Menü
Kieler Nachrichten | Ihre Zeitung aus Kiel
2018: Platt is topp
Nachrichten Schleswig-Holstein 2018: Platt is topp
Partner im Redaktionsnetzwerk Deutschland
12:00 11.01.2019
Von Heike Thode-Scheel
De eerste Nordjob op Platt in Miildstedt - veele junge Lüüd un Plattschnacker weern dor. Quelle: Ingwer Oldsen

Mit en schönen un en weniger schönen  Rekord fangt dat Johr an. Toeerst de goden Narichten:  42 500 Vertellen sünd middewiel bi’n NDR bi den Schriev-Wettstriet „Vertell doch mal“ rutsuert. Dörtig Johr gifft dat den plattdüütschen Wettbewarb all un jümmers warrd de Lüüd nich mööd, ehr Geschichten intoschicken. Jedeen Johr dinkt sik de Redakteure vun‘ NDR een nieges Motto ut. Un twaars in‘ Januor. Denn geiht dat denn los mit‘e Schrieveree. „Vertell doch mal“ hett sogor all den Kappelner Literaturpries kregen. Dat geiht nu in’e nächsten Dag wedder los!

Veerunveertig Johr weer dat Institut för Nedderdüütsche Spraak in Bremen INS dorför tostännig, datt de Plattdüütsche Spraak fördert un erholen warrd. Stütt un Stöhn hebbt se vun de veer norddüütschen Länner Sleswig-Holsteen, Hamborg, Bremen un Neddersassen kregen. Un twaars 272 000 Euro n’t Johr. Dormit is 2018 Sluss. De Länner künnigt den Verdrag to’n 31.12.2017.  Worüm se dat doot, dat steiht för veele Lüüd in’e Steerns. Op jedeen Fall wüllt se en egen „Lännerzentrum för Nedderdüütsch“ op’e Been stellen. Man an‘ 1. Januor is dorvun nix to sehn un nix to höörn. Un dat blifft ok noch lang so. Dat INS will nich opgeven. Un seggt: „Ok 2018 gellt: Dat INS is dor för all Fragen to de Regionalspraak Plattdüütsch . . .  Dat INS kümmert sik. Un so blifft dat ok“.

Februor

Endli wedder gode Narichten för Platt. Un dorto noch twee Mol en schönen Geldsegen: De Lannesregeern spendeert een halve Million för Kinnergoorns, dormit se uns Lütten Platt bipuuln künnt. Jedeen Kinner-Grupp, de wat för de lütten Spraken in uns Land doon will, künnt bit to 2000 Euro bi Gemeinden un Kreise kloor maken. Se mööt aver Personol un en Konzept nawiesen. Un denn kümmt noch mol en Geschenk vun Ministerpräsident Daniel Günther. He will „die Landeszuschüsse für wichtige Einrichtungen der niederdeutschen Sprache anheben und damit den hohen Stellenwert dieses kulturellen Angebotes unterstreichen.“ Dat sünd 66 000 Euro. Freuen künnt sik de beiden plattdüütschen Zentren, de Jugendhoff Scheersbarg un de Sleswig-Holsteensche Heimatbund. Geld gifft dat ok för de Fehr-Gill, dormit se dat elektroonsche  Wöörbook rutgeven künnt.

März

„De Stüerfru is endli an Bord“, heet dat op de Plattdüütsch-Siet an‘ 12. März. Dat „Lännerzentrum Nedderdüütsch“ (LZN) gifft dat twaars all siet den 1. Januor – tominnst op’t Papeer – aver nu kriggt Christianne Nölting de Leit. Se mutt eerst Mol een Tohuus för’t Institut finnen un natürli passen Lüüd. Un Kuntakte knütten. Hunnert Dag schull de „administrative Arbeit“ duern – man de Plattdüütschen mööt veel länger Geduld hebben . . .

April

„Sie besünners“ – dat is dat Motto vun’e eerste Nordjob op Platt in  Mildstedt. De beiden Platt-Zentren in Holsteen un Sleswig hebbt dat tosamen mit’e  Agentur för Arbeit un den Ünnernehmensverband Unterelbe-Westküste op’e Been stellt. 16 Utsteller ut’e Region un ut ganz verscheden Profeschoonen söökt junge Plattschnacker, üm se uttobillen: „Plattdeutsch schafft Identität, Nähe und Vertrauen – und kann ein echter Wettbewerbsvorteil sein“, meent Gesa Retzlaff vun’t Platt-Zentrum.

Mai

Bombenstimmung un nakelte Jungs geev dat bi den plattdüütschen Band-Wettstriet „plattbeats“. Thorsten Börnsen vun’t Plattzentrum Holsteen hett em nu all to’n tweeten Mol tosamen mit dat Ohnsorg-Theoter op’e Been stellt. Hip-Hop, Punk, Elektro, Rap oder Metal – tein Bands un enkelte Musiker hebbt toletzt in’t plattdüütsche Finale stahn un weern sik eens: „Plattdeutsch ist eine geile Sprache.“

Juni

Platt is bi uns topp - in Bremen en Flop, in Hamborg Frust, in Neddersassen geiht‘ bargop. Dat is bi den Monitoring Bericht vun’e Eu-Charta bi rutsuert. Düsse Bericht warrd vun‘ Sachverstännigenutschuss in‘ Europaraat schreven. Bi‘t sonöömte „Monitoring“ wüllt de Experten sehn, ob de enkelten Bundeslänner de Forderungen vun’e EU-Regionol- un Minnerheitencharta nipp un nau ümsetten doot. Un dor liggt Sleswig-Holsteen wiet vöörn. Mit de 30 Modellscholen in’t Land un de Devise: „Geschlossener Bildungsgang von der Kita bis zur Hochschule“.

Juli

„Ankamen -An(ge)kommen“ – dat Theoterprojekt op Hoch un Platt op’e Studio-Bühn vun’t Ohnsorg-Theoter is wat ganz Besünneres. „Modernes regionales Theater ohne Heimatkitsch“, seggt de taz. Dat Stück is nämli böös aktuell. Denn dat geiht üm dat Thema Flucht. Dat is hüüt nich anners as vör 70 Johr. Regisseur Michael Uhl un Dramaturgin Cornelia Ehlers hebbt twee  Johr lang mit Lüüd schnackt, de op’e Flucht weern. Söben Düütsche üm de tachentig, de in‘ Tweeten Weltkrieg as Vertriebene bi uns lanndt sünd un dree junge Lüüd ut Eritrea un Afghanistan, de 2015 mit den Flüchtlingsstrom in Hamborg ankamen sünd.  Frömdes Land, frömde Kultur, frömde Spraak. Un Platt mittenmang.

August

Nochmol Platt-Theoter to’n Namaken: „Alien-Rock“. Dat plattdüütsche Musical is en Pilotprojekt vun‘e Nedderdüütsche Bühn Niemünster. Junge Lüüd twüschen 14 un 20 Johr speelt dor mit. De meisten kunnen toeerst keen Platt. De sünd över en Casting dorhin kamen. Dree Weken hebbt se tosamen pröövt un dat Schönste: De Jungs un Deerns wüllt wiedermaken. „Ziel ist es, mit diesem Pilotprojekt langfristig den Nachwuchs an der Bühne zu fördern“, seggt Regisseur un Autor Stephan Greve.

September

Dat hett dat noch nich geven in Kiel un ümbi! En groot Platt-Gala mit’n roden Teppich un all de Platt-Superstars as Matthias Stührwoldt, Herr Momsen, Helge Albrecht, Ines Barber, Jochen Wiegandt, Annie Heger, Sabine Kaack . . . Un dat in’t Opernhuus in Kiel. Dor heet dat: Vörhang op för Theoter, Comedy, Vertellen, Musik un Poetry-Slam. Un achterran geev dat noch en Aftershow-Party. Kloor – för Plattschnacker (hochdüütsche durfen ok mitmaken).

Un de Plattdüütschen hebbt Grund to fiern: Denn de Europäische Charta för Regionol- un Minnerheitenspraken warrd 20 Johr. An‘ 13. September is se vun Düütschland ratifizeert wurrn. Dat heet: De lütten Spraken kriegt Stütt un Stöhn dörch den Verdrag vun‘ Europaraat. De gellt sogor in Düütschland as Bunnesgesett. In’e Charta is fastschreven, wat de Regionol- un Minnerheitenspraken för Rechte hebbt. Un wat de Länner för Plichten hebbt, üm de Spraken to fördern. Dat warrd alle dree Johr kuntrulleert.

Un wo wi graad bi de Rechte vun’e lütten Spraken sünd: In‘ September hett Lehramtsstudentin Anna Brodersen de eerste plattdüütsche Bachelor-Arbeit schreven. An’e Europa-Uni Flensborg Heel un Deel op Platt. Över de plattdüütschen Rechtschrievregeln. „Natürli kann Platt de Spraak vun’e Wetenschap sien“, meent ok ehr Dozent Robert Langhanke.

Oktober

Platt kann aver nich blots de Spraak vun’e Wetenschap ween, Platt is ok de Ünnerrichtsspraak in 30 Modellscholen in’t Land. Un dat all siet dat Schooljohr 2014/2015. Grundlaag för den Ünnerricht in’e 1. un 2. Klass is dat Lehrbook „Paul un Emma snackt plattdüütsch“. Dat hett en Schoolbook-Arbeitsgrupp utarbeit. Rechtiedig to dat niege Schooljohr is nu ok dat Schoolbook för de drütte un veerte Klass trech wurrn: „Paul un Emma un ehr Frünnen“.

November

De groot Dichtersmann Bolko Bullerdiek kriggt den Kappelner Literaturpries: „Dat sünd Geschichten ut Fleesch un Bloot, Geschichten vun Minschen vull Leevde, Bang, Afgrünn, Lust, Gedanken, Hass, Stolt, Höpen, na ja, un de Traumata, de jeedeen mit sik rümdriggt“, hett Jan Graf in sien Loffreed seggt. Un wieder: „Bolko is een, de unsen plattdüütschen Kulturbedriev na vörn bröcht hett. He is en oprechten, coolen, sympathischen Typen.“

Ganz cool is ok Ritter Trenk. De schnackt nämli miteens Platt! Dat plattdüütsche Kino-Filmprojekt mit veele grote un lütte Stars hebbt de beiden Schoolmeester Heiko Frese un Georg Schillmöller op’e Been stellt. 85 000 Euro hett de Spaaß kust – aver se hebbt Stütt un Stöhn vun verscheden Privatlüüd, Firmen, Lannesverbänne, Stiften un Vereene kregen. Sogor Schauspeler Axel Prahl is as Ritter Hans to höörn. In 45 Kinos twüschen Nord- un Ostsee is de plattdüütsche Trickfilm all lopen – dat hett dat noch nich mol bi den hochdüütschen Film geven.

Dezember

30 Johr gifft dat den Posten vun‘ Minnerheiten-Beopragten nu all in Sleswig-Holsteen. In en Fierstünn hebbt de Minnerheiten un de Plattdüütschen wiest, wat intwüschen all’ns lopen deit.  Mit dorbi weer ok uns ehemoligen Ministerpräsidenten Björn Engholm. He hett dat Amt 1988  op’e Been stellt. Un dat is eenmolig in Europa. „Ich glaube, dass wir hier in Schleswig-Holstein mit Stolz von einer Erfolgsgeschichte sprechen können, wenn man auf die Situation unserer Minderheiten blickt und wenn man auf das Amt des Minderheitenbeauftragten blickt“, swöögt Ministerpräsident Daniel Günther vun’e Minnerheitenpolitik in uns Land. Björn Engholm meent sogor, datt „unser Schutz der Minderheiten inzwischen Weltgeltung besitzt.“

Kommentare
Die Debatte geht am Morgen weiter
Die Kommentarfunktion ist zwischen 22:00 und 06:00 Uhr nicht aktiv – denn wir wollen eine gute Moderation der Beiträge gewährleisten.
Wir freuen uns am Morgen über Ihre konstruktiven Beiträge zum Thema!

Bei einer Kontrolle der Umweltschutzvorgaben wurden Beamte der Wasserschutzpolizei in Brunsbüttel auf einem dänischen Tanker fündig. Die Besatzung soll Abwasser aus den Tanks nur unzureichend behandelt über Bord gepumpt haben.

Frank Behling 11.01.2019

Die Zahl der Organspender und Organtransplantationen ist im vergangenen Jahr auch in Schleswig-Holstein gestiegen. Die Organspende hat sich im vergangenen Jahr erstmals seit 2010 in Deutschland wieder deutlich positiv entwickelt.

11.01.2019

Rund um die Ausschreitungen beim G-20-Gipfel in Hamburg stand die linksextremistische Szene in Schleswig-Holstein und Norddeutschland in den vergangenen Monaten häufiger im Fokus. Um die Rechtsextremisten scheint es dagegen ruhiger geworden zu sein. Doch die Ruhe trügt, mahnen Kenner der Szene.

Niklas Wieczorek 11.01.2019