Verleeden Week is in Straßborg wedder dat EU-Parlament to een Vullversammeln tosamenkaamen. Dor güng dat üm de hoge Politik: Üm Biokraftstoffe, üm Glücksspeele un üm de Bankenunion. Dat güng aver ook üm een Resolution vun den EU-Afgeordneten Francois Alfonsi: „Vom Aussterben bedrohte europäische Sprachen und Sprachenvielfalt in der EU“, de mit groote Mehrheit över de Bühn gahn is. Un twaars mit 645 Stimmen. 26 Parlamentarier weern dorgegen, 29 hebbt sik de Stimm verknuust. Dat is een grooten Erfolg för den Schutz vun all de lütten Spraaken in Europa: „Das Europäische Parlament kann eine Hoffnungsträgerin sein für zehn Millionen Europäer, die ein Erbe, eine Sprache und eine von ihren Großvätern gelernte Kultur besitzen, und die sich wünschen, dieses Erbe auch an künftige Generationen weitergeben zu können“, hett de Korse Francois Alfonsi op Franzöösch seggt.
