36 000 Geschichten in 25 Johr

Dat eerst Thema weer „Wiehnachten tohuus“, dormang weern „Bi de Arbeit“, „Dat leve Geld“, „Wat`n Malöör“ un 1998 „Glück hatt“. Düt Thema hett den Mildstedter Autor Frenz Bertram heel na vörn bröcht. Dormols schreev de Mann sien Vertelln „Dükern“. Een dramatsch spannend Geschicht över een Mootproov ünner Jungs. Noch hüüt kannst düsse Vertelln in Leesböker finnen un anner Lüüd dräägt se geern vör – so goot hett de Mann dormols de Stimmung infungen un schreven. Un dor is dormols denn dat passeert, wat för een Autor sowat as de duppelte Ritterslag woll siin mutt: Nich blots de Jury hett em den eersten Pries toslaan, nee, he kreeg ok den Publikumspries. Dat bedüüt – nur mol so nevenbi – nich blots duppelte Ehr, sünnern op twee mol Priesgeld! Also, dat löpt so bi „Vertell doch mal“: De 25 besten Vertelln koomt in een Book. De Autorn wart toon Afsluss na Hamborg to een „Matinée“ in`t Ohnsorg-Theater inladt. Dor sitt se denn opreegt un ünner Strom mit rode Backen in`t Publikum.Se weet blots, wat se de Schangs op een vunne eersten fief Plätz hebbt, nich woans se würklich lannt sünd. Nu wart de besten fief Geschichten vun bekannte Schospeelers op Schönst vörleest. Dat mutt ok för de Autorn jedsmol so`n Geföhl siin as Wiehnachten un Gebortsdag tosomen, denn de profeschionelle Vördrag vunne Schospeelers un de Text fiert jedsmol een grandios Hochtiet op de Bühn un so kriggt de een or anner Vertelln op düsse Wies noch`n Klacks Glamour un Dramatik baven op to.- Dat geiht vun achtern, also Platz fief los – un de letzt is denn de eerst. So weer dat dormols ok bi de Vertelln „Dükern“ vun Frenz Bertram. Inne Paus dörf jedsmol dat Publikum mit afstimmen un sik siin Leevlingsgeschicht utsöken - dat is denn de Publikumspries. Platz een bit fief hett een Jury ut prominente Plattsnackers vördem utwählt. Keen bi „Vertell doch mal“ mitmakt, hett also mit Schangs nich blots een intressant Tiet alleen mit` Papeer un Stift oder Laptop vör sik, kann sik nich blots dor op freien, wat de Geschicht villicht in` Book kümmt, nee, wenn`t klappt, denn kann de Autor oder de Autorin een ganz wunnerborn un opregen eenzigordigen Dag in Hamborg mit`n NDR verbringen. Dat is`n Beleevnis, wat`n nich köpen kann. Dat Strohlen in` Gesichter vunne Gewinner wiest jedsmol al Lüüd in`t Publikum, dor sweevt nu jüst een op Wulke söben – un mit Recht! De Vertelln sünd al – ok de, de nicht ünner de eersten lannt- mit Hartblood schreven. Un nich een Manuskript lannt womöglich in Papeerkorv. Al Geschichten – denn dat is jo uns riesengrote Plattdütsch-Schatz siet nu 25 Joarn – koomt an`t Enn na Kiel inne Lannesbibliothek in` smucken Sartori-Spieker an Haven.. Dor „leevt“ se denn neven Warken vun Klaus Groth un Johann-Hinrich Fehrs, neven den Nalass vun Albert Einstein oder ok Johann Heinrich Voß. Man nu – ehr dat de Geschichten ut 2013 sik dat mang al de Promis inne Lannesbibliothek kommodig maken köönt, dor mööt se eerst mol schreven warrn. „Töven“ is dat Thema. Över 3000,-- Euro töövt op de Gewinner un bit toon 28. Februar mööt de Vertelln bien NDR sein. Twee Sieden Platz mutt langen. Mihr Informationen, Tipps un veel to lesen un to wunnern ründ üm „Vertell doch mal“ gifft in`Internet ünner ndr.de/sh. Un ganz besünners frei ik mi, wenn Se villicht mol`n poor Wöör över`t Schrieven, dat Thema oder wat se so infalln deit in`t Forum rintackert! Ik anter garanteert un villicht leernt wi uns al denn jo op de Matinèe toon goden Afsluss in Hamborg mol persönlich kennen. Dor mööt wi denn blots noch`n beten töven un Se bringt erstmol den Bregen toon glöhen! Ik drück de Duumens.-

En Blick achter de Kulissen vun den Schrievwettbewarb "Vertell doch mal" - 36 000 Geschichten in 25 Johr