Menü
Kieler Nachrichten | Ihre Zeitung aus Kiel
Anmelden
Glückskekse mit Platt-Botschaft
Nachrichten Schleswig-Holstein

Düsse Glückskekse smeckt na Niejohrskoken

Partner im Redaktionsnetzwerk Deutschland
12:00 21.10.2020
Von Heike Thode-Scheel
Lecker, lecker: De Plattkekse mit niejohrskoken-Smack smeckt aver ok to goot. Quelle: th
Anzeige

Glück un Corona. Passt dat tosamen? Bi düsse Geschicht ut Ostfreesland op jeden Fall. Denn wenn Corona nich west weer, denn harr Vera Buschmann nienich so veel Tiet hatt. Un denn weer wull nix wurrn ut ehre Idee mit de sonöömten „Plattkekse“. Dat sünd nämli Glückskekse, de na Oostfreesland smecken doot. Worüm dat so is, dat kümmt glieks noch. Un in düsse leckeren Kekse na Oma Annas Geheemrezept, dor is en lütt Zeddel versteken. Jüst so as bi de chinesischen Glückskekse. Man in de ostfreeschen Kekse, dor sünd plattdüütsche Schnacks vun Opa Hans binn. „En bietje Stück Heimat“, seggt Erfinnerin un Plattschnackerin Vera Buschmann.

Oma Anna un Opa Hans kennt dat Geheemrezept

Dat Stück Heimat kümmt super bi de Lüüd an. Middewiel gifft dat siet twee Weken sogor en lütten Loden in Leer. Dor kann man nu „plattdüütske Eenmaligheiden“ köpen. Hier „dreiht sük dat all um uns Heimaadspraak Plattdüütsk“, heet dat op Ostfreesch Platt. Plattkeks-Erfinnerin Vera Buschmann freut sik as dull: „Wi sünd hier völlig överrannt wurrn.“ Natürli weern ok Oma Anna un Opa Hans dorbi. De hebbt den Plattkeks jo sotoseggen in‘ Rullen bröcht: „Oma is tachuntachentig. De harr so’n poor Tröntjes in’t Oog“, vertellt ehr Enkelin anröhrt. Kloor, de Grootöllern sünd natürli böös stolt op Vera Buschmann  un ehrn Broder Ingo. De is nämli för de Mediengestalten tostännig.

Anzeige

So ganz enfach weer dat aver nich mit ehr Idee. Denn: Wie kümmt nu de Smack vun Ostfreesland in de Plattkekse rin? Man nimmt dat Neeijahrskoken-Rezept vun Opa Hans un Oma Anna un backt dor Glückskekse ut. Neeijahrskoken oder Rullekes sünd in Ostfreesland en groot Spezialität un hebbt en lange Tradischoon. Natürli gifft dat ok en Geheemrezept. Bestimmt is dor Karneel binn? „Nee,“, smuustert Vera Buschmann, „Zimt is dor nich binnen. Aver Anis un Kardamon. De bringen den Gesmack. De nenn‘ sik hier Rullekes un warrn normalerwies in en runnes Waffeliesen maakt. Aver wi wullen se in so‘n Form as so’n Glückskeks maken. Ik finn, dat is so’n bietje as‘n Överraschungsei för Erwachsene.“

Op de doren Plattkekse hett Vera Buschmann sogor en Patent

 Op de viegellienschen Överraschungs-Glückskekse mit Neeijahrskoken-Smack, dor hett de Plattschnackerin sogoor en Patent op. „Dat weer mi wichtig. Gifft blots dree Glückskeks-Herstellers un wi hebbt dat so regelt, dat de düsse Rezeptur ok blots för uns maken“, vertellt de Marketing-Fru. Un dat allerschönste: De Kekse smeckt jüst so, as wenn Oma Anna un Opa Hans ut Veenhusen se backen doot. Vera Buschmann is Füer un Flamm för de „dullen Bäckermeister“: „De hebben de in de Produktionsfirma ok test‘ un af un an mol so’n poor Kökjes röver stüert. De hebben so lang backt, bit de jüst so smecken deen as de vun mien Grootöllern.“

Un de seggt, dat gifft keen Ünnerscheed- „De mööt dat jo weten, de sünd de Experten.“ Bi de beiden gifft dat sogor en Teigbeauftragte – dat is Oma Anna. De sorgt för de Gewürze un för örnli Kandis. Opa Hans rullt den Deeg ut un backt de Neeijahrskoken. Un dat all siet Johr un Dag. Emmerwies för de ganze Familie. Opa Hans is ok Schuld, datt dor in de Glückskekse nu plattdüütsche Schnacks binn sünd: „He hett nämli ümmer so veele Sprökjes op Platt paraat. De is so‘n richtigen Sprücheklopper“, smuustert sien Enkeldochter. Söbentig verscheden Schnacks sünd dorbi rutsuert. Un de hebbt dat denn in de Plattkekse rinschafft. Bi de richtige Schrievwies hebbt ehr de Platt-Experten vun’e Ostfreesche Landschaft holpen. Vera kann twaars wunnerbor Platt schnacken, blots mit dat Schrieven is dat so en Saak: „Mien Familie, de praten alle Platt, ik bün sogor in so’n plattdüütschen Kinnergoorn west“, vertellt se stolt. Dormit ok de Hochdüütschen weet, wat „Man sall neet hoger stiegen, as de Boom Tacken hett“ oder „man hett eerst utliert, wenn alle Fingers gliek lang sünd“ bedüden deit, gifft dat ok noch en Översetten op de Rücksiet vun den lütten Zeddel.

De ostfreesche Deern will noch mehr Saken platt maken

So, un denn weer de Plattkeks trech. Nu fehlten jo noch so’n poor Saken, üm dat Ganze rund to maken. Un dorbi hebbt alle mitholpen. „Ik bün siet twee Johr selbststännig in‘ Bereich Marketing. Dat passt heel goot un dorüm kunn ik ok de Verpackung sülvst maken“, freut sik Vera Buschmann. De Internetsiet hett se tosamen mit ehrn Broder maakt un ok sünst löppt dat in’t Familienünnernehmen: „Mien Mann un mien Öllern hölpt jümmers, de Kekse to verpacken. Dat is all’ns Handarbeit.“ Un den is dor noch Percy, ehrn Hund. De maakt sotoseggen de Werbung: „Jedesmol wenn dor en Kunn kümmt un en Plattkeks opmaakt, denn sitt he dor un müch dor ok unbedingt en Stück vun“, smuustert de Plattkeks-Chefin un maak sik an de Arbeit.

Denn se will noch mehr „plattmachen“. „ Ik heff noch en Ostfreesches Buernhoff-Memory, dor künnt de Kinner mit Platt schnacken öven. All’ns sölben maakt.“ Un se will noch Emaille-Pins mit lüttje Wöör klüütern: „Mien Oma hett mi ümmer Muuske nannt, Mäuschen. So wat gifft dat denn un Pins mit „lüttje Wiesnöös“ oder „lüttje Bangbüx“. Un en Button „Ik praat Platt“. Wi hebben ok en Ostfreesland-Kort ut Kork, dor kann man anpinnen, wo man all west is.“ Ideen hett se nuch - aver nu eerst mol en schöön Tass Tee mit Kluntjes un dorto en vun’e leckeren Plattkekse. Dat is Glück pur in Ostfreesland! Sogor in Corona-Tieden.  www.plattgemacht.de

Zu viele neue Coronafälle - Dänemark will deutsche Touristen aussperren
Heike Stüben 21.10.2020
KN-online (Kieler Nachrichten) 21.10.2020