„Wo geiht jem dat vundoog? Good? Dat warrd wiss beter, dat mutt sien Tiet hebben. Se mööt dat sacht angahn loten. Un denn künnt se wedder Bööm utrieten“. So höört sik dat an, wenn de Dokters, de Krankenschwestern un de Pleegers in de Asklepios-Kliniken in Wandsbek oder Harborg mit ehre Patienten Platt snacken doot. Siet Januor löppt dor all dat Pilotprojekt „Wi snackt ok Platt“. Dat gifft dor middewiel nich blots Platt-Kurse för de Mitarbeiter, dat gifft ook een plattdüütsche Bökerie in de Klinik un Medizin-Vördräge op Platt. Nu hebbt se sogoor noch een lüttes Plattdüütsch-Wöörbook rutbröcht.
