Düsse Schöler sünd “Op’n Droht”

Mit’n Droht in de wiede Welt. Dor kriggt een nu all’ns bipuult, wat een so dagdäägli bruuken kann: Wat een seggen kann bi’t Inköpen, woans dat op’n Buernhoff togeiht, een liert wat över Eten un Drinken un Reisen kümmt ook nich to kort. Natürli kann man sik ook alle Wöör un Snacks anhöörn, dat gifft passen Biller dorto un een kann dor sogor bi düsse Siet mithölpen. „Miene Schölers harrn veele Ideen. Un de weern flietig, de jungen Lüüd. Denn maakt ook de Ünnerricht so richtig Spaaß“, swöögt Schoolmeister Hans-Johann Thams vun de Plattsnackers ut den 13. Johrgang. Man dor kümmt noch eens dorto: „Dor hebbt wi dat richtig good hier an de Westküst. Dreeviddel vun unse Schölers künnt tominnst Platt verstahn. An uns Kant sünd noch veele Lüüd, de Platt snacken künnt.“ Un nich blots de Schölers sünd dor böös op Droht, wat Platt angeiht, ook ünner de Schoolmeister sünd veele Plattsnacker. Siet üm un bi twintig Johr gifft dat dorüm all plattdüütsche Literatur-Kurse an de Berufliche School – un ümmer is Hans-Johann Thams mit dorbi. Düt Johr hett he besünners Glück mit siene Klass: De eene Hälfte vun miene Klass kann Platt, de annern nich.“ Dat heet: De, de Platt künnt, warrd nu de Platt-Paten vun de annern. Un de kriegt een besünnere Opgaav vun ehrn Schoolmeister: „De mööt nu ümmer Platt snacken mit de annern. Denn Snacken is dat Wichtigste. Dat geiht ook op’n Schoolhoff op’t Best.“ Blangenbi gifft dato ok noch een Platt-Crash-Kurs över söss Weeken. Un denn sünd se mit de Arbeit anfungen. Kloor weer: „Wi mööt wat eegen maaken.“ Denn gifft dat ook keen Mallöör vunwegen de Rechte. „De Dialoge vun hebbt de Schölers sölben entwickelt – dat Problem weer de Rechtschrieven. Man snackt ja ümmerto, aver man schrifft nich“, vertellt Hans-Johann Thams. „De Korrektur weer een Drama“, meent he mit een Smuustergrienen. Denn optletzt hebbt se dato ok in‘ Griff kreegen: „Dat weer ganz lustig. Wi hebbt veel diskuteert un hebbt uns denn an Sass un an Mensing orienteert. Dat is total good. Dor liert de Schölers ook glieks verscheeden Quellen kennen.“ Liekers weer de ganze Kraam nich dröög, denn: „Wenn de wat över Pannkoken schreeven hebbt, denn hebbt se de ook vörher sölben utprobeert. De Rezepte sünd alle praxiserprobt“, verseekert de Schoolmeister. Jüst so güng dat ook bi de plattdüütschen Wöör – allns hebbt se pröövt: „Dor is tohuus üm snackt wurrn. Un denn keem ook mol een an un hett seggt: Dat hett mien Opa aver so seggt un de hett dat ook noch mol nakeeken.“ Datt dörch düt Projekt de verscheeden Generaschoonen miteenanner över de plattdüütsche Spraak snacken doot, dorop is Hans-Johann Thams besünners stolt. Wenn de Texte trech werrn, hebbt se sik hinsett un de Dialoge opnohmen. Dat is bi se an de School ganz eenfach. Denn se hebbt glieks een poor Computerrüüme. Een dorvun hebbt sik de Plattsnacker glieks ünner’n Nogel reeten. Sowat geiht aver natürli blots, wenn ook de Schoolleitung mitspeelen deit. Un de weern Füür un Flamm un hebbt se ümmer ünner de Arms greepen – löövt de Schoolmeister siene Chefs. Un nu kümmt de Technik in’t Speel – dorför weer Thams Kolleeg Wolfgang Biegemann tostännig. De hett den Steen vör een Johr sogor eerst in’t Rullen bröcht – vunwegen: „Wüllt wi nich mol een Platt-Online-Kurs maaken.“ Em fehlte blots noch de plattdüütsche Schoolmeister. Ingwer Oldsen vun’t Plattdüütsche Zentrum in Leck hett em den Tipp geeven mit Hans-Johann Thams. Datt beide Kollegen an de sülvige School sünd, hebbt se gor nich ahnt. Bi tweehunnert Kollegen keen Wunner. Wolfgang Biegemann hett sik also üm den ganzen Internett-Kraam kümmert un dorüm, datt dor nu örnli wat op de Huussiet steiht – un datt dat noch dorto vernünfti utsehen deit. Mit Biller, mit Texte un mit Audios. Mit een Forum un mit de Möglichkeit för anner Lüüd, an de Siet mittoschoostern. Een Viddeljohr Arbeit steekt dor nu binn in den doren Spraak-Kurs – veel Arbeit, aver ook veel Spaaß. Se weern böös flietig, de jungen Lüüd ut de dörteinste Klass. Un eens mutt man seggen: Se sünd böös op Droht, wat Plattdüütsch angeiht! http://plattdeutsch.bs-husum.de/

Spraakkurs för’t Internett - Düsse Schöler sünd “Op’n Droht”