Menü
Kieler Nachrichten | Ihre Zeitung aus Kiel
Anmelden
Schleswig-Holstein Tüdelband: Platt-Pop ut'n Norden
Nachrichten Schleswig-Holstein Tüdelband: Platt-Pop ut'n Norden
Partner im Redaktionsnetzwerk Deutschland
12:00 15.12.2016
Von Heike Thode-Scheel
Micha, Mire, Malte un Lars - dat is de Tüdelband. Quelle: lippke
Anzeige

De Veer sünd alle op’t platte Land opwussen. Sängerin, Schrieversfru un Musikantin Mire Buthmann is in Travenhorst bi Bad Seebarg opwussen, Malte Müller kümmt ut Eckernföör. He is för’t Slagtüüch tostännig. De beiden sünd vun Anfang an mit dorbi un hebbt de Band grünndt. Micha Hetmann is nieg bi se instegen un speelt de Rietfidel. He is dat Nesthäkchen in’t Quartett un kümmt ut‘n lütt Dörp bi Lünborg. Un denn fehlt blots noch de Bassist Lars Knoblauch ut Magdeborg – twaars keen Nordlicht, aver Platt, dat liert he ok so peu á peu.

De veer Musikanten kennt sik alle ut’e Musikszene in un üm Hamborg. Een Deern un dree Jungs? Wokeen hett dor de Büxen an? „Ik heff de Müütz op“, smuustert Mire (un wohrraftig hett se jümmers ´n Müütz op), „un dat löppt ganz goot.“ Also, de dree Mannslüüd kriegt dor keen Bavenhand, soveel steiht fast. De Deern ut Travenhorst is aver ok ´n fixen Dutt: Se singt, speelt Rietfidel, haut in’e Tasten vun’t Schipperklaveer rin un Klaveerspelen kann se ok noch. Keen Wunner: Mire hett in’e Grootstadt Hamborg Musik studeert – op St.Pauli.

Anzeige

Man de plietsche Deern kann noch veel mehr: Se schrifft ok noch de Leder för de Tüdelband sölben: „Ünnerwegens noteer ik düt un dat. Oder ik schnack dat in’t Handy rin.“ De Texte sünd lütte Geschichten ut’n Alldag. Wat ehr so in’e Mööt kümmt. Wenn se de Texte denn tohuus opschrieven deit, denn hett se meist ok glieks de passen Melodie in‘ Kopp: „Denn sing ik dat un probeer dat mit Instrumente ut. Denn kaamt Melodien un Akkorde.“

Musik maakt de Jungs un Deern vun’e Tüdelband all siet ehr Kinnerdaag. Op Hochdüütsch – Platt kennt se blots vun ehr Grootöllern un Navers. Liekers - se hebbt dat in’t Ohr. Aver sölben schnacken oder singen? Nee, dat wullen se nich un hebbt sik dat ok nich totruut. Jichtenswann keem Mire denn so’n Idee bi een Leed: „Dat wull ik mol utprobeern op Platt. Dat weer gor nich so eenfach. Aver dat hett veel Spaaß maakt“, besinnt se sik. Un denn sünd se dorbi bleven.

Aver worüm singt se nu Platt – wo doch all de groten Hits op Engelsch sünd un dat ok graad so bi uns in Mood is, (Hoch)Düütsch to singen:  „Platt hett ´n ganz annern Klang. Dat is mehr so op’n Punkt“, swöögt de Musikerin. „Platt heet för mi: Tohuus ween. Un Tohuus is dor, wo een dat goot geiht. Anners as bi Heimat. De kann man sik nich utsöken“, sineert de Leedermakerin, de een ganz fienvöllig Siet wiesen kann.

 Un offschonst se all Hochdüütsch opwussen sünd, kümmt Platt mehr un mehr bi se to’n Vörschien: „Wi schnackt in uns Tour-Bus jümmers mehr Platt“, smuustert Mire Buthmann. Un ok achterran, wenn ehr Kunzert vörbi is, denn sabbelt se geern mol mit ehre Fans Plattdüütsch. Vör allen Dingen, wenn se bi de Lüüd tohuus spelen doot: „In’e gode Stuuv, ganz ahn Verstärkung mit so’n beten Klötereen – kloor maakt wi dat. De Lüüd künnt denn noch ehr Frünnen inladen un denn geiht dat los“, vertellt de Musikerin.

Dreehunnert Kunzerte hebbt se in de verleden söven Johr op’e Been stellt. Op‘e Hallig, op’t Festland, in’e goode Stuuv, in’e Kneipe un in‘ groten Sool, op’t Land un in’e Grootstadt. Ehr „Platt-Pop“ kümmt an. So nöömt de Tüdelband nämli dat, wat se dor speelt. „Dat is poppig, dat is folkig un denn all’ns tosamen mit de plattdüütsche Spraak – dat is de rode Foden dorbi. De höllt all’ns tosamen.“

Denn över eens is sik de Plattschnackerin wiss: „All’ns, wat een op Hochdüütsch oder op Engelsch singen kann, kann een ok op Platt maken. Dat kannst du liern so as anner Spraken ok.“ De Veer vun’e Tüdelband sünd doch dat beste Bispeel dorför. Un ehr niege CD „Ganz goot“ is doch „ganz goot“ wurrn, as de Plattdüütsche seggt, wenn em wat so richtig gefallen deit. „ Kloor, all’ns geiht noch veel beter, höger, sneller, wieder . . . ,“ heet dat in ehr Leed. Aver Mire Buthmann un ehr Jungs wüllt gor nich höger, sneller oder wieder. Se sünd tofreden mit sik un’e Welt: „Uns geiht‘t doch ganz goot mit dat, wo wi leevt, mit dat, wat wi hebbt.“

A7: Erstes Teilstück wird fertig - Weihnachtsgeschenk für alle Pendler
Bastian Modrow 15.12.2016
Busunfall in Altenholz - Live-News am Morgen, 15.12.2016
Julia Carstens 15.12.2016
KN-online (Kieler Nachrichten) 14.12.2016