Menü
Kieler Nachrichten | Ihre Zeitung aus Kiel
Anmelden
Drömen, kieken, lustern
Nachrichten Schleswig-Holstein Drömen, kieken, lustern
Partner im Redaktionsnetzwerk Deutschland
08:21 05.11.2019
Von Heike Thode-Scheel
Bunt un spannend, wat to'n Drömen un ganz veel to'n Liern. De niegen Kinnerböker op Platt. Quelle: th

De oll Hammel Fuch, de pummelige Moppel un lütt Rosa hebbt dat goot: „De hemm‘ ein’n leiwen Heini, ümmer fienes Fauder up de Wisch, ein’n blitzblanken Stall un af un an wat tau’n Lickern . . .“ Heini is de ole Buer. Un wenn Heini Platt schnacken deit, denn verstaht de Schaap jedeen Woort. Komisch, oder? Wo wunnerschöön dat doch bi em is – aver denn „kümmt ein’n gräsigen Dach un allens is vörbi.“ So fangt de spannende Geschicht an över dree Schaap, de veele Aventüer bestahn mööt. Anke Ortlieb hett se schreven un ok illustreert un de Schrieversfru is dormit sotoseggen Trendsetterin, as dat so schön niemoodsch heten deit. Denn plattdüütsche Kinnerböker, de loopt miteens wedder as dull. Un dat gifft en Barg niege Böker för Kinner un junge Lüüd op’n Markt.

Vun Deerten un Minschen

Een dorvun is dat Book över de dree lütten Schaap Rosa, Moppel un Fuch: „Mäh! Maa! Möh!“ heet dat un hett ok glieks den Fritz-Reuter-Pries kregen: „Das Buch nimmt seine jungen Leser ernst, ist humorvoll, steckt voller Fantasie, dabei im besten Sinne modern“, meent de Jury. Dat Book is för Kinner dacht, de all en beten öller sünd. denn bi de spannende Vertellen vun Anke Ortlieb kann en richtig so’n beten bang warrn un de lütten Schaap duert een. Buer Heini warrd nämli ens Daags vun so’n Wagen mit Tatütata afhoolt un kümmt nich wedder. Un de niege Buer is gor nich fründli un de schnackt ok keen Platt. As de Slachter vör de Döör stahn deit, nehmt de Dree Rietut. Natürli gifft dat en plattdüütsches Happy-End. De Kinner liert en Barg över dat Wohlsien vun‘e Deerten, över dat Miteenanner vun Minsch un Deert un vör allen Dingen över de Spraak. Un achter gifft dat den Text ok noch mol op Hochdüütsch – wenn’t denn gor nich anners geiht. Demmler Verlag

Droomhaft indükern

Wat to’n Dröömen (un en kann ok ganz veel liern – aver drömen is doch so veel schöner!) is dat lütt Book „Kumm, wi sägeln“ ut’n Quickborn-Verlag.   Schrieversfru Viviane Eisold (Platt maakt vun Viktoria Grünwald) lett ’n lütt Deern op grote Fohrt gahn . . . se hett ehr Papeerschipp verloorn un suust nu dörch Wind un Wellen un denn jüstemang in‘ Heven rin: „Mit pralle Sägels dörch’t All geiht de Fohrt. Man tau, Stüerbord!“ Dor dröppt se dat sööte Maandkind un dat schickt ehr wieder – hin na de Waterdeerns, de to üm to geern mit Papeerboote spelen doot. Dor kann man doch gor nich böös ween, oder? De Geschicht un de wunnerboren Collagen ut Papeerschnippel, Aquarell, Ölkried un Bliestift nehmt Lütt un Groot mit op en Reis dörch Lüttemanns Droomwelt. Meist so schön as de plattdüütsche Hewelmann vun Storm: „Bastelst du giern ut Popier di’n poor Schäpen? Dröömst dachlang von Sand, Sünn un Musseln du gor? Denn mach dat woll sin, dat de Wellen ehr Ruuschen bi Nacht ok lött in dien Dröm sien Spor“. Un wenn de Lütten denn utslapen hebbt, denn gifft dat noch en Barg to’n Entdecken. In düt lütt Book steekt nämli noch veel mehr binn as blots Drööm. To’n Bispill den QR-Code . . . enfach mit‘ Handy inscannen un denn warrd dat Book grötter un grötter. Dat hett nämli de Uni Greifswald op’e Been stellt un de hett sik örnli wat an Arbeitsmateriol för Scholen un Kinnergoorns utdacht. Dat gifft en Audiodatei to’n Rinhöörn, dat gifft Tipps to’n Klüütern, Wöörlisten, Molvörlagen, Speele, Schnacks un sogor en Vokabelkurs bi quizlet. Also, düt Book is beter as en Överraschungs-Ei: Hier hebbt de Lütten wat Spannendes, wat to’n Spelen, wat to’n Drömen un wat to’n Liern. Quickborn-Verlag

Zuckersööt Leesbook

Un mit dat Drömen un Liern geiht dat ok glieks wieder. „Wuddeldick kummt in Gang“ is en zuckersööt Leesbook mit bunte Biller binn, de en echt an’t Hart gaht. Wuddeldick is en Wöttel – also egens en Intoppgericht - de bi Oma Koopmann leven deit. In de lütt Oma heff ik mi op’n Slag verleevt. Nich blots, wieldatt se en Hart för Wötteln hett, nee, se süht mit ehr Puusbacken un ehrn langen witten Zopp to’n In‘-Arm-nehmen ut. Un Oma weet so veel vun fröher to vertellen: Wat dat mit den Nachtpott op sik hett, woans en Grööntüüch inkaken deit, se kann Arven puuln un sogor Beern-Duft-Koken backen. . . Natürli wunnert Oma sik ok nich doröver, datt de lütt Wuddeldick schnacken kann – bavento noch Platt un för de lütte Muus in ehr Tohuus, dor finndt se ok en Platz. So warrd de dree en Familie: Oma Koopmann, de Wöttel Wuddeldiek un de Muus Hinnerk. Ines Hühnlein hett de Geschicht vertellt un Klaus Henicz de droomhaften Biller dorto moolt.  Droomhaft sünd ok de verscheden Arbeitsbläder, de dat geven deit. Dor maakt dat Liern duppelt Spaaß. www.wuddeldick.de

Aventüür in’t Bickbeernland

Komisch, wi kaamt ut dat Drömen gor nich mehr rut! De lütt Lasse will egens Bickbeern plücken,  man denn dröppt he den Bickbeerkönig, warrd lüerlütt un beleevt mankeen Aventüür in’t Bickbeernland. Tosamen mit Twargen, Kattekern, de schnacken künnt un Müüs, de Super-Knööv hebbt. He is sik seker: „Ik heff wiss dröömt!“ De berühmte schweedsche Schrieversfru Elsa Beskow hett düsse Fantasie-Vertellen nich blots schreven, sünnern ok op ehr ganz egen Jugendstil-Wies illustreert. Un ok wenn de narrsche Geschicht all över hunnert Johr old is – de lütten Kinner ut‘ Holt sünd doch to üm to sööt. Vör allen  Dingen, siet Margrit Hansen se Platt bipuult hett. Unbedingt op de Reis maken in’t plattdüütsche Bickbeernland! Futura Edition

Quietschfidel un vörnesig

Veel luder un opgeregter geiht dat bi de „Lütten Bagaluten“ to. Dat sünd Swiebitje, Kungar un Görde. Se sünd driest, kiebig, luud, plietsch, vörnesig un hebbt natürli jümmers en in‘ Sinn. De dree sünd sotoseggen de „Kinner“ vun Schrieversfru Bärbel Wolfmeier un vun de Illustratorin Angela Gstalter. Un dorüm sünd se ok jüst so lebennig as in echt.  In dat Kohdörp Büngelsbüll, dor maakt de dree Bagaluten allerlei Untöög. Aver so richtig böös ween kann man de nich – sünd eben Kinner ut uns Tiet un Platt schnacken künnt de ok noch. Nu wüllt se bi en Gruselwettstriet mitmaken. Ohauaha – wokeen wull de gruligste vun alle is? Kannst di vörstellen, wat dor los is. Bärbel Wolfmeier hett den quietschfidelen Alldag vun’e Lütten richtig goot to Popeer bröcht. Dor künnt sik de Kinner op’t Best wedderfinnen. Diekschoop-Verlag

Swiensplietsch warrn

sünd In dat nächste Billerbook geiht dat üm „De Geschicht vun dree lütte Swien“ – ut dat ole Märken hett de Amiguitos Verlag wat ganz Nieges maakt. Un dat passt op’t Best in uns Tiet vunwegen Mehrsprachigkeit: De lütten Swien schnackt nämli nich blots Platt, sünnern ok Hochdüütsch un Engelsch (gifft dat ok noch op Polnisch, Franzöösch, Italiensch, Spaansch un Russisch).  De sünd eben swiensplietsch. Dat hölpt se ok, wenn se in de grote wiede Welt trecken schüllt. Denn Modder Swien worschau se: „Nich jedeen kann uns Swien goot lieden!“ Woans de dree dat nu opstellen doot, datt se den Wulf in‘ Dutt haut, dat hett Schrieversmann David Fermer richtig spannend in moderne Wöör kleed.  Dor höllst de Luft an, wenn de Wulf üm de Hüser vun’e lütten Swien sliekern deit . . . Un denn sünd dor jo ok noch de bunten Biller vun Regina Marxen. Ehr  is dat glückt, all de verscheden Stimmungen vun de lütten Swien mit’n Stift intofangen. Wenn de Lütten plarrt, wieldatt se Afscheed nehmen mööt . . .  dor kriggt man echt Hartpuckern. Datt man mit so en buntes, schönes Kinnerbook so veel liern un drömen kann, is en Wunner. Höört op jedeen Fall ünner‘n Danneboom! Amiguitos Verlag

Platt lesen liern is ganz enfach

Datt Platt liern bannig Spaaß maken kann, wiest ok de fief Hefte „Lesestart mit Eberhard - Plattdeutsch“ ut’n Mildenberger-Verlag. Dat Platt-Paket hett för jedeen Lees-Stufe wat dorbi – un ok ganz verscheden Themen: „De Katt Sisi“, „Arbeit för de Hunnen“, Wat is en Tapir“, Wo weer dat mit de Wikinger?“ un „De See beleven“. De lütten Hefte sünd nich blots wat för den Ünnerricht in’e Grundschool, de kann man ok wunnerbor Tohuus to’n Vörlesen un Studeern nehmen. Dor liert en nich blots Platt, sünnern ok annerswat. De Texte hebbt aver noch wat Besünneres – de sünd nich blots knackig, dor kann man richtig lesen liern. Denn jedeen Silv hett en anner Farv. Dat maakt de Saak wat Enfacher. Mildenberger-Verlag

Voll krass, dat Mammut

„En echt Stück lebennig Geschicht“, meent de Minschenvadder begeistert to dat lütte Mammut, dat miteens bi se in’e Köök stahn deit. „Voll   krass!“, röppt Dominik, de Minschenjung. Alle sünd rein ut’e Tüüt: Denn „Mammut Hansen leevt nich in’n Zoo“ (so heet dat Book) – dat „Wunder der Wissenschaft“ is de Familie Hansen enfach tolopen. Lütt Mia freut sik all as dull, denn se hett dat lütt plüschig Deert in ehr Hart sloten. Mammut Hansen is denn sowat as de Familienhund – de mutt ok to Hunnenschool un Gassi gahn un liert veel bi de Minschen. Ok dat strullern. Aver dat will ik nu nich verraden. Op hunnert Sieden künnt de Lütten sik de Aventüür vun’t lütte Mammut vörlesen laten. De vigellienschen Geschichten vun Gesine Wanke sünd echt sööt un vull mit Fantasie. Heidrun Schlieker hett dat Ganze rund maakt mit ehre bunten Biller vun Deerten un Minschen. Quickborn-Verlag

En Smuckstück to Wiehnachten

To’n Sluss noch en Smuckstück för Groot un Lütt: „Lüttenwiehnachten“. De wunnerbore Geschicht vun den groot Dichtersmann Hans Fallada hett Karl-Heinz Groth in’t Plattdüütsche överdragen. Un dormit geiht en de Text noch mehr to Hart, finn ik. Wat för en schöne Idee, de dor ahcter steken deit: „Wenn dat för uns Minschen Wiehnachten gifft, mutt dat dit Fest ok för de Deerten geven“, meent Fallada (Groth). Denn wat weern wi ahn de Deerten. Lüttenwiehnachten nöömt sik dat Fest. Man wenn de Schoolmeister dat spitz kriegen deit, denn is Holland in Noot. De höllt nämli nix vun düssen „Heidentöög“. Liekers maakt sik de Kinner Friedrich, Alwert un Frieda op’n Wech, üm en schöön Dannboom to stibitzen. De Geschicht röhrt en deep an, ob man nu groot is oder lütt. Un dörch de fienen kunstvullen Dusend-Striche-Biller vun den Moler Willi Glasauer kann en ganz deep indüükern in düsse besünnere Wiehnachts-Geschicht. Husum-Verlag

Schleswig-Holsteins erster Kegelrobben-Heuler der Saison heißt Ole. Am Donnerstag präsentierte die Seehundstation Friedrichskoog im Kreis Dithmarschen das 13,9 Kilogramm schwere Tier der Öffentlichkeit.

01.11.2019

Die Syltfähre „RömöExpress“ soll einen Tag später als geplant zwischen List auf Sylt und dem dänischen Havneby auf Rømø den Betrieb aufnehmen. Statt bereits am 4. November wird das Schiff das erste Mal am 5. November zwischen den beiden Häfen pendeln.

01.11.2019

Hilfe für Mieter in Schleswig-Holstein bei teuren Wohnungen: Die SPD will qualifizierte Mietspiegel mit Landesmitteln fördern. Damit könnten sich Mieter besser gegen zu drastische Erhöhungen schützen.

01.11.2019