Menü
Kieler Nachrichten | Ihre Zeitung aus Kiel
Anmelden
"Wi maakt Corona platt"
Nachrichten Schleswig-Holstein

Vun Kreativkurse op Platt, Gottesdeenste in't Nett un plattdüütsche Narichten

Partner im Redaktionsnetzwerk Deutschland
12:00 01.01.2021
Von Heike Thode-Scheel
Rike Henties un Angelika Böhm hebbt en Kreativwarksteed op Platt in't Internet u klüütert dor Krimkraam.
Anzeige

Plattdüütsch is oldbacksch? Dor kannst in‘e moderne Welt nix mit warrn? Tja, dor büst du wull op’n Holtwech. Wat Platt all’ns kann, wiest sik jüst in de Corona-Krise. „Up düssen Padd mokt wi Corona platt!“ wohrschaut Plakate in Neddersassen. Natürli op Platt. „Mund und Näs tohängen“ schall man. Un „Luft in’t Hus laten“. Överall hangt Mund- un Neesmasken mit dat Woort „Snutenpulli“ op. Oder de plattdüütschen Narichten, de sik mit ümmer niege Fachbegriffe rümslagen mööt. Uns lütte Regionalspraak geiht also mit de Tiet. Dat kann en an veele Bispeele sehn. Hier kaamt en poor, de wiest, woans wi Plattdüütschen Corona platt maken doot. 

Corona-Norichten

Veele niege Wöör hett dat Institut för Nedderdüütsche Spraak in Bremen (INS) paraat. Vör allen Dingen för de Plattdüütschen Narichten, de op NDR 1 in Hamborg un bi Radio Bremen loopt. Dor mutt all’ns sien Richtigkeit un Ernst hebben un dor hett de vermaledeite „Snutenpulli“ keen Tohuus. Ut de Pandemie warrd en „weltwiede Süük“. Bi de Plattdüütschen is de Lockdown „all’ns op Null“ un de Mund- und Nasenschutz en „Dook vör Mund un Nees“. Wokeen in’t homeoffice arbeiten deit, de hett dat „Kontor tohuus“ un en Hotspot is dor, „woneem Corona böös veel Wums hett“. : www.ins-bremen.de

Anzeige

De „schönste Neuschöpfung“

Un wo wi graad bi de plattdüütschen Begriffe sünd: Jedeen Johr löövt dat Fritz-Reuter-Literaturmuseum de „schönste plattdeutsche Neuschöpfung des Jahres“ ut. Tja, un passend to Corona is dat düt Johr natürli „Snutenpulli“.

Kreativ-Warksteed

Kreativ sünd ok Rike Henties un Angelika Böhm. De hebbt tosamen en plattdüütsche Kreativ-Warksteed opmaakt. Un twaars in‘t Internet: „Sülvst maken is Trend un Platt schnacken ok“, meent de Plattdüütsch-Koordinatorin för’n Landkreis Harborg. „Un wat kunn en in düsse Tiet beter maken as Seep?“, fraagt se to Recht.  Schritt för Schritt verklaart de Beiden op Hoch un Platt, wie Sepenstücke maakt warrd. Oder Mund- un Neesmasken oder Makramee-Feddern oder en Feddertasch. Blangenbi gifft dat en Wöörlist to’n Verklaarn.  De Toschauer kann also nich blots mitklütern, sünnern bi’t Basteln ok noch Platt liern. www.lueneburgischer-landschaftsverband.de/niederdeutsch/kreativwarksteed-op-platt.html, plattfinndtstatt.de/blog

Maske sniedern

Natürli dörft in düsse Corona-Tieden ok de sonöömte „Behelfsmaske“ nich fehlen. De „Niedersächsische Lotto-Sport-Stiftung“ hett en Anleiten to’n Neihen schreven un mit Biller utstaffeert. Aver dat Beste: Se hebbt dat in tein Spraken översett – ok op Platt. Dat kann en sik nu rünnerloden. www.lueneburgischer-landschaftsverband.de/niederdeutsch/kreativwarksteed-op-platt.html

Corona op Platt verklaart

Böös kreativ is ok de Lungendokter, Tenor un Plattschnacker Henning Kothe. In tein lütte Videos verklaart he op Platt, wat dat mit Corona op sik hett. He weer de eerste, de Corona-Infos ok in sien Modderspraak rutgeven hett. De lütten Videos sünd enfach to verstahn un profeschonell verkloort: „Ik will, datt de Lüüd dor rutgaht un seggt: Ah, nu heff ik dat verstahn. Nu weet ik Bescheed, nu weet ik to’n Bispeel, wat Drosten meent, wenn he seggt: Immunität.“ www.henning-kothe.de

Ok de Künstler maakt mit

Wieldatt ok de Künstler nu keen Bühne mehr hebbt un keen Publikum, sünd veele mit ehr Programm in’t Nett ümtrocken. Op de Internetsiet vun streammax.de kannst du Kunzerte un Lesungen op Platt ankieken un anhöörn – un twaars ganz kommodig vun’t Sofa ut. Mit dorbi is de Hittfelder Speeldeel mit Comedy, Musik un Gesang. De No-Shanty-Partyband „Veermaster“ bringt dien Kopp to’n Wackeln un de söss Musikanten vun‘e Platt-Rock-Band „Wattenläufer“ sorgt för richtig Stimmung.  www.streammax.de. Ok op de Video-Plattform youtube postet Musikanten un Schrieverslüüd Leder, Vertellen, Riemels, Dööntjes un Belevnisse, de jeedeen bi sik tohuus opnohmen hett. Dorüm heet dat ok: “Platt vun tohuus”. www.youtube.de

„So bunt as dat Leven“

„So bunt as dat Leven“ – dat is dat Motto vun’e Speeltiet 2020/2021 in’t Ohnsorg-Theater in Hamborg: „Ohnsorg wird für ein Jahr zu einer Art Theaterlabor“, hett Intendant Michael Lang in‘ Sommer seggt. Lütte Stücke mit twee bit fief Schauspeler, jümmers op Avstand. Ok de Nedderdüütschen Bühnen bi uns in’t Land gaht niege Wege. De Preetzer hebbt ut ehr Wiehnachtsmärken enfach en Videoversion klütert. Ünner www.wm-film.nbpreetz.de kann man sik dat denn tohuus mit Pletten un Punsch kommodig maken. De Kieler hebbt en lütt Stück mit den övergroten Riesen ut‘ Märken „Das tapfere Schneiderlein“ opnohmen un online stellt: „Für unseren Märchenspot haben wir alles eingesetzt, was schon an Bühnenbild und Kostümen angefertigt war. Es ist natürlich nur improvisiert, aber war zu schön, um es im Lager zu verstauen“, meent de Schauspelers. www.ohnsorg.de, www.wm-film.nbpreetz.de, www.niederdeutschebuehne-kiel.de

De Plattdüütschen Zentren

Improviseern mööt ok de Platt-Zentren in’t Land: „Wi künnt ok anners – Platt ut Holsteen“ heet de niege Idee vun’t Zentrum in Holsteen. „In lockere Folg warrd wi plattdüütsch Institutschonen, enkelte Akteure, Speeldelen un anners mehr vörstellen“, vertellt Thorsten Börnsen. Wiest warrd de lütt Interviews op de Websteed un bi Facebook. Un denn gifft dat noch den „Plattfunk“. En Podcast op Hoch un Platt to ganz verscheden Themen. To sehn un to höörn op youtube un spotify. Dat sünd de niegen Medien, de nu dat plattdüütsche Leven in unse Stuven bringen schüllt. Gesa Retzlaff vun’t Platt-Zentrum Landesdeel Sleswig hett sik en Billerbook-Kino för Kinner utklamüüstert. De Lütten künnt sik Böker vun Heidrun Schlieker in’t Video ankieken. Gesa Retzlaff leest de Geschichten vör un blädert denn Siet för Siet wieder. www.plattdeutsches-zentrum.de, www.niederdeutschzentrum.de

Gottesdeenste

Graad in’e Corona-Tiet sünd veele  Minschen alleen. De Vereen „Plattdüütsch in de Kark“ sorgt sik üm all de Lüüd, de nu nich mehr to Kark gahn künnt: „Ok in disse Tied kannst du mit Gott snacken - alleen oder mit annern. De Gottesdeenst geiht wieder - as Spazeergang, as Gebed vör´t Inslapen, as Kort, de een in Breefkasten findt“, schrievt se op ehr Internetsiet. Dor gifft dat veele Ideen. Besünners schön is de „Spazeergang mit Gott”. www.kirche-mv.de/Plattdeutsch, www.plattduetsch-in-de-kark.de

„Klei mi an’ Mors, Corona

So, un nu to’n Sluss: „Klei mi an’ Mors, Corona“. Also, dat is nich op mien Mist wussen. Matthias Mühring un Michel Cramer hebbt dat engelsche Leed „Gimmie hope Joanna“ op Platt ümdicht un singt dat nu live bi youtube. För de beiden steiht nipp un nau fast: „Wenn du wech büst, jau, denn fiert wi dörch!“ www.youtube.de