Menü
Kieler Nachrichten | Ihre Zeitung aus Kiel
Anmelden
Schleswig-Holstein Dat is'n Klacks för'n Hamborger Jung
Nachrichten Schleswig-Holstein Dat is'n Klacks för'n Hamborger Jung
Partner im Redaktionsnetzwerk Deutschland
12:00 01.07.2019
De Bronzefgur "Jung mit'n Tüdelband" hangt an dat Wahnhuus vun de Bröder Wolf in Hamborg. Quelle: dpa
Anzeige

De Hamborger Künstler Siegried Assmann hett den lütt Hamborger Jung, de so berühmt is, dat Leven schenkt. Natürli hett de Buttjer en driest Grientje in’t Gesicht, den typischen  Matrosenantooch an, de Matrosenmüütz op’n Kopp, dat Kääsbrood in’e een Hand un den Stock in’e anner Hand. Meist süht dat so ut, as wenn he dat Tüdelband glieks to’n Trudeln bringen deit. Hier in’t Huus Hütten 86 hett he leevt: Ludwig Wolf.  De echte Hamborger Jung, de tosamen mit sien beiden Bröder Leopold un James as „Wolf-Trio“ bekannt as so’n bunten Hund weer. De Gassenhauer vun den „Jung mit’n Tüdelband“ kennt jedeen – man de Geschicht dor achter, de Geschicht vun’e jüdische Familie Wolf alias Isaac – de kennt de Wenigsten.

Erika Upnmoor is en vun de Lüüd, de se nipp un nau kennen deit. Se is 86 un wahnt siet 81 Johr in düt Huus. Sotoseggen Döör an Döör mit den jüdischen Sänger un Komponisten Ludwig Wolf (domols noch Isaac). Jichtenswann hett se ehrn Vermieter Jens Friemuth mol vun’e berühmten Gebrüder Wolf vertellt: „Sie sagte mir,  es wäre doch so schön, wenn wir an diesem Haus mal eine Gedenktafel anbringen könnten“, verklaart Jens Friemuth.“ Dat hebbt se denn ok maakt. Dat dore blaue Emailleschild is to en Touristenattraktion wurrn. „Eines Tages stand mal eine Schulklasse hier vor diesem Haus“, vertellt de Huusbesitter bi en lütt Fierstünn, „und die haben den plattdeutschen Text ins Hochdeutsche übersetzt und sich hingestellt und das Lied vom Tüdelband gesungen. Das war bei mir der Funke.“  Un nu hangt he dor: De Jung mit dat Tüdelband.

Anzeige

1895 fangt all’ns mit dree Slachtersöhns an: Ludwig, Leopold un James Isaac (mit Künstlernaam Wolf). Ludwig wull to geern Opernsänger warrn -  man dat nödige Geld för de Utbillen fehlte de Familie. Singen will he liekers. Also beschnackt he sien Bröder, doch mit em op’n Rummelplatz to singen. Dat Wolf-Trio warrd bekannt as so’n bunten Hund. 1906 höört James op un ut dat Trio warrd dat Duo de „Gebrüder Wolf“. Mit ehre plattdüütschen Gassenhauer „Snuten un Poten“, „Mariechen, du süßes Viehchen“ un „Dat Paddelboot“ kriegt se de Hamborger faat. Dat Leed vun den „echten Hamborger Jung“ is sogor to‘n Hymne wurrn. Üm un bi sösshunnert Leeder hebbt de Wolf-Bröder in ehr Repertoire binn.

 Se sölben nöömt sik „Gesangshumoristen“. Denn ehre Optritte weern wat heel Besünneres: Se hebbt sik nämli verkleedt. Ut Ludwig un Leopold würrn „Tetje un Fietje“. Se smiet sik in‘e Kleedaasch vun’e Hamborger Habenarbeiter rin un denn güng dat Schunkeln los. Dat weer 1911. Dormit sünd de Bröder  in alle Theoter in Hamborg op de Bühn west: In’e Volksoper jüst so as in’e Schilleroper oder in’t Niege Operetten-Theoter. Man de Gebrüder Wolf sünd nich blots in Hamborg Stars. Se tingelten na Erfurt, Dresden, Kopenhagen un Oslo, na Holland, Österreich-Ungarn un de Swiez. In’t Hamburger Fremdenblatt stünn 1911, datt de Revue „dem Publikum einen durch flüssige, einschmeichelnde Musik wirksam unterstützten Hamburger Bilderbogen bietet, in dem sich eine hochkomische, dem Leben abgelauschte Szene an die andere schließt.“

De Bröder hebbt ehr Publikum mit Dööntjes un Gassenhauer mitreten. Mit ehr Kleedaasch, ehr enfache Texte un vör allen Dingen mit ehr Modderspraak  Platt. Man so schön blifft ehr Welt nich. 1926 starvt Leopold. Sien Söhn James springt in.  Un denn kaamt de Nazis an’e Macht. De Bröder kriegt „Berufsverbot“. De Musikanten dörft dat Leed „Snuten un Poten“ nich mehr bringen. „Das ist zu deutsch für ein jüdisches Gesangsduo.“ Ehre berühmten Gassenhauer warrd vun‘e Nazis to „Deutsches Volksgut“ deklareert. Se verleert all’ns. 1938 kümmt James in’t KZ-Sachsenhausen. Sien Modder sett sik för em in un kriggt em rut. He un sien Broder Donat flücht na Shanghai. James Fru un sien jüngste Dochter kriegt noch en Visum – Donats Fru un Söhn warrd 1941 na Riga deporteert un ümbröcht. Ludwig Wolf överleevt dat NS-Regime blots vunwegen sien arische Fru.

Söben Verwandte starvt in Konzentraschoonsloger un de Wolfs, de noch flüchten künnt, warrd in alle Windrichten verstreut. En dorvun is Lotti Höbejögi, geborene Wolf. De fidele Fru mit de plietschen Ogen is de Dochter vun Ludwig Wolf un de Speelkamerodin  vun Erika Upnmoor. Se is mit ehr 90 Johr extra ut Sweden anreist, üm bi de Fierstünn dorbi to ween. De lütte Tüdelband-Jung dor an dat smucke Huus Hütten Nr. 86 in Hamborg, de schall nu jümmers an ehrn Vadder Ludwig un sien Bröder James un Leopold erinnern. Ehr Motto weer: „Man blos nich bang siehn! Wie blievt doch poppenlustig!“

Ulf Billmayer-Christen 30.06.2019