4 ° / -2 ° Nebel

Navigation:
Warrd dat Plattdüütsch-Institut eenfach platt maakt?

Künnigung: Wat kümmt na't Institut för Nedderdüütsche Spraak? Warrd dat Plattdüütsch-Institut eenfach platt maakt?

„Keen Minsch ut’e Politik hett bit nu nich mit mi schnackt. Punkt!“ Dr. Reinhard Goltz vun’t Institut för Nedderdüütsche Spraak (INS) in Bremen is suer. Keen Wunner: „Ik heff nu den Europaraat inschalt – un de sünd ok empört!“ De Grund: De veer norddütschen Bunneslänner Sleswig-Holsteen, Hamborg, Bremen un Neddersassen hebbt ehr Förderafkommen för dat Institut för Nedderdüütsche Spraak künnigt. In‘ Dezember 2017 schall endgültig Sluss ween. 272 000 Euro spendeert de veer Bunneslänner in’t Johr för’t Institut in Bremen – dat sünd twee Drüttel vun’t Budget. Un dat siet 1979.

Voriger Artikel
Theoter mit un över Stratenkinner
Nächster Artikel
Beten Platt för lütte Klabauter

Dat INS will Platt bewohrn - aver wo lang noch?

Quelle: oh

 Dorför kümmert sik dat INS överregional üm de Förderung vun’e Plattdüütsche Spraak un Kultur. Se sünd Stütt un Stünd för Scholen, Kinnergoorns un Unis, för Karken, Theoter, Vereene un Verbänne. Bi’t INS loopt sotoseggen all de plattdüütschen Fodens to een groot Platt-Nettwark tosamen. Wie heet dat so schön op’e Siet vun uns Lannesregeern: „Als zentrale Einrichtung zwischen Wissenschaft und Serviceleistung  fördert, stützt und vernetzt das Institut . . . alle Bemühungen um das Plattdeutsche“.

 „So een Institut kann man doch nich eenfach tweiklöben!“, wunnerwarkt Reinhard Goltz.  Liekers - in‘ Mai is de Künnigung in’t Huus fladdert – de Grünne sünd mehr as gediegen: „Vor dem Hintergund eines rasanten demografischen Wandels, einer sich immer schneller verändernden Mediengesellschaft und der unterschiedlichen regionalen Besonderheiten haben die oben erwähnten Bundesländer einvernehmlich beschlossen, die Pflege und Förderung der niederdeutschen Sprache inhaltlich, strukturell und organisatorisch auf eine neue Grundlage zu stellen“, heet dat in’t Schrieven vun den Bremer Senator för Kultur. „Dat passt doch nich to de Sprakencharta“, schanfutert de Böverste vun’t Institut. „Dor achter gifft dat anner Argumente“, meent he deepdinkern.

He hett Breefe an’e Ministerpräsidenten vun’e enkelten Länner schreven, an‘ Europaraat un an’t Bunnesinnenministerium: „Op Bunnesebene löppt wat – villicht kriegt de de Länner wedder an een Disch.“

De wüllt aver schients lever wat Eegens mit dat Geld op‘e Been stellen. „In Kooperation mit anderen Partnern“ heet dat so schöön. Kloor is nämli för alle veer Bunneslänner – un dat is de goode Noricht: Se wüllt dat Fördergeld för Platt nich etwa inspoorn. Se wüllt dat blots anners verdeelen, man wie dat gahn schall, dat weet keeneen: „De warrd sik noch ümkieken“, wohrschaut Reinhard Goltz. Denn de Unis hebbt all afwunken, vertellt he.  Perfesser Dr. Ingrid Schröder vun’e Nedderdüütsche Afdeelen an’e Uni Hamborg kann un will de Opgaven vun’t Institut wull nich övernehmen. Ok Robert Langhanke vun’e Uni Flensborg schüddelt den Kopp: „Dat künnt wi nich tosätzli leisten“. 

Vergrellt sünd ok all de plattdüütschen Vereene un Verbänne in’e veer Bunneslänner. Se wüllt dat Institut nu Stütt un Stöhn geven. De Plattdüütsche Raat Sleswig-Holstein steiht achter Reinhard Goltz un siene Lüüd. In een Schrieven an‘e Ministerin för Justiz, Kultur un Europa, Anke Spoorendonk, löövt se twaars de veelen positiven Ansätze in Sleswig-Holsteen – vör allen Dingen den Handlungsplan Sprachenpolitik, aver se wohrschaut: „Diesen Aufwind sollte man nicht ausbremsen . . ., indem eine der wichtigsten überregionalen Säulen für die Sprache – das INS – zerstört wird.“ De Plattdüütsche Raat wiest vör allen Dingen op den „Blick über die Landesgrenzen hinaus“ hin: „Die zur Verfügung stehenden Mittel können effektiv eingesetzt werden, die Kräfte können gebündelt werden und kommen allen beteiligten Bundesländern zugute“, heet dat in’t Schrieven an’e Ministerin. Böös in Brass is ok Wolfgang Börnsen, de Böverste vun‘ Nedderdüütschen Bühnenbund in Sleswig-Holsteen: „Dat Biel an‘ Platt-Boom to setten, is för alle Sleswig-Holsteener een Slag in‘
t Gesicht. Politik för Platt meent, sick mit all de annern Länner, wo de Europäische Spraakencharta gelln deit, an een Disch to setten . . .“

Dat schall nu ok in‘ Juli in Kiel losgahn – mit een runnen Disch bi de Ministerin.

Voriger Artikel
Nächster Artikel
Mehr aus Nachrichten auf Platt 2/3