Menü
Kieler Nachrichten | Ihre Zeitung aus Kiel
Anmelden
Hier löppt all'ns tohoop
Nachrichten Schleswig-Holstein Hier löppt all'ns tohoop
Partner im Redaktionsnetzwerk Deutschland
12:00 26.08.2019
Platt in'e School is en wichtiges Thema vun'e Platt-Zentren in Leck un Mölln. Quelle: th
Anzeige

Wenn du bi google „Zentrum für Niederdeutsch (ZfN)“ intippen deist, denn kümmt dor en Landkort vun Sleswig-Holsteen mit twee grote rode Punkte op: Enmol in Leck un enmol in Mölln. Siet 25 Johr loopt dor alle Fodens tohoop to düsse beiden Knotenpunkte, wo Plattdüütsch tohuus is. 1994 hett de Lannesregeern de beiden Zentren op’e Been stellt, üm „das Land bei der Förderung der niederdeutschen Sprache zu unterstützen.“ Dat geev blots en Problem: De Kassen weern leer. Mit twee halve Stellen güng dat liekers los: „Ik heff mit nix anfungen“, smüüstert Volker Holm, de dat Zentrum in Ratzeborg mit opbuut hett un twintig Johr lang för de Plattdüütschen tostännig weer.

De Idee ör düsse Inrichten harr de domolige Lanndag-Präsidentin Lianne-Paulina Mürl (se weer übrigens de eerste Fru, de in uns Lanndag Präsidentin wurrn is). Mürl hett den Biraat  för Nedderdüütsch in’e Welt sett un dor hebbt se sik fraagt: Wat kann man noch doon, dormit de platttdüütsche Spraak Stütt un Stöhn kriegen deit? Dorbi sünd denn de Zentren rutsuert. Eens in‘ Norden, eens in‘ Süden. An 17. März 1994 is toeerst dat Zentrum in Leck mit en lütt Fier inweiht wurrn, an 5. September güng dat denn ok endli in Ratzeborg (hüüt in Mölln) los. All’ns mehr so provisorisch: Denn dor fehlte nich blots dat nödige Geld för de Mitarbeiter, dor fehlten ok de passen Rüüme. Hans Wilkens, domols Chef in Leck,  hett in’e eerste Tiet noch ünner’t Dack huukt, Volker Holm hett veel vun tohuus ut organiseert un denn en Büro in’t Huus Meckelnborg kregen.

Anzeige

Denn müss en Konzept her – weer jo all’ns wat Nieges. Dor würrn Ideen sammelt un Lüüd anschnackt. Un all’ns so blangenbi, denn jedeen vun’e beiden harr jo noch en halve Stell in’e School. Computer? Fehlanzeig. Dat füng man graad an mit de dore Technik un dat Internet.  Liekers - 1996 heet dat in‘n Bericht vun’e Lannesregeern över de „Situatuion der Niederdeutschen Sprache“: „Obwohl die Zentren noch sehr jung sind, ist jetzt schon zu erkennen, daß sich die Arbeit in beiden Einrichtungen sehr positiv auswirkt.“ Se wullen wull ok geern mehr Personal stellen, man „angesichts leerer Kassen ist das kurzfristig sicher nicht realisierbar.“

1999 wohrschau Anke Spoorendonk in en plattdüütsche Debatte in’t Lanneshuus: „De beiden Mitarbeiter vun’e Zentren lopen sik de Hacken scheef un arbeiden as man wat, aver se köönt dor gor nich achterrankamen.“ Man dat nützte nix. Se müssen mit Bordmiddel wiedermaken. Se hebbt Lesungen organiseert, Kuntakte knüppt, Vereene besöcht, en Bibliothek opbuut, se sünd Experten för de Scholen un Hochscholen wurrn, hebbt en Nettwark tosamenstellt un weern natürli ok för all de Plattschnacker in’t Land dor.

2004 – to dat teinjährige Jubiläum -  hett de domolige Lanndagspräsident Heinz-Werner Arens gratuleert: „In düsse tein Johr hett sick de ZfN as faste Institution för de Plattdüütschen mehr as bloots bewährt. Dat ZfN is en Knotenpunkt för de Plattdüütschen.“ Ok Ministerpräsidentin Heide Simonis weer begeistert: „Die Zentren haben sich zu einem anerkannten Informations- und Beratungszentrum entwickelt und werden auch zukünftig wichtige Impulse für die Pflege des Niederdeutschen geben.“

Veer Johr later is dat denn endli sowiet: Keen halven Kraam mehr: „Für die Landesregierung von Schleswig-Holstein stellen die beiden Zentren für Niederdeutsch in Leck und Ratzeburg ein unverzichtbares Element ihrer Förderung der niederdeutschen Sprache dar. So wird das Zentrums in Ratzeburg ab sofort von Volker Holm mit einer vollen Stelle geleitet“, heet dat in’e Pressemitdelen vun’e Lannesregeern. In Leck geev dat all en vulle Steed mit Günter Fleskes. Em folgt in’t sülbige Johr Ingwer Oldsen. Sien Schwerpunkt: De Kinner. Datt de Spraak all an’e Lütten in‘e Kinnergoorns un in’e Scholen wiedergeven warrd. He hett den Zertifikatskurs „Platt för de Lütten“ op’e Been stellt, de jedeen Johr niege Platt-Schoolmeister un Kinnergoorner utbillen deit.

Op Lannesebene hebbt de beiden Zentren jümmers gemeensome Saak maakt. Ok wenn de Schwerpunkte ünnerschedli weern – dat güng doch jümmers dorüm, de Plattdüütsche Spraak in‘e Köpp vun’e Minschen ünnertobringen.

2015 geiht de „Pionier für das Plattdeutsche“, de „Netzwerker der ersten Stunde“, Volker Holm, na twintig Johr in Penschoon.  De Plattschnacker hett sik üm de Tosamenarbeit kümmert, as dat dat Woort „Nettwark“ noch gor nich geev. Sien Meisterstück is „plattnet“. Dat is en Internetdeenst, de all dat, wat in’e plattdüütsche Welt passeern deit, kunnig maken deit. Sotoseggen de plattdüütsche Tagesschau. Em folgt Thorsten Börnsen as Chef. De is Füer un Flamm för de plattdüütsche Musik un bringt den Band-Wettstriet „plattbeats“ mit in’n Norden. Wedder en niegen Schwerpunkt. 2017 geiht Ingwer Oldsen in Penschoon un Gesa Retzlaff övernimmt dat Stüerrad in Leck. Un wat is ehr Pläseer? Theoter un School.

Un wieldatt dat nu so schön lopen deit, hett dat verleden Johr noch en ganz besünneres Geschenk geven för de beiden Zentren. Villicht so’n Aart Geburtsdags-Geschenk in‘ Vörrut. Dat hett Johannes Callsen övergeven. He is de Beobdragte för Regionol- un Minnerheitenspraken in’t Land: „Ich freue mich, dass es gelungen ist, die Landeszuschüsse für wichtige Einrichtungen der niederdeutschen Sprache anzuheben und damit den hohen Stellenwert dieses kulturellen Angebotes zu unterstreichen.“ Jedeen Zentrum hett he 2 500 Euro mehr spendeert. Callsen will de Zentren dormit noch mehr Stütt un Stöhn geven: „Die beiden Niederdeutsch-Zentren leisten wichtige Breitenarbeit für Plattdeutsch und sind für alle diejenigen, die sich für die niederdeutsche Sprache engagieren, anerkannte Ansprechpartner.“