He heet Friesische Palme, Blätterkohl oder Federkohl, Bruunkohl, Strunkkohl, Kruuskohl oder Gröönkohl. He höört to de Kreuzblütengewächse – so as uns Kohlrabi oder Radieschen ook. He hett 4000 Verwandte un is all 400 vör Christi dat eerste Mol as „krausblättriger Blattkohl“ in Greekenland opdüükert. De klooke Hippokrates (de bekannteste Dokters in‘t Altertum) hett em as Heilmiddel gegen Hosten un Heiserkeit insett. Bi de Römer weer Gröönkohl gor een Delikatesse un wokeen een Barg dorvun harr, de gell as rieken Mann. Bi uns in‘ Norden is de kruuse Kohl siet Johrhunnerte swoore Huusmannskost un böös fett – aver in New York un Hollywood, dor is de Gröönkohl de niege Kaviar.
