Menü
Kieler Nachrichten | Ihre Zeitung aus Kiel
Anmelden
Plattdüütsch is bunt: Eat.Platt.Love
Nachrichten Schleswig-Holstein

Op't Sofa sitten un Platt liern

Partner im Redaktionsnetzwerk Deutschland
12:00 01.02.2021
Von Heike Thode-Scheel
Kommodig op't Sofa Platt liern mit Lisas Internetsiet Eat.Platt.Love.
Kommodig op't Sofa Platt liern mit Lisas Internetsiet Eat.Platt.Love. Quelle: th
Anzeige

Lisa Wrogemann steiht in‘ hogen Snee un freut sik. Se is dick inmummelt in en blaue Jack mit‘n groot Fellkapuutz gegen den Wind. Denn smitt se sik in‘ Snee rin un tövert en Snee-Engel. „Es ist traumhaft“, swöögt de Deern ut‘e Lümborger Heid‘, „wi hebbt so veel Snee hier, de fohrt dat LKW-wies ut’e Stadt rut.“ Sünst is dor eenfach keen Dörchkamen, verklaart se mi an’t Telefon.   Egens kümmert Lisa sik üm Bakterien – nipp un nau üm Bioplastik ut Bakterien. Dor forscht se nämli in en Labor op Island in Saken Verfahrens- un Ümwelttechnik. Un se is Füer un Flamm – nich blots för de doren Bakterien oder för Island.   Nee, ehr Hart, dat sleiht för Plattdüütsch: „Un nu seet ik hier op Island in’t Labor un dach mi so: Ik müch noch en beten mehr maken. Ik kann jo Platt schnacken.“ Dor is denn de Internett-Plattform „Eat.Platt.Love“ bi rutsuert. „Plattdeutsch mit Lisa. Einfach Plattdeutsch schnacken lernen.“

Enfach Platt schnacken liern

Vun ehr Frünndinnen wüss de Studentin nämli, datt de ok geern mol Platt mitschnacken würrn – man dat geev eenfach keen passen online-Angebot: „Irgendwann bi’n Kaffee is mi dat denn so infullen: Worüm maak ik dat denn eegentli nich?“ vertellt de Master-Studentin, de Platt opwussen is. Se wüss nix vunwegen Grammatik oder Schrievregeln: „Ik dach mi: Ik kann jo eerst mol anfangen un denn entwickelt sik dat wull.“ Un jüst so weer dat ok. Nu sitt se in ehr lütt Stuuv in’t Hostel – ensoom un alleen vunwegen Corona – un klamüüstert sik Lektionen ut: „Ik heff en lütt Konzept. De Grammatik, dor holl ik mi Schritt för Schritt an den Sass.“ Bi de Themen is dat wat eenfacher. Denn Lisa liert graad Islännisch: „Dor holl ik mi so’n beten an mien Spraak-Book. So as ik den Schritt op Islännisch maak, so mööt dat nu ok alle mit mi op Platt mitmaken“, amüseert se sik.

De platte Lisa is en Stück vun ehr

Bavento hett de Deern sik en Plaan maakt för twee Weeken in‘ Vörrut: „Mit Grammatik, Vokabeln un Schnacken op Platt. Ik poste op Instagram un ik versöök, twee Videos de Week op youtube hochtoloden.“ Dat hett se sik all’ns sölben bipuult – bit op dat Platt, aver dor kaamt wi glieks to: „Ik heff markt, dat hett so’n drive geven. Dat is mien Herzensprojekt wurrn.“ Siet Oktober arbeit se an ehr Platt-Projekt. „Un denn keem noch dat youtube-Video dorto. Ik harr överhaupt keen Ahnung vun Videos maken un torechtsnieden. Aver ik heff Lust, dat to liern – vun Video to Video un vun post to post“, vertellt de junge Deern stolt. Wat se nich mehr liern mutt, dat is de plattdüütsche Spraak: „Mien Papa schnackt blots Platt mit mi, vun Anfang an. He hett mi an‘ Meisten prägt. Wi hebbt dat jo 27 Johr öövt“, smuustert Lisa. „Irgenwie harr ik dat ümmer in mi un so‘n Stück vun mien Persönlichkeit is eben düsse platte Lisa.“ Bi ehr tohuus  geiht dat rund, wenn alle an‘ Kaffeedisch sitten doot. Mit ehr Mama un ehrn Broder schnackt se Hochdüütsch, mit Papa un ehr Oma Plattdüütsch un denn switcht se dat ümmer hin un her. De Spraak hölpt ehr ok, wenn se ünnerwegens is – op nu op Island oder op’n Jakobswech: „Dörch dat Platt heff ik ümmer düsset Geföhl vun Heimat un Familie. Egool, wo op de Eerd ik mi graad rümdrieven do, ik föhl mi denn tohuus. Wenn ik irgendwo Platt höörn do oder wenn ik mit Papa Platt schnacken do, dat is ümmer so’n warmet Geföhl, wat in een so hochkamen deit.“

Dat wunnerbore warme Geföhl

Düt wunnerbore Geföhl will se geern wiedergeven – un mit ehr online-Platt-Kurs mehr junge Lüüd dorto bringen, wedder Platt to schnacken. Un dat mit schöne lütte Platt-Happens. Verscheden Vokabeln un Schnacks op Platt, Grammatik un Geschichte, en post, wie man op Platt Glückwunsch-Korten schrieven kann oder en Quiz to’n Öven. De Lüüd liert bi ehr  över’t Wedder to schnacken, wat man bi’t Inköpen seggen mutt oder wie man na’n Wech fragen kann. Lisa hett sogoor en plattdüütsche Meditaschoon mit in’t Angebot: „Ik heff dor noch so’n beten mehr Visionen. Ik würr geern, datt man mol op Platt datet oder datt de jungen Lüüd in’e Disko Platt schnackt. Sowat Cooles.“

Ehr Follower sünd jedenfalls Füer un Flamm: „Ik krieg vun veele richtig tolles Feedback.  Letztens harr ik sogor en Schauspeler ut München dorbi, de för en Rull bi de Soko Hamborg Plattdüütsch liern wull“, freut se sik. „Richtig cool hier“, meent en op Instagram, „total klasse, dass man mit deiner Hilfe das Platt am Leben halten kann!“, schrifft en annern. Oder: „Wow, liebe Lisa, wir lieben, was du tust und kennen so gut wie keine junge Person mehr, die Platt sprechen kann. So wertvoll, was du machst. Tolle Idee . . .“ In de Lektion över dat Wedder, dor kannst ganz niedsch warrn: „Ik warr mi wedder op den Weg to dat Labor maken un de Winterwonderworld geneten“, schrifft Lisa op Instagram. Denn treckt se sik wedder ehr warme Jack an un de dicken Steveln un denn nix as rut in‘n Snee.

www.eat-platt-love.de

Anne Holbach 01.02.2021
Heike Stüben 01.02.2021