Den letzten Gang op Platt

As wi beiden uns drapen hebbt un bi em tohuus inne Köök kommodig över sien duppel un dreefach Karrieern schnackt, pingelt glieks mihrmols dat Telefon – „Lars hier, Lars dor, Lars maak doch mol“. So is dat hüüt bi em. Dorbi hett Lars Brodersen mol ganz sinnig inne Versekerungsbransche arbeit, man de Kreativität wull al fröh rut ut em un mitmischen. Sien Kenntnisse as Koopmann ut düsse Tiet sünd nu liekers wichtig, denn middewiel is he ut de seker Anstellen rut un en sülvstännigen Ünnernehmer in Saken „Wort un Speel“. He is nu sien egen Chef un organiseert all’ns üm un to.Man he hett noch mihr op‘n Kassen. Denn ok de Landwirtschopp stickt em noch in‘t Bloot. Dat hett he ok mol liernt. Is lang lang her. Dat „Entertainer-Gen“ hett em eben ni nich in Roh laten. Hier mol `n lütte Reed, dor mol `n Optritt as fidelen plattdütschen Redner, de Füerwehrkapell un düt un dat – dat leep toerst noch all‘ns fein blangenbi. Un denn – dat is goode negen Johr her - dor hebbt se em dat eerst Mol as Truerredner engageert. Een bekannten Jägersmann weer doot bleven, Lars Brodersen verstunn wat vun de Materie un he hett – un dat kann en eerst glöven, wenn en mit den Mann Oog in Oog schnacken deit - ok een heel geföhlvull sinnige Sied. „Also, as ik dormols düsse eerste Truuerred holen müss, dor güng mi doch de Düse“, verrod Lars Brodersen. „Dor weern richtig veel Lüüd komen, de Fier weer bi de Familie tohuus inne grote Deel. All‘ns Frünnen un Jägerslüüd – veele hebbt mi dat överhaupt nich totruut.“ Man nu eerst recht, dach sik de Mann un hett all‘ns an Streeven un Hartbloot in düsse Reed rinpackt, sien Know-How as Jägersmann, sien grotet Geföhl för de Minschen. He hett sik berooden laten un sik ründüm klook makt. Un dat hett sik lohnt: Denn de Truerreed för den Jägersmann, de hett de Lüüd dormols deep anröhrt un sien Karrier‘ üm een ganz besünnern Twieg grötter warrn laten. Denn een gode Truerreed is een Kunst. Siene Truerreden schrifft de Plattsnacker nu mehrstens inne Nacht: „Denn is Roh in‘t Huus. Un wenn de Familie al lang dröömen deit, denn kann ik mi op’t Best konzentreern.“De Dood, dat is all een besünners vigelliensche Saak, meent Lars Brodersen: „Ik heff al Familien hatt, dor is de junge Vadder dootbleven. Dor koomt de lütten Kinner un froogt mi: „Segg mol, Du weets doch Bescheed mit den Dood - wo is Papa nu?“ Dat sünd Situaschonen, de kann en vörher nich utprobeern oder pröven, so as he dat vun sien anner Optritte wohnt is. „Jeed Familie is anners. De Minschen sünd in een extreme Laag, du hest‘n grote Verantworten.“ Lars Brodersen vertellt liesen un suutje un sien Gesicht, de groten Oogen un sien ganzes Angesicht - also - de Mann strohlt eenfach Roh un Sekerheit ut. Datt de Minschen sik in‘ Truerfall bi em wohl föhlen doot, dat kann en forts verstahn.Meist verrückt sünd aver de Daag, wo he heel verscheden Optritte hett. An Morrn villicht `n Truerfall, denn kann ok mol en Optritt bi‘n Gebortsdag in‘ Terminkalenner stahn un denn – siet över een Johr nu mit‘n Riesenerfolg – denn sünd dor ok noch de „Brotbüdels“. Dat is een niegen plattdütschen Comedytrupp –„ Dree Mann hebbt een anne Pann“ – dat is ehr Motto. Veel Döntjes, veel Musik, veel Kuntakt mit dat Publikum. De Veranstalten op‘t Dörp sünd jedsmol fix utverköfft. Un villicht – wenn’t denn klappen deit – köönt wi Lars Brodersen in Tokunft ok noch in‘t Fernsehn beleven: As kommodigen Schandarm mit flotte Schnacks un veel Hart. Un wenn‘t nich klappen schall, kümmt wat anners Nieget. Talent un Knööf un Ideen hett düsse Mann wiss noog. www.lars-brodersen.de un www.debrotbuedels.de

Lars Brodersen is en plattdüütschen Truerredner mit veele Talente - Den letzten Gang op Platt