Menü
Kieler Nachrichten | Ihre Zeitung aus Kiel
Anmelden
De Tiet is riep för'n egen Radiosenner
Nachrichten Schleswig-Holstein

Radio an un denn Plattdüütsch höörnb

Partner im Redaktionsnetzwerk Deutschland
12:00 23.04.2021
Plattdüütsche Narichten höörn bi't Koken? Dat weer doch wat.
Plattdüütsche Narichten höörn bi't Koken? Dat weer doch wat. Quelle: th
Anzeige

„Anholln deit kriegen“ heet en Schnack bi de Plattdüütschen – also: „Beharrlichkeit führt zum Ziel“. So richtig beharrlich weern de Plattdüütschen, as dat üm Platt in‘e School güng: „Wir werden uns nicht mehr vertrösten lassen“, hett Hans-Otto Meier vun‘ Sleswig-Holsteenschen Heimatbund (SHHB) 2013 seggt. Op de Konferenz „Handlungsplan Bildung“ in Leck hett he „einen festen verpflichtenden Stundenanteil“ för Platt in‘e Scholen fordert. Un wat is dor nu ut wurrn? An 42 Modellscholen in’t Land steiht Platt middewiel op’n Stünnenplaan. Nedderdüütsch is sogor as „mündliches und schriftliches Prüfungsfach im Abitur“ anerkannt. Dat harr sik vör 20 Johr doch keeneen vörstellen kunnt. Nu sünd de Medien an’e Reeg. Un de Plattdüütschen fangt wedder an to Drömen. Op en Online-Konferenz mit Platt-Organisatschonen ut acht Bunnslänner fordert se en egen Radiosenner för Plattdüütsch.

„Wi nehmt uns anner Lütte-Spraken-Senners in Europa to ́n Vörbild un fordert en öffentlich-rechtlich Medium, wat 24 Stünnen an ́n Dag söven Daag de Week en plattdüütsch Höörfunk-Programm mit Online-Anbott . . . produzeert“, heet dat in’t Papeer, wat de Konferenz op’n Wech bröcht hett. Gastgever weer dat   Nedderdüütsch-Sekretariat, de Bunnesraat för Nedderdüütsch un de Sleswig-Holsteensche Heimatbund (SHHB). „Wi hebbt uns op düssen Text enigt un dat is nu sotoseggen de Fahn, ünner de wi marscheert“, vertellt Jan Graf. He is Referent bi’n Sleswig-Holsteenschen Heimatbund (SHHB).

„Wenn du di Grootbritannien ankieken deist, wo de Waliser en egen Senner hebbt, de den ganzen Dag in Wälsch senndt   oder Skandinavien, wo de Sami in Norwegen un ok in Sweden en egen öffentlich-rechtlichen Senner hebbt, denn kümmst du to de Fraag: Worüm hebbt wi dat egentli nich för de Plattdüütschen in Düütschland“, fraagt sik de Plattschnacker to Recht. Un hett in‘ Januor en lütt Film bi youtube rinstellt mit den Titel „Funklock stoppen“. Vunwegen: Överall in Europa kannst du di lütte Regionol- un Minnerheitensenner anhöörn – blots nich bi uns in Düütschland.  Dor swiggt dat Radio still. Kuum to glöven vör den Platt-Referenten: „Wi hebbt 2,5 Millionen Plattschnacker – dat is en staatsche Tall. Aver de hett nienich dorto föhrt, datt wi en egen plattdüütschen Senner hebbt.“

Op de Konferenz weern sik aver alle Delegeerten eens un dat geev ok gor keen groot Kontroversen: „Egentli weer to marken, datt de Tiet riep is för en Senner, de uns Plattdüütsche versorgen deit un de ok de Spraak mit Qualitätsanspruch bruken deit“, so Jan Graf. In anner Länner in Europa funkschoneert dat nämli wunnerbor: To’n Bispill „Radio Rumantsch“ in’e Swiez. De sennt elkeen Dag op Rätoromaansch. Oder de Senner „Omrop Fryslan“ in‘ de Nedderlannen. De schnackt blots Freesch. „Raidio na Gaeltachta“ in Irland senndt kumplett op Gäälsch.

Vun en „win-win-Situation“ schnackt ok Lars Harms. He is de Vörsitter vun‘ SSW. En goodes Bispill gifft dat in Finnland: „Hier ist es der öffentlich-rechtlichen Rundfunkanstalt Yle durch mehrsprachige Inhalte gelungen, neue Hörer und Zuschauer an sich zu binden und ihre Reichweitenstärke erheblich auszubauen.“

Dorüm is för Jan Graf kloor: „Wenn wi still blievt, passeert gor nix. Wi hebbt jo goode Argumente. Worüm schüllt wi Plattdüütschen anners behannelt warrn as dat Retoromaansche oder dat Walisische?“

De 31 Delegeerten vun’e Konferenz, de  hebbt sik jedenfalls all mol op en  Fohrploon för en Platt-Höörfunk-Programm enigt. Se fordert en Mix ut bunte Themen, ernsthaftige Berichte un plattdüüsche Narichten ut’e Welt. In’t Musikprogramm schall dat plattdüütsche, hochdüütsche un internaschonale Musiktitel geven. Dat Wichtigste is aver: „Dat Medium bruukt de plattdüütsche Spraak as dääglich Warktüüch un verplicht sik dorbi to Qualitäätsstandards, de in anner Programme för de hochdüütsche Spraak gellt“, so de Platt-Experten.

Stütt un Stöhn kriggt de Forderung na en egen Radiosenner ok dörch Artikel 11 vun de Charta vun’e Regionol- un Minnerheitensprachen. Dor steiht nämli binn, datt dat Land Spreker vun’e lütten Spraken „zur Einrichtung mindestens eines Hörfunksenders in den Regional- oder Minderheitensprachen ermutigen oder erleichtern“ schall. Un kloor is ok na § 28a vun‘ Medienstaatsverdrag Hamborg-Sleswig-Holsteen: „Dass die neu einzurichtenden Lokalradiostationen verpflichtet sind, die Regional- oder Minderheitensprachen in Sendungen und Beiträgen angemessen zu berücksichtigen.“

Dorüm steiht för Jan Graf nipp un nau fast: „Wi doot egentli nix Besünneres, nix Spektakuleeres. Wi maakt dorop opmerksam, datt de Spraak dat bruukt. De Plattdüütschen mööt anfangen, dor över to schnacken un se mööt anfangen, de europäische Perspektive intonehmen. Un se mööt ok opholln, sik sölbst lütt to maken“, wohrschaut de Plattschnacker. Anholln deit eben doch kriegen – un villicht is denn in en poor Johr ok Sluss mit dat dore Funklock op Platt.

Nora Saric 23.04.2021
Ulrich Metschies 23.04.2021