Bi de nächste Staschoon backbord!

Dat, wat dat dor to sehn (un op Platt to höörn) gifft, is de wull gröttste maritime Privat-Sammeln, de man in ganz Europa finnen kann: „Tohoopdragen hett jüm een Mann: Peter Tamm“, vertellt di de plattdüütsche Audioguide glieks an‘ Anfang. Mit een lüerlütten Wiking-Modellbuu-Frachter för föfftig Penn is de Hamborger Verleger anfungen: „Düt Modell weer de Anfang vun de weltwiet gröttste Sammlung över de Geschicht vun Seefohrt un Marin‘ . . .“ Dor weer he fief Johr old. Dat Schipp weer domols een Geschenk vun siene Modder. Nu steiht dat seeker ünner een Glasglock op Deck negen. Aver dat is blots eens vun 45 000 Scheep-Modelle, de he in all de Johrteinte sammelt hett. Mol afsehn vun de 5000 Biller, över 90 000 Böker, 60 000 Originol-Konstrukschoonspläne un Milljonen Fotos . . . „Für uns ist das Schiff Mittelpunkt der Weltgeschichte“ hett de Sammler Peter Tamm mol in een Interview seggt. Un to düsse Weltgeschicht höört de plattdüütsche Spraak unbedingt mit dorto, meenten de Mitarbeiters vun’t Museum un hebbt sik an de Arbeit maakt. Un denn hebbt se sik Hölp mit an Bord hoolt: För de technischen Saaken weer de Firma Soundcom tostännig. Texte, Biller un Videos to de enkelten Utstellungsstücke sünd so in den lütten grauen Apparaat rinwannert, den de Hochdüütschen Multimediaguide nöömt. Dat, wat dor op Platt in de Ohrn vun de Besöökers rinsüüselt, dat sünd de Stimmen vun de beiden Ohnsorg-Schauspeelers Erkki Hopf un Sonja Stein. Un dat, wat de dor verklaart, dat hebbt echte Platt-Experten op de Been stellt: De Hamborger Jungs Hartmut Cyriacks un Peter Nissen vun de Textmanufaktur. De hebbt ook all Asterix un Harry Potter Plattdüütsch bipuult. Un so mankeen Stück in’t Ohnsorg-Theoter. Oder verscheeden Hörspeele. Liekers: „Ganz eenfach weer dat nich“, meent Peter Nissen. „Aver dat weern nich unbedingt de technischen Saken, de uns Kummer maakt hebbt. Eher weern dat Sätze as de eerste, den man dor höörn kann: „Der Mensch ist bestrebt, Neues zu erfahren und unbekanntes zu erforschen. Die Weite des Ozeans steht sinnbildlich für die menschlichen Sehnsüchte . . .“ Datt de Beiden een Barg Erfohren hebbt, bewiest denn dat, wat dor as plattdüütsche Översetten bi rutsuert is: „De Minsch is neeschierig. He jankt dorna, dat uttoforschen, wat he nich kennen deit. Jüst de wiede See lett em keen Roh un weckt sien Lengen.“ Wunnerbor eenfach un kloor kümmt een dor miteens de vigelliensche hochdüütsche Text vör. Dat is denn jo ook de Kunst vun Hartmut Cyriacks un Peter Nissen: Se översett den Text nich eenfach, se kleed em in niege plattdüütsche Wöör. Dorbi versöökt se, sik möglichst dicht an den Originoltext to holen, verkloort Peter Nissen. Un üm so’n Originoltext to verstahn, is dat eben ook nödig, sik den ganzen Schiet ook mol antokieken. „De Utstellung is gewaltig. Dat hebbt wi vörher gor nich wüsst!“ smuustergrient Peter Nissen. „Wi hebbt uns natürli över de Opgaav freut, denn dat is jo mol wat ganz anners.“ Un wieldatt de Beiden dat nu ook akuraat afleevern wullen, sünd se achterran noch mol in’t Museum west: „Eenmol wullen wi weeten, ob de Richtungen bi’t Lopen ok alle stimmt . . . un to’n tweeten geev dat so’n poor Saaken, de wi uns eenfach nich vörstellen kunnen“, amüseert sik Platt-Experte Peter Nissen. „So to’n Bispill, datt Oost un West op de Kompassroos vun den Kronen-Kreiselkompass vertuuscht sünd – datt een de vun ünnen op den Rüch in de Koje aflesen kann. Dat weer uns överhaupt nich kloor.“ Aver in’t Maritime Museum kann man ook noch een Barg anner Saken wies warrn , wo man wiss wunnerwarken kann. To’n Bispill op Deck acht: „Ganz vöörn hier op’t Deck is uns Schatzkamer. Dor köönt ji ju freuen över Schippsmodelle ut Elfenbeen, Bernsteen, Sülver un Gold. Un ook de berühmten Knakenscheep köönt ji dor bekieken“, dat vertellt di dien plattdüütschen Wechwieser. Also, in de dore Schatzkamer, dor steiht dat wertvullste Stück ut de ganze Utstellen: Dat Schipp „Santa Maria“. Dat is dat gröttste massive Goldmodell op de heele Welt. Dat swoorste un gröttste Utstellungsstück is bi uns in Kiel op de HDW-Warft buut wurrn: Dat Mini U-Boot „Seehund“ ut’n tweeten Weltkrieg. Un denn hebbt se jo dor noch een groot Stück ut uns Lanneshauptstadt. Glieks vöörn blangen dat Museum, sotoseggen as Lüchtfüer för de Kieler Besööker: De Spitz vun dat Molenfüer ut Holtenau. Un wenn man later op Deck söven ankaamen is, denn kaamt di de Kieler glieks wedder in de Mööt: „De Klimawannel dröppt de Ozeane för dull. Dorüm hebbt sik mehr as hunnertveertig Wetenschoplers in’t Kieler Forschungsnettwark „Ozean vun de Tokunft“ tohoop daan. Se wüllt rutfinnen, wat sik in de Ozeane deit un ännert . . .“ vertellt di de Audioguide. „De See is jümmers noch vull Wunner un Geheemnisse . . .“ Dat warrd een kloor, wenn man in düsse maritime Sammeln afdüükern deit. Dor slummert noch so veel op de verscheeden Decks, wat noch unbedingt ankeeken warrn mutt . . . op Platt natürli

Op Plattdüütsch dörch't Maritime Museum Hamborg - Bi de nächste Staschoon backbord!