Se is twaars nich „bi de plattdüütschen Melkbuddeln groot wurrn“, aver ehr „Hart“ sleiht för de plattdüütsche Spraak. Se is een Deern vun de „Waterkant“ – so üm un bi, denn se kümmt ut Swerin. Un se „hett nich blots Plie“, sünnern ook „bannig wat op’n Kassen“ bavento. Af un an kaamt ehr „Grappen in‘ Kopp“ un denn truut se sik an böös „vigeliensche Saken“ ran. Un dat is förwiss keen „Tüdelkraam“, wat dor denn bi rutsuern deit, bi de Teeknerin Anne Baier. Ehr Book „Illustriertes Glossar der plattdeutschen Sprache“ is nu graad frisch bi‘n Wachholtz-Verlag rutkaamen. Dat is ehr Afsluss-Arbeit an de Bauhaus-Universität Weimar west.
