Utopie oder Tokunft bi uns?

„Kuriose Abiturfächer: Reif für Platt“ schrifft Spiegel online. „Alptraum Reifeprüfung: Plattdeutsch als Abifach oder lieber Glück?“ fraagt överkröpsch de Radiowell Bayern2. „Wird das Abi immer sinnloser?“ spöttert en op de Internetsiet spießer.de. Ob dat wull sowat as en „Plattdeutsch-Jodeldiplom“ afgeven schall, spijöökt se in’t bi Heise online. Sogor op Facebook wunnerwarkt de Lüüd: „Plattdeutsch im Abitur - Das gibt es doch nicht!“ Doch, seggt Dr. Reinhard Goltz vun’t Institut för Nedderdüütsche Spraak in Bremen: „Opstunns höört sik dat na en Utopie an: Abi op Platt. Aver dat is noch kene teihn Johr her, dor harrn wi uns nich vörstellen kunnt, dat dat en Schoolfach Platt geven deit. De Minschen begriept mehr un mehr: Platt is nich blots en Stück Kultur vun't Land, nee: Platt höört ok to de Bildung mit to. Wi sünd op'n Weg.“ Jüst so süht dat wull ok Kultusminister Mathias Brodkorb ut Meckelnborg-Vörpommern - ok wenn em kloor is: „ . . . bis zum realen Unterricht in Schulen werden durch notwendige Fortbildungen noch ein, zwei Jahre verstreichen“. Aver denn schall dat sowiet sien. In de plattdüütsche Faten vun’t dore Lannesheimatprogramm steiht binn: „ Dat ward moeglich, dat Fach Nedderdüütsch as Tweite Frömdsprak in de wiederführend‘ Schaulen vun de söften Klass an tau ünnerrichten. Dat warden vier Gymnasien in’t Land inricht, in de Nedderdüütsch bet tau’t Abitur ünnerricht ward un dor ok afschloten warden kann.“ De truut sik wat dor in Meckelnborg-Vörpommern. Un dat sorgt natürli för riekli Gesprächstoff in Sleswig-Holsteen, wo jo nu all siet twee Johr Plattdüütsch in 29 Modellscholen op’n Stünnenplaan steiht. Grundlaag för den Platt-Ünnerricht in de eerste bit veerte Klass is de „Handlungsplan Sprachenpolitik“. Dor steiht binn: „Unser Leitbild ist ein geschlossener Bildungsgang in den Regional- oder Minderheitensprachen.“ Dat heet: Vun’e Kita bit to de Hochschool is Plattdüütsch mit dorbi. Aver een Abi op Platt? „Op jeden Fall!“, seggt Renate Schnack. Se is as Beopdragte vun’e Lannesregeern för de Minnerheiten tostännig. „Der schleswig-holsteinische Weg, Sprachenvielfalt und Mehrsprachigkeit an ausgewählten Standorten von der Kita bis in die berufliche Bildung und zur Universität zu ermöglichen, schließt natürlich ein Abitur mit ein“, dor is se sik wiss. Stütt un Stöhn gifft dat ok vun den Sleswig-Holsteenschen Heimatbund. Plattdüütsch-Referentin Marianne Ehlers is Füer un Flamm för Platt in’e Schoolen: „Wenn wi in twee Johr mit de Grundschool dörch sünd, denn mutt dat wiedergahn in de Gymnasien un in’e annern Scholen. Kloor duert dat noch en beten bet hen na’t Abitur op Platt. Man dat schull to maken ween!“ Ok de Plattdüütsche Raat vun Sleswig-Holsteen steiht ahn wenn un aver achter dat Abi op Platt: „ Plattdüütsch in ‘n Kinnergoorn un in‘e Grundschool – beides warrt al düchtig maakt. Nu mutt dat wiedergahn in de opwassen Scholen un denn logischerwies bet na‘t Abitur hen. Dorbi geiht dat al nu jümmers üm den „systematischen Spracherwerb“. Platt warrt lehrt as en anner Frömdspraak ok. Un denn kann dat - na kloor - ok en Fack in ‘t Abitur warrn“, seggt Heiko Gauert. He is Vörsitter vun‘ Raat un sitt ok in‘ Bunnesraat för Nedderdüütsch. Vull Toversicht is ok Lars Harms. He is as SSW-Afgeordneter Maat in‘ Biraat för Nedderdüütsch: „De Küstenkoalition is jüst dorbi, nie Plattdüütschklassen an de Scholen intorichten. Un wi hem Erfolg dormit. Nu schall dat Stück för Stück wiedergahn . . . un an‘t Ende kann denn uk en döörgahende Plattdüütschünnerricht bit hoch in’e 13. Klasse stahn“. „Plattdeutsch als Nischenfach, das es in Deutschland zu Abiturwürden bringt“ fraagt Spiegel online? „Na kloor!“, dat meent nich blots Heiko Gauert.

Abitur op Platt - Utopie oder Tokunft bi uns?