23 ° / 15 ° Gewitter

Navigation:
Vun Kappeln in'e wiete Welt

25 Johr Literaturpries: Ut Sternchen wurrn Stars Vun Kappeln in'e wiete Welt

25 Mol is de „Nobelpries vun’e Plattdüütschen“ all utlöövt wurrn – de „Niederdeutsche Literaturpreis der Stadt Kappeln“. De eerste, de em kregen hett,  dat weer Schrieversmann, Moderator, Redakteur un Verteller Gerd Spiekermann. Un twaars 1991: „Damals kam ich mir vor wie der erste Mann auf dem Mond“, hett he körtens in een Interview vertellt. Na em keemen noch veeruntwintig annere – de öllste is sogor all 113 Johr old. Un de leevt sogor noch! Dat is nämli dat Ohnsorg-Theoter in Hamborg. De hebbt den Pries düt Johr mit na Huus nohmen. Een lütten Rückblick op 25 Johr un 25 Priesträger.

Voriger Artikel
Bi Uwe liert de Butenlänners Platt
Nächster Artikel
„Platt is mien Welt“

Op'n richtigen Wech: Ina Müller is'n Star wurrn

Quelle: Pressefoto

In’t Speel weern ok dree Bühnen

Dat Ohnsorg-Theoter is nich de eerste Bühn, de sik den Nedderdüütschen Literaturpries suer verdeent hett: Dreemol hett de Jury nu all een plattdüütsche Bühn utteekent: 1997 de Nedderdüütsche Bühn Niemünster, 2012 de Flensborger Bühn un nu dat berühmte Ohnsorg-Theoter.

Aver op de List mit de Priesträger staht nich blots Theoter-Bühnen op. Dat is een  bunte Mischen ut Dichterslüüd, Musikanten, Ledermaker, Schrieverslüüd, ut Blattmaker, Radiomaker, ut Jugendgruppen un Översetter. Ok wenn de Pries Literatur-Pries heeten deit, is sik de Stadt Kappeln, de Sleswig-Holsteensche Heimatbund un dat Institut för Nedderdüütsche Spraak in Bremen eens, datt se jedeen Johr mit den Pries „neue Akzente gesetzt und Risikobereitschaft“ bewiest hebbt. Aver dat hett natürli ok sien Pries . . .

 

Den gröttsten Ärger

Den gröttsten Ärger hett dat 2010 geven wegen de Nomineern vun Adsche un Brackelmann – also Peter Heinrich Brix un Jan Fedder ut’e Kultserie „Büttenwarder“. Glieks veer ehemolige Priesträger hebbt de Verleihung domols boykoteert un sünd eenfach tohuus bleven: Reimer Bull, Konrad Hansen, Wolfgang Sieg un Dieter Andresen. Bull weer dat een „vollkommenes Rätsel“, worüm de Jury jüst op düsse Beiden kamen is. Dat würr jo wull blots üm „quotenträchtige Darstellung von Niederdeutsch in den Medien“ gahn. Na, dor hett de groote Schrieversmann  wull so’n lütt beten richtig legen . . .

 

Nimm twee . . .

Sünst harr jo ok de NDR nich tweemol een Pries insackt: Eenmol för den Schriev-Wettbewarb „Vertell doch mal“ – dat weer 1994. De is middewiel ok all över 25 Johr old. Un dat anner Mol 2006 för de Tradischoons-Radioreeg „Hör mal’n beten to“ (bald sösstig Johr).

 

De „heimliche Rekordhalter“

Liekers: Dat gifft noch een Mann, de ok all twee Mol mit op de Bühn stahn hett: Peter Nissen. De würr sogor all mol de „heimliche Rekordhalter nöömt“ . . . 1996 is he tosamen mit Holger Janssen un Reinhard Goltz för se ehr Kabarett „De scheewe Dree“ ehrt wurrn. 2003 kunn sik Peter Nissen noch mol op’n Wech na Kappeln maken. Dütmol tosamen mit sien Kumpagnon Hartmut Cyriacks. De beiden hebbt mit ehr plattdüütsche Textwarksteed „höchste sprachliche Kompetenz“ bewiest. Un natürli as Översetter vun so illustre Warke as Asterix un Harry Potter Platt ünner de jungen Lüüd bröcht. Een echten „Imagegewinn“ för de Spraak sotoseggen . . .

 

Platt-Stars warrd born

 Un wo wi graad bi Imagegewinn sünd: Een echten Star ünner de Kappelner Priesträger is jo wull Ina Müller.   2001 hett de Jury ehr Kabarett „queenbee“ uttekent.  Middelwiel füllt se grote Hallen mit Dusende vun Lüüd in’t In- un Utland mit ehre Leder. Twaars singt se nu tomeist op Hochdüütsch, aver plattdüütsche Leder, de höört jümmers noch mit to ehr Repertoire.  Wie heet dat in ehr Leed „De Wind vun Hamborg“: „Ik heff al sopen in Kiel, harr in Leck Langewiel, de Probstei mookt mi high.  Ik heff sogor mol’n Pries afhoolt ut Kappeln an’e Schlei . . .“

De tweete grote Star weer natürli Schrieversmann Reimer Bull – he weer de eerste Priesträger in’t niege Johrdusend un een Verfechter för de  Qualität vun Spraak un Inhalt. Un op dat Rebeet natürli een echten Künner un Kenner.

 

Een müss dat Schrieven eerst liern . . . Aver dat gifft ok Schrieverslüüd, de dat Schrieven eerst liern müssen un wullen - so as Frenz Bertram. De hett 1998 bi „Vertell-doch-mal“ wunnen, hett dorno  jümmers wedder mitmaakt bi de   Schrievwarksteeden vun‘ Heimatbund  un denn güng dat los: Theoterstücke, Vertellen, Sketche un sogor twee Romane. Un as Belohnen verleeden Johr den Kappelner Literaturpries: „Toeerst heff ik mi jo dull freut över den Pries.  Aver denn heff ik dat mit‘e Angst kregen. Nu dörf ik jo keen Schiet mehr schrieven. Das verpflichtet“, smuustert Frenz Bertram.

Voriger Artikel
Nächster Artikel
Mehr aus Nachrichten auf Platt 2/3