode-Scheel 21.01.2016
Nachrichten auf Platt Een musikaalsch Aventüür: Plattdüütscher Hip-Hop - Düsse Veer rappt all'ns platt

Vun Ines Barber

„An`t Enn maakt wi jümmers Gefangene“, smuustert Maddin. Also, se nehmt niege Fans mit, meent he natürli. Vun jedeen Konzert, vun jedeen Optritt in‘ heelen Norden. Mit op'n fixen luuden plattdüütschen Hip-Hop-Padd. Maddin, dat is de een Halvpart vun't plattdüütsche Rapper-un Hip-Hop-Duo „Blowm & Maddin“. Dat mit de Fans is gor  nich so eenfach. Denn – wat de Hip-Hopper dor vörhebbt, dat is‘n vigelliensch Aventüer – för de Plattdüütschen un för de Band. För dat öllere plattdütsche Publikum is Hip-Hop wat snaaksch. Kennt se nich. Man för de jungen Lüüd, de den ingelschen oder düütschen Hip-Hop gewohnt sünd, dor sünd de plattdüütschen Texte meist exootsch. Liekers. Gifft jümmers niege Fans dor in ehr plattdüütsche Musiker-Nische..

07.01.2016
Nachrichten auf Platt De Losungen: Gottes Woort för jedeen Dag - nu ok op Platt - Nu schnackt Gott Plattdüütsch

Man kann sik dat kuum vörstellen – aver dat is wohr: Bi över eene Million Lüüd in Düütschland liegt se morrns op’n Fröhstücksdisch - Bismarck hett se leest, Graf Zeppelin, Dietrich Bonnhöfer, De „Losungen“ vun’e Herrnhuter Gemeene. Dat is sowat as de dääglich Schnacks op’t Kalennerblatt.  Blots datt de Schnacks hier ut’e Bibel kaamt. Sotoseggen „Gottes Woord för jedeen Dag“. Un dat all siet 286 Johr. De doren  Losungen sünd aver nich blots bi uns een Bestseller. Se slaagt Brüchen to verscheden Religionen, verscheden Kontinente, verscheden Kulturen un to ganz verscheden Minschen. Denn De Herrnhuter Gemeene hett se vun ehre Missionare in de Welt bröcht. Een kann se in 35 Länner op fief Kontinente finnen. Dat lüerlütte Book mit de Bibelschnacks is middewiel in 61 Spraken översett wurrn.   Vun Afrikaans bit Zulu - un nu endli ok „up Platt“. 

Heike Thode-Scheel 28.12.2015