„Dat Plattdüütsche Theoter hett een Tradition bit över de Hansetiet wech un is hüüttodaags noch jümmers mit groote Lebennigkeit mit dorbi. As Störtebeker sien Kopp afkreegen hett, dor geev dat all plattdüütsches Theoter. Den „Dütschen Slömer“ to’n Bispill oder den „Lübecker Dodendanz“. Dor hebbt se in ganz Nordeuropa Platt snackt. Un wenn de düütsche Unesco-Kommission nu seggen deit: Dat höört mit to dat Immaterielle Kulturerbe, denn is dat een groote Anerkennen“, swöögt Wolfgang Börnsen, Plattsnacker, Politiker, Schrieversmann un Vörsitter vun denn sleswig-holsteenschen Bühnenbund.He hett Grund to’n Jubileern: Denn dat Plattdüütsche Theoter steiht siet den 11. Dezember op de düütsche List för dat immaterielle Kulturerbe. Dorto höört ook noch 26 anner Traditionen as dat Reetdack-Handwark, de düütsche Brotkultur, de Genossenschaftsidee oder dat Biikebrennen.
