„Ferientiet“, „Wat de Buur nicht kennt“, „Glück hatt“, „Kinner“, „Hartpuckern“ un nu düsse Daag „Öllern“. Dat sünd allns Themen ut den NDR-Schrievwettbewarf „Vertell doch mal“. Un dat is man blot‘s een knappe Utwohl. Middewiel löppt „Vertell“ al in‘t veeruntwintigste Joar bi‘n NDR. Un jeeds Joar sett sik de Minschen wedder hen, wöhlt in ehrn Bregen, buddelt sik deepdinkern jichenswohen un töövt op den besünnern Infall för ehr plattdüütsch Geschicht. Över de Joarn sünd dor üm un bi 36.000 Vertelln bi rutkomen. 36.000! Kannst di dat vörstelln? Wenn de al op eenmol anfangt un flustert ehre Geschichten inne Welt – wat‘n Suusen un Bruusen un dat allns op Platt. Aver wo blievt se eegentli, all düsse schönen Geschichten, de sik Froons- un Mannslüüd utdacht hebbt un mit de Hand, mit de Schrievmaschin oder hüüttodaags mit den Computer opschreeven hebbt? De fleegt doch wull nich in‘ Papeerkorb?
