Wenn du Paraskavedekatriaphobie hest, denn würr ik di raaden: Laat de Finger vun düsse Plattdüütschsiet! Aver villicht is dat jo ook all to laat – un du hest graad all dien Koffi ümstött oder du büst in de Baadwann utrutscht. Oder noch slimmer: Op’n Wech to dien Arbeit is di een swatten Kater vun links na rechts över’n Wech loopen . . . Mag aver ook ween, datt du hüüt morrn gor nich eerst opstahn büst, wieldatt du ebendüsse gräsige Krankheit hest, de Paraskavedekatriaphobie heet (denn büst du krankhaft bang för Fridag, den dörteinsten). Un wieldatt du all lang ahnt hest, datt hüüt bestimmt een slimmes Unglück passert – is jo Fridag, de Dörteinste. Un dor kann doch allns blots scheef gahn! Dat meent jedenfalls jedeen Veerte vun uns – un seggt furts wichtige Termine af oder truut sik eerst gor nich ut‘ Huus rut.
