Menü
Kieler Nachrichten | Ihre Zeitung aus Kiel
Anmelden
Dr. K. maakt Corona platt
Nachrichten Schleswig-Holstein

Cororna: Mit düsse Videos warrd all'ns kloor

Partner im Redaktionsnetzwerk Deutschland
12:00 21.08.2020
Dr. Henning Kothe verklaart de Freetzellen op Platt. Quelle: Privat
Anzeige

Dat weer de 25. März un Corona weer dor so richtig böös in’e Gang. Dor hett de Plattschnacker all predigt, blots en Maske optosetten: „Wenn du blots en Schal hest, wenn du en Dook hest oder wenn du en Staubsaugerbüddel dorvör maken deist - is mi schietegool. Blots, datt keen Drüppen dor dörch de Gegend flegen doot. Dat is dat Entscheidende.“ Tja, dor weer de plietsche Mann de Politiker un de Medizinwelt wull wiet vörut. Un nich blots dat: He weer de eerste, de Corona-Infos ok in sien Modderspraak rutgeven hett. So, as dat de Europaraat nu fordern deit. Tein Corona-Videos sünd dorbi rutsuert –enfach to verstahn un profeschonell verkloort vun den Dokter, de Corona all achter sik hett.  

„Ik weer glieks en vun’e Eersten. As de Jungs un Deerns ut Ischgl trüchkemen. Dor weer dat. Ik maak jo ganz veel Sonografie un so’n langen Arm heff ik nich, datt dat reckt.“ Also is he man blots en halven Meter wiet af vun‘e Patienten. „Tja, denn harr ik dat so’n Week lang un denn weer dat wedder goot“, vertellt de Plattschnacker, de as „Dr.K.“ in’t Nett bekannt is as so’n bunten Hund. Man kann wull seggen: De hochdüütsche Welt höört op Dr. Christian Drosten vun‘e Charité in Berlin, de plattdüütsche Welt op Dokter Henning Kothe ut Hamborg. In‘ poor Minuten bringt he op’n Punkt, wat uns Angst un Bang maken deit. Un mit düsse Angst is ok all’ns anfungen. Sien Tumor-Patienten wüssen miteens nich mehr, wodennig dat wiedergahn schull in Corona-Tieden. Wat mööt se doon? Wodennig künnt se sik schulen? Bruukt se Masken? Dörft se Lüüd drapen? „Denn kemen jümmers mehr Fragen.  As de Lockdown dor weer, hebbt mehr un mehr Lüüd seggt: Ik verstah dat gor nich, wat heet dat. Un denn keem: Drosten hett seggt . . . wat meent de dormit?“ Eerst hett Henning Kothe sien Paptienten en Antwurt schreven, aver: „Ik kann nich goot schrieven. Ik kann sabbeln, aver överhaupt nich schrieven. Ik kann to jedeen Fraag wat seggen un verstah ok, wat Drosten seggt un dor heff ik dacht: Ik översett dat mol.  Un maak dor mol so lüttje Saken op Platt vun.  Enfach so, mit’n Handy dorop. Zack“, smüüstert he.

Anzeige

Denn Plattdüütsch schnacken, dat kann he op Best. Medizin is sien Rebeet un so’n beten schauspeleern, dat licht em eben ok. Blangenbi is he jo ok noch Komediemann, Tenor un Komponist: „Jo, dat is en beten veel mankmol. Op’e en Siet bün ik Dokter. Maandags, Dingsdag un Middeweken. Un denn maak ik de anner halve Week Musik. Un Platt, dat hett de Jung ut Sleswig-Holsteen op’n Hoff bi siene Grootöllern mitkregen. Ok mit siene Patienten schnackt de Dokter natürli Platt: „De freut sik. Un denn geiht in se ehr Gesicht `n Sünn op. Dat hett veel mehr Geföhl.“ Un dorüm verkloort Henning Kothe nu ok all’ns, wat mit Corona to doon hett op Plattdüütsch: Wat dat mit de Drüppens un de Masken op sik hett, he vertellt, wodennig en sik ansteken kann, du lehrst wat över Freetzellen, över Immunität un wat dat Robert-Koch-Institut maken deit.  

Tein lütte Videos hett de Plattschnacker all in’t Nett stellt: „Ik will, datt de Lüüd dat verstaht. Ik will nich wiesen, datt ik en Typ bün, de mehr kann, de mehr weten deit. Du hest nix dorvun, wenn du diene Patienten seggst: Oh, dat is en Trallala Mutation. Vunwegen Hochdüütsch is de Spraak vun’e Wetenschaft. Ik will, datt de Lüüd dor rutgaht un seggt: Ah, nu heff ik dat verstahn. Nu weet ik Bescheed, nu weet ik, wat Drosten meent, wenn he seggt: Immunität. Un dorüm nehm ik denn so ganz normole Dinge ut’n Alldag. As wenn ik dat en Kind kloormaak.“

De Lüüd sünd jedenfalls Füer un Flamm för de Platt-Videos vun Dr. K.: „Un so will ik dat nu ok wiedermaken, wenn dat wedder mehr warrd mit Corona un wenn de Sorgen wedder grötter warrd“, sineert de Dokter. He freut sik all över Post vun’e Lüüd: „Goot weer, wenn de mi seggt, wat ik vertellen schall. Oder wenn jichtenseen en Fraag hett, de schall enfach op mien Kuntaktsiet gahn un schall mi schrieven. Op Hoch oder Platt, dat is mi egool. Denn weet ik, wo de Lüüd so sünd un wat jüst so ehre Probleme sünd.“ Blifft blots noch eens – un dormit hollt all sien Videos op: „In düssen Sinn: Hollt ju stief un blievt in’t Huus.“

www.henning-kothe.de, www.youtube.com/user/henningkothe

www.youtube.com/user/henningkothe

Christian Hiersemenzel 21.08.2020
Heike Stüben 20.08.2020
Maskenpflicht an Schulen - Prien nach Kehrtwende unter Druck
Christian Hiersemenzel 20.08.2020