De beiden hebbt bald Sülverhochtiet – sotoseggen – denn vör 25 Johr sünd se sik to’n eersten Mol bi’t Ohnsorg-Theoter över’n Weg loopen. Hartmut Cyriacks un Peter Nissen. Datt se mol tosamen mit Plattdüütsch un mit Wöör ehr Geld verdeenen würrn, dat weer se domols nich mol in‘ Droom infullen. As denn aver Ohnsorg-Intendant Thomas Bayer de beiden vör de Döör sett hett, dor weer dat sowiet: De beiden grünndt 1994 de „Textmanufaktur“. „Ji hebbt wat, wat anner Lüüd nich hebbt“, hett mol een to se seggt. „Wi hebbt een grootet Kapital“, sineert Peter Nissen, „Wi arbeit tosamen un wi sünd Spezialisten för dialogisches Schrieven. Un wi künnt Lüüd tohöörn. Dat liert man an’t Ohnsorg-Theoter.“ Nu sitt se mit twee Mann in Hamborg-Ottensen in’n Een-Ruum-Büro un sweet as dull – nich blots, wieldatt de Sünn so op dat Flachdack knallt, sünnern ook, wieldatt se soveel Arbeit an de Hacken hebbt. Nu hebbt se för all ehr Doon üm de plattdüütsche Spraak den Quickborn-Pries kreegen.
