10 ° / 9 ° Regenschauer

Navigation:
Theoter mit un över Stratenkinner

"Tohuus" heet dat Theoterstück vun'e Ohnsorg-Studiobühn Theoter mit un över Stratenkinner

 „Wir sind die Dunkelziffer. Manchmal versuchen sie uns zu zählen.  Und eigentlich wissen sie es alle nicht so genau . . .“ Stratenkinner, de kennt jedeen vun uns. Biller vun Kinner in Indien un Brasilien kaamt een in‘ Sinn. För 100 Millionen Kinner op’e Welt is de Straat ehr Tohuus, seggt dat Kinnerhölpswark Terres des hommes.  To’n Glück wiet wech? Wat geiht mi dat an? Dor büst du op’n Holtwech. Stratenkinner gifft dat ok bi uns in’t rieke Düütschland. För üm un bi 9000 Kinner un junge Lüüd is de Straat „Lebensmittelpunkt“. 32 000 Stratenkinner tellt de „Bundesarbeitsgemeinschaft Wohnungslosenhilfe“.  Vör allen Dingen in’e Grootstadt. Sogor in’e noble Hansestadt Hamborg kannst du se sehn. Jüstemang blangen dat Ohnsorg-Theoter an‘ Hauptbahnhoff gifft dat de Inrichten „KIDS“. Dor kümmert sik Soschaalarbeiter üm Kinner un junge Lüüd, de keen Tohuus mehr hebbt. Un wieldatt se dat Thema so ünner de Nogels brennen deit, hett nu de Jugendclub vun’t Ohnsorg-Theoter tosamen mit „KIDS“ een Theoterstück över Stratenkinner op’e Been stellt: „Tohuus“ heet dat.

Voriger Artikel
Dien egen Book in dien egen Spraak
Nächster Artikel
Warrd dat Plattdüütsch-Institut eenfach platt maakt?

De Jugendclub vun'e Ohnsorg-Studio-Bühn hett veel Spaaß.

Quelle: Ohnsorg-Theoter

„Dat geiht üm Heimaat, üm Vertruun, üm Familie, üm Frünn, üm Probleme as Drogen, Geld un Alkohol“, vertellt Cornelia Ehlers. Se hett de Leit vun’t Ohnsorg-Studio un betreut dat Jugend-Projekt: „Wi hebbt hier blangen dat Ohnsorg-Theoter jo so een Anloopstell för Kinner. Dor künnt se sik mellen, wenn se Hölp bruukt. Wenn se ehr Basis verloorn hebbt.“ So is de Idee för dat Theoterstück tostann kamen. Tosamen mit de Jungs un Deerns ut’n Jugendclub hett se sik een Handlung överleggt: „Wi hebbt dor soveel över schnackt. Över Geföhle mutt man schnacken. Un wi hebbt soveel rechercheert . . . un eenige kennten ok junge Lüüd, de op’e Straat leven doot.“ Se hebbt sik mit’e Kinner un Soschaalarbeiter vun KIDS drapen, mit‘e Stratenkinner schnackt un sik ehre Geschichten vertellen laten: „Eenige vun’e Jugendclub-Schauspeelers sünd echt wiet wech vun sowat. De wasst tohuus behütet op. Aver  dat gifft ok een poor, wo dat Öllernhuus zerrüttet is. Wo Alkohol mit in’t Speel is . . . Aver de meisten geiht dat echt goot. De seggt denn ok, wie goot se dat doch hebbt . . .“ 

Dat Stück is op Hoch un op Platt – schrieven doot se dat aver toeerst kumplett op Hochdüütsch. Sünst weer dat eenfach to swoor. Cornelia Ehlers översett denn de verscheeden Parts in ehr Modderspraak: „De Stratenkinner schnackt ünnereenanner in dat Stück Platt. Dat is ehr Spraak. Un de Monologe, ehr Gedanken, de sünd denn op Hochdüütsch.“ Dor sünd sogor Texte dorbi, de een poor vun‘e Stratenkinner ut Hamborg schreven hebbt. So is dat Stück noch dichter an’e Realität.

Dat geiht üm Ine, de tohuus Probleme hett un in‘n Grupp vun Stratenkinner rinkümmt. De Niege mutt sik dor aver eerst mol inleven: „Wat stickt achter de enkelten Persönlichkeiten? Wat passeert op’e Straat un mit de Minschen?“, dat sünd de Probleme, vertellt Plattschnackerin Cornelia Ehlers. Aver denn hebbt de Stratenkinner een Idee. Se wüllt tosamen sporen: „Jo, en Huus. En egen Huus. Groot noog för uns all. Un en egen Bett. Jeder hett sien egen Platz. Un Roh“, swöögt Erhan in’t Stück.  „Jichtenswenn kippt de Stimmung, dat Geld warrd klaut un denn geiht dat üm Vertruun un ehr Tohuus“, vertellt Cornelia Ehlers wieder.

 Stück för Stück hebbt se sik dat Theoter-Stück tosamenpuzzelt. Un mit Platt, dor klappt dat ok op’t Best: „Een poor vun’e jungen Lüüd sünd jo all veer Johr mit dorbi – eenige twee Johr un de twee Niegen künnt dat ok all. De verstaht all ganz veel.“ Dat löppt: „De sünd richtig stolt op sik. Man süht, datt de över sik rutwassen doot. Un se liert dorbi ok veel över sik sölben.“

„Wir sind die Dunkelziffer. Und eigentlich gibt es uns gar nicht. Denn es gibt ja das Jugendhilfegesetz. Jeder Mensch unter 18 hat Anrecht auf eine Betreuung. Irgendwo, irgendwie . . .“ bölkt se to’n Sluss op’e Bühn.

Voriger Artikel
Nächster Artikel
Mehr aus Nachrichten auf Platt 2/3