Dr. Katja Lembke hett dat Plattdüütsche noch in’t Ohr. Denn düsse Spraak hebbt ehre Öllern un Grootöllern in Niemünster miteenanner snackt – dor, wo se groot wurrn is. Un offschoonst se as Archäologin un Ägyptologin wiet in de Welt rümkaamen is un ook noch engelsch, franzöösch, italiensch un arabisch snacken kann, bedüüt Plattdüütsch för ehr sowat as Tohuus. Siet över een Johr is se de Direktorin vun dat Lannesmuseum in Hannover un dormit Chefin vun de wull bedüüdenste Gemäldesammeln in ganz Europa. Nu hett sik Katja Lembke wat ganz Besünneres utklamüüstert, üm de plattdüütsche Spraak mit de Kunst tosamen to bringen: Se hett tohoop mit den Norddüütschen Rundfunk, mit dat Institut för Nedderdüütsche Spraak in Bremen (INS) un mit dat Ministerium för Weetenschap un Kultur den wull eersten plattdüütschen Audioguide för ehr Museum op de Been stellt.
