Menü
Kieler Nachrichten | Ihre Zeitung aus Kiel
Nachrichten auf Platt Vun' Maiskutscher to'n Internetstar
Nachrichten auf Platt Vun' Maiskutscher to'n Internetstar
Partner im Redaktionsnetzwerk Deutschland
12:00 02.11.2017
Von Heike Thode-Scheel
Keno Veith - en stolten plattdüütschen Jung ut Ostfreesland. Quelle: Ankerherz

 „Oh, harre jasses, ik bün graad eerst opstahn“, lamenteert Keno Veith un lacht sik een an’t Telefon. Egens is em jo all de Rummel üm sien Person nu bald toveel. Vunwegen „Schwarzer Ostfriese – Lohnarbeiter wird zum Internetstar“.  Plattdüütsch hett he nich liert – dat is em so to Ohrn kamen: „Ik bün bi mien Grootöllern op’n Buernhoff opwussen“, vertellt de Plattschnacker, „aver de hebbt mit mi nich Platt schnackt. Dat heff ik so mitkregen, wenn ik bi de Buern ünnerwegens weer. Man eignet sich dat jo so’n beten an un mi maakt dat eenfach Spaaß“. Wenn Keno Veith as „Maiskutscher“ ünnerwegens is, denn schnackt he natürli ok Platt mit’e Buern. Un dat hett ok sien Grund:  „Ik finn, de Spraak mutt erholln warrn“, un denn kümmt ok all een deep Pruusten dörch’t Telefon.

Wat ut Jux un Dulleree anfungen hett, dat maakt em nu so bilütten to’n Star. Dat video op facebook warrd de Renner: „Dat is doch nich normal. Nee, sowat“, wunnerwarkt de ostfreesche Jung. Na twee Daag harr he all 600 likes – dat heet: 600 Lüüd sünd Füer un Flamm för den plattdüütschen Maiskutscher. Middewiel möögt över 45 000 Lüüd den Plattschnacker. Dat berühmte Video, wo he mit sien Beest in’e Klei steken deit, dat hebbt sik meist över eene Million Lüüd ankeken. Op Platt. Dat mutt een sik mol vörstellen.

 Keno kann dat sölben nicht begriepen: „Ik maak Videos, wenn ik Lust dorto heff. Dat weer so’n Spaaß.“ Datt dat so rinhaun würr, dat kann he meist noch gor nich begriepen.  He mutt nu Interviews geven. De Stern hett wat över em schreven, de taz, de Bauernzeitung, verscheden regionole Bläder, de NDR hett bi em dreiht un he kümmt ut’e Schlagzeilen gor nich mehr rut: „Schwarzer Ostfriese erobert auf Plattdeutsch das Netz“, „A-Team Ostfriese Keno Veith wird mit Plattdeutsch zum Video-Star“, „Vom Traktorfahrer zum Internetstar“, „Mr.T von der Waterkant“. Un dat all’ns blots, wieldatt em dor in’e Klei langwieli weer mit sien Beest, den Fendt.

Vun Langewiel kennt he nu all siet twee Weken nix mehr. De Lohner kümmt meist gor nich mehr to’n Arbeiten bi all de Interviews, de he geven mutt. Un dat kümmt noch slimmer: „De Lüüd wüllt jo nu jümmers mehr“, vertellt Keno Veith, „aver so’n Knaller, den maakst du blots eenmol. Un denn pendelt sik dat so in.“ De Överraschungseffekt, de is denn eerstmol wech. Vunwegen schwatt un Platt. Denn eens is doch kloor: „Ik bün‘n echten Ostfrees – blots `n beten anners verpackt“, un denn kümmt dor wedder so’n deepes luudes Hucheln dörch‘ Telefon, datt een meist ansteken deit.

Op’e Welt kamen is de swatte Ostfrees in Wittmund. Sien Vadder weer as Entwicklungshelfer in Kamrun un hett sik dor in sien Modder verleevt. Laterhin sünd de dree denn trüchgahn na Kamerun. Aver Keno kunn de Hitten nich af un so is he op’n Hoff vun sien Grootöllern groot wurrn. Sotoseggen op’n Trecker. Dorför is he ok hüüt noch Füer un Flamm. Un för Platt. „Man mutt dat so’n beten hoch holln“, meent de ostfreesche Jung. Dat hett he nu förwiss hinkregen – mit een Million Klicks för sien plattdüütsches Video bi facebook.

Bi all den Stress as berühmten Internet-Star blifft he liekers mit beide Fööt in‘ Klei sotoseggen. Un dat offschoonst bi em nich blots dat Fernsehen ankloppen deit, sünnern ok de Fruunslüüd mit  elektronsche Breefe: „Dor is‘n ganzen Bült Deerns dorbi – ok Plattschnacker“, smuustert he. Aver mehr will he nich verraden. Blots eens noch: „Ik bün so flink as ik kann. Wenn’t geiht, will ik op jedeen mail antwurten.“  Dat maakt Keno Veith na Fieravend. Ok op Platt. Denn: „Platt is topp“, verseekert he, „wenn ik op Tour bün mit mien Kollegen, denn warrd dat Platt jümmers beter, jümehr wi drunken hebbt“, un denn lacht he wedder luudhals. „He is mega cool un bannig sööt“, schrifft Manuela Braun bi facebook, „bringt Platt wieder an die jungen Leute von heute, das ist total wichtig.“

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!
Nachrichten auf Platt 20 Johr Plattdüütsche Bökermess in Hamborg - Kieken, lüstern, smökern

Wi schrievt dat Johr 2005. In Hamborg geev dat twee ganz groote Belevnisse un de heele Stadt weer op‘e Been: De Passageerdamper „Queen Mary 2“ kümmt to Besöök in‘ Haben un in Finkwarder lanndt to glieke Tiet de gröttste Fleger vun’e Welt, de A380. Dat weer een Spektokel! Man för Helmut Kujawa, Schrieversmann vun’t Hamborger Avendblatt, geev dat domols een ganz anner Superlative. Un twaars de Plattdüütsche Bökermess in‘ Lichtwarksaal vun’e Carl-Toepfer-Stiften: „Uns persönlich Highlight aver weer, as mien Leevste un ik von Reimer Bull persönlich mit Handslag begröt worrn. Vergnöögt fraag he uns: „Dörv ik jümehr Kledaasch afnehmen?“ Un dennso hung he uns Mäntel an de Gardrov un sä: „Dat is de Verehrung vun den Autor gegenöver siene Lesers!“ Un nu frag ik di: „Wat sünd de Queen oder een Fleger gegen son Beleevnis?“ Middewiel hett de dore Plattdüütsche Bökermess sogor Jubiläum: To’n 20. Mol kaamt an‘ 4. un 5. November üm un bi 40 lütte un groote Verloge un Schrieverslüüd ut ganz Norddüütschland na Hamborg, üm ehrn plattdüütschen Kraam vörtostellen. Un twaars in den Lichtwarksaal vun’e „Carl-Toepfer-Stiften“ .

Heike Thode-Scheel 20.10.2017
Nachrichten auf Platt Perfesser Elmentaler: "Kiel könnte schon mit Platt werben", - Wokeen will wull dicke Pött' kieken in'e Sailing City?

Dr. Michael Elmentaler is Perfesser an’t germanistische Seminar in Kiel. Spraak is sien Profeschoon – vör allen Dingen de plattdüütsche Spraak. As Linguistik-Experte hett he ´n Barg Böker schreven un en Hupen Opsätze dorto. Een dorvun schullen sik man ok de Marketing-Experten, de Politiker un de Werbefachlüüd in uns Land mol nipp un nau ankieken – villicht künnt se dor wat ut liern. Dat Thema is wat vigelliensch, man dat hett dat in sik: „Platt – Missingsch – Petuh: Enregistermentprozesse zwischen Hamburg und Flensburg“. Tosamen mit sien Kolleg Perfesser Dr. Oliver Niebuhr hett he ünnersöcht, ob dat sowat as een „Funktionalisierung der Sprache“ bi uns in Norddüütschland geven deit. Dat bedüüt: Een bruukt eenfach bestimmte Wöör ut anner lütte Spraken, üm to wiesen: Ik bün vun hier. Ik kaam ut Kiel. Oder ut Flensborg oder ut Hamborg. Wenn jümmers mehr Lüüd jümmers mehr bestimmte Begriffe ut anner Sprakenregister bruken doot, denn suert dor optletzt een ganz nieges Spraakregister bi rut. Un batz – is dor so’n „Enregistermentprozess“ in’e Gang.

Heike Thode-Scheel 23.10.2017
Nachrichten auf Platt Fleederbeern maakt gesund - un sünd so lecker - De Medizinschapp vun'e Buern

„Kiek ins blots mol, mien lütt Deern:

all de swatten Fleederbeern!

Morgen fröh, wenn allens glückt,

morgen fröh, denn ward se plückt!

Strippeln ... rin noh’n Putt, sühso!

Lütte Appelstücken to ...

Woter ... Sucker ... Klüten dreihn,

dorijo, dat ward mol fein!“

 

Dor löppt een doch dat Water in‘ Mund tosamen, wenn een de wunnerboren Reegen vun den sleswig-holsteenschen Dichtersmann Emil Hecker lesen deit. Wat is dat doch för’n Genuss, so’n Fleederbeersupp mit Appeln un Klümp! Un dat Schönste: De kannst du glieks vör dien Huusdöör plücken. Tominnst bi uns op’t Land. Keen Buernhoff, wo nich tominnst een Fleederbeernbusch an’t Huus oder an’e Schüün stahn deit. Un dat hett ok sien gooden Grund: „Holunder vor den Stall gepflanzt, schützt das Vieh vor Zauberei und Behexung. Wehrt überhaupt der Verzauberung und allem Bösen“, steiht in een uroles Book binn. Sogor gegen Blitz un Füer schall de Busch hölpen.

Heike Thode-Scheel 21.09.2017